ტელეკომპანია GDS -ის გადაცემა "20/30"-ის ქუდის თანმხლები მუსიკა, როგორც "გურია ნიუსმა" გაარკვია, ახალგაზრდა მუსიკოსის, ალექს არკოლეოს შექმნილია _ მუსიკის სახელწოდებაა "Quiet Rise".
ინფორმაცია ამის შესახებ სპეციალურ მუსიკალურ საიტზე us.audionetwork.com-ზეა განთავსებული. ამავე საიტიდან ირკვევა, რომ მუსიკის გამოყენება ფასიანია _ იმისთვის, რომ ერთმა კონკრეტულმა ტელევიზიამ ეს მუსიკა გამოიყენოს, 695 დოლარი უნდა გადაიხადოს. განსხვავებულია ფასები მუსიკის სხვადასხვა სახით გამოყენებისას: გადაცემაში ერთხელ ან დისკზე ჩაწერილ ფილმში _ 195 დოლარი, სახლისთვის და სტუდენტებისთვის _ 1.25 დოლარი.
"გურია ნიუსი" დაუკავშირდა კვირის "20/30"-ის წამყვან არჩილ გამზარდიას, რომელიც ამბობს, რომ ინფორმაცია იმის შესახებ, ნაყიდია თუ არა მუსიკა, ნამდვილად არ აქვს.
ჩვენ დავუკავშირდით გადაცემის პროდიუსერ ვასილ მაღლაფერიძესაც, რომელსაც ასევე არ აქვს აღნიშნულთან დაკავშირებით ინფორმაცია: _ მე მოვისმინე მუსიკა და მომეწონა. ნაყიდია თუ არა ის, ვერ გეტყვით.
როგორც მაღლაფერიძემ გვითხრა, ამ საკითხით არ დაინტერესებულა, თუმცა აქვე დასძენს, რომ თუ მუსიკა ტელეკომპანიის შექმნილი არაა, მაშინ ის ყველანაირი კანონის დაცვით იქნება შეძენილი.
როგორც მან "გურია ნიუსს" უთხრა, დღის ბოლომდე შეეცდება საკითხის გარკვევას.
როგორც კი გადაცემა "20/30"-ის შემოქმედებითი ჯგუფი მოგვაწვდის ინფორმაციას, ჩვენ მას დაუყოვნებლივ გამოვაქვეყნებთ.
"20/30"-ის ქუდი
