ოზურგეთის მუნიციპალიტეტის დაბა ნასაკირალის მოსახლეობა 14 ჰექტარი მიწის ნაკვეთების გასხვისებას აპროტესტებენ. მათი განცხადებით, ჩაის ფართობები, რომლითაც თითქმის 15 წელია სარგებლობენ, სხვა პიროვნების საკუთრება ისე აღმოჩნდა, რომ მოსახლეობისთვის ინფორმაცია არავის მიუწოდებია.
მუხრან ქათამაძეს შვიდი, ხოლო ტარიელ ალიშანიძეს ხუთი შვილი ჰყავს. მათი შემოსავალი მხოლოდ საბოსტნე მიწიდან მიღებული პროდუქციაა, ისინი ფლობდნენ ჩაის ფართობებს, რომელსაც, მათი თქმით, წლების განმავლობაში ამუშავებდნენ, რამდენიმე დღის წინ კი აღმოაჩინეს, რომ ამ ფართობებს სხვა პიროვნება დაეუფლა.
"მთელი ნასაკირალის მიწები ისე წაართვეს ხალხს, რომ არავინ არაფერი იცის. აქ მეტი შემოსავალი არაა. გვქონდა ჩაის ფართობები, ვამუშავებდით მიწებს, ვკრეფდით ჩაის. გუშინ ვნახეთ, რომ ჩვენს ფართობებში შესულები იყვნენ და მიწას ამუშავდნენ. როცა ვიკითხეთ, რატომ იყვნენ იქ, გვიპასუხეს, ეს მიწის ნაკვეთები შესყიდული აქვს ნესტორ ჟღენტი. ვინ არის ეს ჟღენტი, როგორ და როდის იყიდა ეს მიწა, არ ვიცით," _ ამბობენ ნასაკირალელები.
მათივე თქმით, დაბაში ჩაის პლანტაციები და ჰექტრობით მიწები შესყიდული აქვს ბიზნესმენს მერაბ ვასაძესაც.
"წინასაარჩევნოდ ხალხთან შესახვედრად იყო ყოფილი გამგებელი კოტე შარაშენიძე. მოსახლეობამ უთხრა, რომ რაღა სხვამ იყიდოს ეს მიწები, სოფლის მცხოვრებლებს, შევისყიდით და ვისარგებლებთო. შეგვპირდა შარაშენიძე, ახლა არჩევნებია, მალე გადაეცემა ეს მიწები გამგეობას, მერე თქვენ დაგიბრუნებთ და თქვენი საკუთრება გახდებაო. ველოდებოდით ამ დანაპირების შესრულებას. ვინც ამ მიწებს ამდენი წლის განმავლობაში ამუშავებდა და სარგებლობდა, შესყიდვის უპირატესობა იმას არ უნდა ჰქონდეს? რატომ უნდა ჩაიგდოს ხელში ამდენი ჰექტარი მიწის ნაკვეთი ვიღაცამ?! დაგვეხმარეთ და გაგვაგებინეთ ვინ წაგვართვა ჩვენი მიწები!" _ გვთხოვს მოსახლეობა.
მუხრან ქათამაძის თქმით, დაზარალებულები პოლიციაში წაიყვანეს, სადაც განუმარტეს, რომ ხმაური და დავა აღნიშნულ საქმესთან დაკავშირებით არ შეიძლება, ხელს ნუ შეუშლით მიწის მეპატრონეს, თქვენ კი სასამართლოს მიმართეთო.
დაბა ნასაკირალში გასხვისებული მიწების მეპატრონე შპს "პროგრესს პლუსია", დირექტორი კი ოზურგეთის მუნიციპალიტეტის საკრებულოს ორი მოწვევის ყოფილი დეპუტატი ნესტორ ჟღენტი, რომელიც ამასთანავე რამდენიმე წლის განმავლობაში მიწის ლეგალიზაციის კომისიის წევრიც იყო. იგი ამბობს, რომ დაბა ნასაკირალში რამდენიმე ჰექტარი ჩაის ფართობი კანონიერად აქვს შეძენილი:
"რა თქმა უნდა, კანონიერად მაქვს ეს მიწები შესყიდული. 2004 წელს 10 წლით ავიღე იჯარით, ამის შემდეგ გამოვიდა საიჯარო მიწების გამოსყიდვასთან დაკავშირებით კანონი. გამოვისყიდე მიწები, მაგრამ არ მქონდა საშუალება, რომ დამემუშავებინა და მესარგებლა. ახლა დავარეგისტრირე ელექტრონული ვერსიით", __ამბობს ყოფილი დეპუტატი და ამბობს, რომ ის მოსახლეობას ფართობების დამუშავებაში და სარგებლობაში ხელს არ უშლიდა:
"ისინი მიწებს ამუშავებდნენ თვითნებურად, მაგრამ მე ხელი არ შემიშლია მათთვის _ საშუალება არ მქონდა და ვერ ვიყენებდი ამ მიწებს. ამჟამად მაქვს ჩაის მიკროფაბრიკა და ვფლობ ჩაის პლანტაციებს, ვარ შპს "პროგრეს პლუსის" დირექტორი," _ აღნიშნავს ყოფილი ჟღენტი.
ოზურგეთის მუნიციპალიტეტის გამგებლის წარმომადგენელი დაბა ნასაკირალში ტარიელ ანთაძე "გურია ნიუსთან" ამბობს, რომ მან არ იცის, ვინ გაყიდა ფართობები:
"რამდენიმე წლის წინ, იჯარით გაიცა ჩაის პლანტაციები. იჯარის ვადის ამოწურვის შემდეგ, ეს მიწები გადანაწილდა სხვადასხვა პიროვნებებზე. მე ვერ გაგცემთ პასუხს, თუ ვისზე და როგორ გაიყიდა ფართობები, რადგან მაშინ არ ვმუშაობდი.
ვფიქრობ, მოქალაქეების პრეტენზიები უსაფუძვლოა, რადგან მიწების კანონიერი მეპატრონე სხვაა," _ ამბობს რწმუნებული.
