საქართველოს რეგიონული განვითარებისა და ინფრასტრუქტურის სამინისტროში მინისტრის, დავით შავლიაშვილის სახელზე თბილისში, ინგოროყვას ქუჩა #5-ში მცხოვრები იათამზე ტუღუშის მადლობის წერილი მივიდა:
არიან ადამიანები, რომელთა საქმიანობა უაღრესად საპასუხისმგებლოა და რთული. ისინი ზოგჯერ თითქოს ჩრდილში დგანან.
გურიის რეგიონს, კერძოდ ლანჩხუთის მუნიციპალიტეტს ჰყავს უაღრესად პრინციპული, თავისი საქმის პროფესიონალი გამგებელი ბატონი ზაზა ურუშაძე.
შარშან და წელს (როგორც ამ რაიონის გულშემატკივარი) განსაკუთრებულად ვადევნებდი თვალს ინფრასტრუქტურულ სამუშაოებს სოფლებში.
ლანჩხუთის რაიონის სხვა სოფლებთან ერთად ჩემ სოფელშიც, კერძოდ სუფსა-ახალსოფელში გაკეთდა კოლოსალური სამუშაოები.
კომუნისტების დროს გაკეთებული, შემდეგ ჩაშლილი ყველა სადრენაჟე არხი აღდგენილი და გაწმენდილია.
აღდგენილია გადასასვლელი ხიდები. იქ, სადაც გლეხს ურმითაც ძლივს გამოჰქონდა მოსავალი, ახლა მანქანით შეიძლება გამოტანა!
მუდმივად დატბორილ სიმინდის ნათესებსაც ეშველათ, ის გონივრულად და ხარისხიანადაა გაკეთებული.
აღდგენილია ნათესების დასაცავად შეკიდული ჭიშკრები. იყო შემთხვევები, ზოგჯერ რკინიგზის ნაწილიც იტბორებოდა, ეს პრობლემაც მოხსნილია.
ამ ყველაფერს ხომ დანახვა უნდა? სულ საყვედურები რა საჭიროა. ამიტომ გამიჩნდა სურვილი ახალი მინისტრისთვის, ბატონ დავით შავლიაშვილისთვის წერილობით გადმომეცა მადლობის ბარათი.
დიდი მადლობა, ბატონო მინისტრო!
მადლობა ამ პროექტების ავტორებს!
მადლობა თითოეულ მუშას, გლეხს, რომლებმაც უამინდობის პირობებშიც დიდი შრომა გასწიეს ამ კეთილშობილურ საქმეში.
განსაკუთრებული მადლობა ლანჩხუთის მუნიციპალიტეტის გამგებელს, სწორედ მისი დამსახურებაა დროულად სამუშაოების დამთავრება მანამ, სანამ ხვნა-თესვა დაიწყებოდა.
ღმერთმა უმრავლოს სრულიად საქართველოს ასეთი გამგებლები!
უდიდესი მადლიერებითა და პატივისცემით,
იათამზე ტუღუში, პენსიონერი, ფსიქოლოგი, სენსორული დიაგნოსტიკის სპეციალისტი
(R)
