11 მარტს, სასტუმრო "ქორთიად მარიოტში" საქართველოს პრემიერ-მინისტრი, ირაკლი ღარიბაშვილი გუბერნატორებს, ქალაქის მერებსა და მუნიციპალიტეტის გამგებლებს შეხვდა, სადაც მთავარი თემა რეგიონებში არსებული მდგომარეობა და ინფრასტრუქტურული სამუშაოები იყო.
საგულისხმოა, რომ ამ შეხვედრის შემდეგ, პრემიერმა გურიის რეგიონიდან წარმატებულთა შორის ჩოხატაურისა და ოზურგეთის მუნიციპალიტეტები მოიხსენია, ხოლო ლანჩხუთი საერთოდ არ უხსენებია.
რადგან აქცენტი საბიუჯეტო თანხების ათვისებაზე იყო, მოსალოდნელიც კი იყო წარმატებულთა შორის ლანჩხუთი არ მოხვედრილიყო. ამის მიზეზი სხვას რომ თავი დავანებოთ, შარშან და შარშანწინ ორი მსხვილი ინფრასტრუქტურული პროექტის ჩავარდნა იყო.
შეგახსენებთ, რომ ჯერ კომპანია "არდიაიმ" მოიგო ტენდერი და საქმე ვერ დაასრულა, მერე კი "ჯიდიაიმ" იკისრა ეს "როლი" და მანაც იგივე მოიმოქმედა.
ორივე სამუშაო ერთ პირთან მოლაპარაკების გზით ფირმა "სამკუთხედმა" გააგრძელა და აქედან ერთი ჯერ არ დაუსრულებია ბოლომდე.
ბუნებრივია დავინტერესდით და პრემიერის შეფასებებზე კომენტარი მუნიციპალიტეტში მოქმედი სხვადასხვა პარტიის წარმომადგენლებს ვთხოვეთ.
რომან ბიწაძე, "რესპუბლიკური" პარტიის წევრი, სამანდატო, საპროცედურო, იურიდიულ საკითხთა და ეთიკის კომისიის თავმჯდომარე: "სხვებთან ერთად მეც მოვისმინე პრემიერის განცხადება, როცა წარმატებულთა შორის ჩოხატაურისა და ოზურგეთის მუნიციპალიტეტები მოიხსენია. ლანჩხუთი კი არც კარგებში და არც ცუდებში ხსენებულა. არ ვიცი რა ინფორმაციის საფუძველზე გააკეთა პრემიერმა ასეთი განცხადება. მისი გადმოცემით ჩანდა, რომ კრიტერიუმად არსებული იყო მხოლოდ ერთი მონაცემი – საბიუჯეტო თანხების ათვისება. თავისთავად ასეთი შეფასება არ არის რეალობასთან ახლოს. შესაძლებელია თანხა 100%-ით აითვისო, თუმცა, სამუშაოების ცუდად შესრულების უამრავი მაგალითებია სხვადასხვა მუნიციპალიტეტებში. თავად განსაჯეთ, თანხის ათვისება ჯობია და სამუშაოების უხარისხოდ შესრულება, თუ თანხა იყოს ათვისებული სამუშაოები კი – შეუსრულებელი.
პირადად მე, მთავარი რაც მენიშნა პრემიერის გამოსვლაში, მან მოუწოდა ყველას – საკრებულოების თავმჯდომარეებს, მერებს, საკრებულოს დეპუტატებს, გამგეობის თანამშრომლებს, რომ გადაწყვეტილებების მიღებისას იყვნენ მეტად თავისუფალნი და დარწმუნებულები მის სისწორეში. სამწუხაროდ, ჩვენთან ხშირად ჭირს სწორი გადაწყვეტილების მიღება და ესაა მთავარი მინუსი. ხან შიშის ფაქტორის, ხანაც უვიცობის გამო. ამ დროისთვის მეტი არაფრის თქმა არ შემიძლია, დაველოდოთ შემდგომში რა გამოხმაურება მოჰყვება პრემიერის სიტყვებს. რამდენადაც მე მაქვს ინფორმაცია, პრემიერის წარმომადგენლები რეგიონებში აპირებენ გასვლას, რომ ადგილზევე მოხდეს სიტუაციის შესწავლა."
კახა ასკურავა "ერთიანი ნაციონალური" პარტიის ადგილობრივი ორგანიზაციის თავმჯდომარე:
"ზოგადად იმ მძიმე მდგომარეობიდან გამომდინარე, რაც დღეს საქართველოს რეგიონებშია და განსაკუთრებით გურიაშია, ამის გათვალისწინებით სამ რაიონს შორისაც რომ არ დაგასახელებენ, უკან დაბრუნებულმა სერიოზულად უნდა დაფიქრდე რაა ამის მიზეზი, უნდა გადახედო იმ წამყვანის თანამდებობის პირების კომპეტენციას, რომლებსაც რეალურად ევალებათ საქმის კეთება და მხოლოდ პოლიტიკური ერთგულების მიხედვით არ უნდა არჩევდე კადრებს. ჩვენ "ნაცმოძრაობის"საკრებულოს წევრები და არა მარტო ჩვენ, მუდმივად მივუთითებდით არსებული პრობლემების თაობაზე, პასუხად კი მხოლოდ იმას ვღებულობდით, რომ ჩვენ არ გვქონდა ამაზე საუბრის მორალური უფლება. უფრო მეტიც, ორი დიდი პროექტი ჩავარდა და ამასაც ნაციონალებს აბრალებდნენ – აქაოდა შეგნებულად მოიგეს ტენდერი და სპეციალურად ჩააგდესო. ძალიან არ მახარებს ზოგადად ჩემი რაიონის წარუმატებლობა, მიუხედავად იმისა, თუ ვინ იქნება ხელისუფლებაში. აქვე სამართლიანობა მოითხოვს ითქვას, რომ ცენტრალური ხელისუფლების უნიათობის მთლიანად ადგილობრივ ხელისუფლებაზე გადაბრალება, არ იქნებოდა სამართლიანი დამოკიდებულება იმ სტაგნაციაზე, რაც სრულიად საქართველოშია დღეს!"
გოგი ხელაძე, საკრებულოს თავმჯდომარე: "რაც დღეს ლანჩხუთში კეთდება, მსგავსი მასშტაბის ინფრასტრუქტურული სამუშაოები არასდროს განხორციელებულა. ჩემი აზრით პრემიერის ეს პოზიცია განპირობებული იყო ერთი ჩავარდნილი პროექტის გამოისობით. არა მგონია ამაზე განგაშის ატეხვა ღირდეს, სამომავლოდ ყველაფერი კარგად იქნება".
ელგუჯა ჩხაიძე, ფრაქცია "თავისუფალი დემოკრატების" თავმჯდომარე: "მოსალოდნელიც იყო, რომ ლანჩხუთი არ დასახელდებოდა მოწინავეთა შორის, რადგან მუნიციპალიტეტის ხელმძღვანელობა რეალურად არაა დაკავებული საქმის კეთებით და მათი მხრიდან საქმისადმი აშკარა უყურადღებობას აქვს ადგილი. არ არსებობს ნდობა გამგებელსა და სამსახურის უფროსებს შორის. ლანჩხუთში წინა პლანზე ფეხბურთი და უკრაინიდან ვეტერანი ფეხბურთელების ჩამოყვანაა წამოწეული. ტაშ-ფანდური მაშინაა კაი, როცა საქმე აწყობილია."
