ტერფის ძვლის სიმსივნე, თირკმელების გაორება-ანომალია, თავის ქალის თხემის ძვლის დეფორმაცია, ნაღვლის ბუშტის დეფორმაცია და რეაქტიული პანკრიატიტი _ ეს იმ დაავადებების ჩამონათვალია, რომელიც 12 წლის ლუკა ჩხარტიშვილს საქართველოში დაუდგინდა.
ლუკას ვინაობას და დიაგნოზს "გურია ნიუსი" დედის თანხმობით აქვყნებს.
12 წლის ლუკა ჩხარტიშვილი ოზურგეთის მუნიციპალიტეტის სოფელ ჯუმათში ცხოვრებს.
ლუკას ოჯახმა ყველაფერი გაყიდა, მაგრამ დაავადებას ვერაფერს შველიან. როგორ ლუკას დედა ამბობს, ბიჭს 7 წლის ასაკში ტომოგრაფია გაუკეთეს და ექიმებმა აღმოაჩინეს, რომ მას 4 თირკმელი აქვს. ახლა უკვე ბავშვი გონებას კარგავს, წნევა 35-მდე ეცემა.
"6 თვისას პირველი აცრა გავუკეთე. ამას საშინელი რეაქცია მოჰყვა _ ძალა გამოეცალა, ჩონჩხივით გახდა, სიცხეებს ვერ ვუგდებდით… მას შემდეგ მისი ჯანმრთელობის მდგომარეობა კიდევ უფრო დამძიმდა. ჯერჯერობით, თითქოს, გარეგნობით არაფერი ეტყობა, მაგრამ ახლა ამ ჯოჯოხეთში მთელი სხეული აქვს ჩათრეული. ყველა ორგანოზე გვეუბნებიან, სამკურნალოაო _ კუჭზე, ღვიძლზე, ელენთაზე… თავის კოშმარული ტკივილები აქვს ყოველ დღე", _ ამბობს "გურია ნიუსთან" ლუკას დედა ინგა ცენტერაძე.
მისი თქმით, დღემდე, არც ერთ ხელისუფლებას, არც ადგილობრივი ხელისუფლების რომელიმე წარმომადგენელს ოჯახისთვის არანაირი სახის დახმარება არ გაუწევია.
ლუკა გერმანიაში გასამგზავრებლად ემზადება, ზუსტი გამოკვლევებისა და მკურნალობისთვის კი ოჯახს 5 ათასი ევრო სჭირდება:
"მთელმა საქართველომ გაიგო ლუკას ამბავი, თუმცა არანაირი დახმარება გურიიდან არ გვქონია. რამდენიმე დღის წინ იყო მოსული ოზურგეთის მუნიციპალიტეტის გამგებელი, რომელმაც მოგვცა პირობა, რომ შესაძლებლობების პირობებში ოჯახს დახმარებას გაუწევს".
ინგა ცენტერაძე ამბობს, რომ ბავშვის სამკურნალოდ ოჯახმა ყველაფერი გაყიდა. ოჯახს დღემდე არ დაენიშნა სოციალური დახმარება. მრავალსულიანი ოჯახი, რომელსაც არანაირი შემოსავალი არ აქვს და მხოლოდ პენსიონერის იმედადაა თვიდან თვემდე, მეწყერსაშიშ ზონაში ცხოვრობს, სადაც ყოველდღე მძიმდება მდგომარეობა. ინგა ცენტერაძის თქმით, საშიშია სახლში ღამის გათევაც, რადგან ეზო ყოველდღიურად, ნელ-ნელა მეწყერს მიაქვს. დღემდე, არც აღნიშნულ პრობლემასთან დაკავშირებით გამოუჩენია გულისხმიერება არც ერთ ხელისუფლებას.
"ასეთ მდგომარეობაში მყოფ ოჯახს სოციალური დახმარება არ გვაქვს. ესაა სამართალი?! მეწყერს მიაქვს სახლი, მეშინია, ბავშვს რომ სძინავს, არ ჩავარდეს იატაკი. ვერ მივაღწიეთ, რომ ამ კუთხით მაინც დაგვეხმაროს ხელისუფლება. ასეთი ოჯახის პატრონს არასდროს არანაირი დახმარება არ გვქონია", _ ამბობს ინგა ცენტერაძე და ყურადღებას ამახვილებს ფაქტზე, რომელიც ქალაქ ოზურგეთის მერის, ბეგლარ სიორიძის მიერ ერთ-ერთი გაჭირვებულისთვის თანხის გადარიცხვას ეხება:
"იმედის კვირაში" როცა გავიდა სიუჟეტი ლუკაზე, ხელისუფლებისგან არავინ შეგვხმიანებია. მეორე სიუჟეტი გავიდა კიდევ ერთ ბავშვზე… კი, ყველას უნდა დახმარება…ყველა დედას უმყოფე მისი შვილი კარგად, მაგრამ გამოაცხადეს, რომ ოზურგეთის მერმა ბეგლარ სიორიძემ თანხა გადაურიცხა სხვას. რატომ? მოდი, შენს ოზურგეთელს დაეხმარე. იცი, თითოეული თეთრი რა მნიშვნელოვანია მისთვის. უფალო, ჩემი შვილი გადამირჩინე სიკვდილს!"
ოზურგეთის მუნიციპალიტეტის სოფელ ჯუმათის მაჟორიტარი დეპუტატი მერაბ ბერიძე, რომელიც წლების განმავლობაში ამავე სოფლის რწმუნებული იყო, "გურია ნიუსთან" აღნიშნავს, რომ ჩხარტიშვილების ოჯახს ის "მეგობრულად" დაეხმარა:
_ დახმარება რა გავუწიეთ?! ფული ჩვენ არ გვაქვს და აქედან გამომდინარე, როგორც შეგვეძლო, ისე დავეხმარეთ.
_ ბატონო მერაბ, კონკრეტულად რა სახის დახმარება გაუწიეთ?
_ კონკრეტულად, გვერდზე დავუდექით. როგორი მეგობრული გვერდზე დგომა ვიცი, ჰკითხეთ ოჯახს და გეტყვიან. თუკი სადმე ხმის გავრცელება იყო საჭირო, ჩემს ახლობლებში, სოფელში, გავავრცელე. მეტი არაფერი _ სხვა რამის უფლება მე მაინც არ მაქვს".
_ იმის უფლებაც არ გქონდათ, რომ შუამდგომლობა გაგეწიათ და ოჯახს სოციალური დახმარება მიეღო?
_რაღაც ვერ მოხერხდა, ფაქტობრივად, ვერ მოვახერხე. ახლა გავუწიეთ შუამდგომლობა. საბუთები მოვამზადეთ, მალე დაენიშნება.
_ ოჯახი მეწყერსაშიშ ზონაში ცხოვრობს, ის ყოველდღიური საფრთხის წინაშე დგას, ვერც ამ კუთხით დაეხმარეთ?
_ იყვნენ გეოლოგები მოსულები, შეამოწმეს და ველოდებით დასკვნას, ადგილი შესწავლილია და პასუხი უნდა ჩამოვიდეს ამის შესახებ, _ ამბობს ჯუმათის დეპუტატი.
