(გურია ნიუსი, ლანჩხუთი) _ ლანჩხუთის საკრებულოს თავმჯდომარემ რევაზ ჩიტიძემ ადგილობრივი მედიის წარმომადგენლებისთვის ბრიფინგი გამართა. მთავარი თემა 2011 წლის ბიუჯეტი და მის მონიტორინგში მედიის ჩართულობა გახლდათ. საკრებულოს თავმჯდომარემ გამოთქვა სურვილი, რომ ბიუჯეტის პარამეტრების საკომისიო თუ ფრაქციულ განხილვას მედიის წარმომადგენლები დაესწრონ.
_ ოპოზიციონერი დეპუტატი, ძალიან ხშირად აცხადებს, რომ ბიუჯეტში ცვლილებების ხშირი შეტანა არასწორი დაგეგმვის ბრალია და რომ ჩვენ წინასწარ ვერ ვსაზღვრავთ, ამა თუ იმ პროექტს რა თანხა გამოვუყოთ. ეს ასე არ არის და ბიუჯეტში ზრდის კუთხით ცვლილების შეტანა პირიქით _ დადებითი ფაქტია. მოგეხსენებათ, უკვე წლებია, რომ არ არსებობს დაგეგმილი ბიუჯეტის შევსების პრობლემა. წლის განმავლობაში გვიჩნდება დამატებითი შემოსავალი და ეს იწვევს ბიუჯეტში ცვლილების შეტანის აუცილებლობას, რაც საშუალებას გვაძლევს დავაფინანსოთ ან დავუმატოთ დაფინანსება ამა თუ იმ პროექტს, _ თქვა რევაზ ჩიტიძემ.
მისივე თქმით, მომავალი წლის ბიუჯეტის დამტკიცება 9 დეკემბრისთვის იგეგმება.
_ არ დაგეთანხმებით, რომ ლანჩხუთში საჯარო სამსახურებში ოჯახის წევრები და ახლობლები ინიშნებიან. ლანჩხუთი პატარა ქალაქია და შესაძლოა, რომელიღაც თანამდებობის პირის ოჯახის წევრი იყოს დასაქმებული, მაგრამ ეს არ ნიშნავს, რომ ეს ადამიანი პროტექციით დაინიშნა, _ ასე უპასუხა ჩიტიძემ ლანჩხუთში კლანური მმართველობის შესახებ დასმულ კითხვას.
რაც შეეხება წინასაარჩევნო დანაპირების შესრულებას, რევაზ ჩიტიძემ ასეთი პასუხი გაგვცა: _ ჩვენ ვამბობდით, რომ ბუნებრივი გაზი ექნებოდა მთელ ქალაქს და ეს დაპირება იანვრისთვის შესრულებული იქნება. ბევრ ადგილას გადავჭერით წყლის პრობლემა, ვატარებთ ინფრასტრუქტურულ სამუშაოებს. თქვენ უნდა ნახოთ, როგორ ამბებს გვითენებენ სოფლების რწმუნებულები და მაჟორიტარები, ყველა მაქსიმალურად მოწადინებულია, რომ თავის სოფელს რაც შეიძლება მეტი გაუკეთოს.
ლანჩხუთის საკრებულოს თავმჯდომარე ასევე შეეხო წყლის პრობლემას: _ ბოლო დროს ასევე ხშირად გვესმის, რომ წყალი კი გამოიყვანეს, მაგრამ წყალი არ გვაქვსო. ამაში დამნაშავე თავად მოსახლეობის ნაწილია. გაგიკვირდებათ და როცა მოსახლეობას წყალი ჭიშკართან მივუყვანეთ, მათ აღარ იზრუნეს მის ეზოში შეყვანასა და ონკანის დამონტაჟებაზე; მოხსნეს ხუფები, არც ონკანები აქვთ და წყალი 24 საათი იღვრება. ამის გამო იქმნება წყლის დეფიციტი, ამიტომ, ახლა ვაპირებთ, რომ შევქმნათ სამსახური ან ჯგუფი, რომელიც ამ პრობლემის მოგვარებაში დაგვეხმარება.
“გურულის ძეგლთან” დაკავშირებით და ლანჩხუთში ბიძინა ივანიშვილის ხელმოწერების შეგროვების თაობაზე, შემგროვებლის პოლიციაში დაბარებაზე რევაზ ჩიტიძემ ასეთი პასუხი გასცა: _ ყველა ადამიანს აქვს უფლება, შეაგროვოს ხელმოწერები. ეს უფლება ჩვენს ქვეყანაში დაცულია. როგორც ვიცი, ამას აკეთებდა შოთა ფირცხალაიშვილი. არ მაქვს ინფორმაცია, რომ ის პოლიციაში დაიბარეს. რაც შეეხება ზოგადად პოლიტიკურ გააქტიურებას, ლანჩხუთში ამას ვერ ვატყობ. საერთოდ კი, ყოველთვის ხდება პოლიტიკაში, რომ იქმნება ახალი პოლიტიკური ძალები და ამაში საგანგაშო არაფერია. საბოლოოდ, საზოგადოება გადაწყვეტს, თუ ვის დაუჭერს მხარს.
_ გურულის ძეგლის აღებას რაც შეეხება, ვფიქრობთ, რომ იქ გავაკეთებთ კარგ სკვერს, სწრაფი კვების ობიექტს ან რაღაც კარგს და ის ტერიტორია იქნება გამორჩეულად კეთილმოწყობილი. ძეგლის დადგმას ვაპირებთ რკინიგზის სადგურის მიმდებარე ტერიტორიაზე, _ დასძინა რევაზ ჩიტიძემ.