_ სკოლამდელი სააღმზრდელო დაწესებულებების ხარჯები გათვალისწინებულია 435 000 ლარით, ხოლო სპორტულ-კულტურული და ასე შემდეგ ღონისძიებებისთვის ჩვენ ვითვალისწინებთ 690 000 ლარს. ეს, ფაქტობრივად, ბიუჯეტის ნახევარია _ მილიონზე გვაქვს საუბარი. როგორ ფიქრობთ, ეს მილიონი ლარი, რომელიც იხარჯება, აი ამ სფეროებში, მიზანმიმართულია? რამდენად ნორმალურია ამ მილიონის ამ კუთხით დახარჯვა იმ ბიუჯეტიდან გამომდინარე, რაც ჩოხატაურს გააჩნია? იმ შემთხვევაში, როდესაც გვაქვს კატასტროფული მდგომარეობა ჯანმრთელობასთან დაკავშირებით. იქნებ, ის გამოგვეკვლია, რატომ არის ონკოლოგიური დაავადებების ყველაზე დიდი მაჩვენებელი ჩოხატაურში? ასევე მაინტერესებს ის 178 000 ლარი, რომელიც არის კულტურის სამსახურისთვის გამოყოფილი. რამდენად მიგაჩნიათ ეს რეალურად, იმიტომ, რომ, ფაქტობრივად, ეს თანხა არის სახელფასო თანხა? ამის იქეთ, ყოველ შემთხვევაში ჩვენს სფეროს არაფერი არ რჩება, რომ ვიმუშაოთ. ასეა თითქმის ყველა სამსახურში, რომელსაც აქვს რაღაც კონკრეტული თანხა გამოყოფილი _ ეს თანხები იხარჯება სახელფასო ფონდში. მე გთავაზობთ _ “მეტი ხარისხი და ნაკლები თანამშრომელი”, ჩემის ჩათვლით. შტატების შემცირება აუცილებელია. მე პირადად 200 ლარს მაძლევს სახელმწიფო და ამ თანხის სარგებელს ვერაფერს ვერ გაძლევთ. დიდი ბოდიში, მაგრამ ეს ასეა და ეს ყველაფერი თავის მოტყუებაა. ბიუჯეტის ფულს ჩვენ ვხარჯავთ ედიშერისნაირ ხალხზე მხოლოდ იმიტომ, რომ ხელფასი წაიღოს სახლში? ხელფასი ღმერთმა ყველას შეარგოს და ყველას სჭირდება, მაგრამ თქვენ რას იღებთ სამაგიეროდ? ხომ არ არის ეს გადაყრილი თანხა? _ თქვა ღამბაშიძემ ბიუჯეტის საჯარო განხილვაზე.
სხდომის დასრულებიდან მეორე დღესვე, გავრცელდა ინფორმაცია რომ ღაბაშიძეს ამ განცხადების გამო, შესაძლოა, სამსახური დაატოვებინონ. უფრო მეტიც, როგორც ჩვენი კონფიდენციალური წყარო ამბობს, საკრებულოს თავმჯდომარეს, ანტონ ხუნდაძეს დიდი ხანია, ღამბაშიძის “მოცილება” სურს და სწორედ აღნიშნული განცხადება დაედება საფუძვლად მის სახლში გაშვებას:
_ არც თუ დიდი ხნის წინ, გამგეობასთან ედიშერ ღამბაშიძესა და ანტონ ხუნდაძეს შორის დაპირისპირება მოხდა. სიტყვიერი შელაპარაკება ხელის შეხებით დასრულდა _ ღამბაშიძემ ანტონ ხუნდაძეს ხელიც კი გაარტყა. ვერ გეტყვით, რა მიზეზით “გადაყლაპა” ხუნდაძემ ეს, მით უმეტეს რომ ამ ინციდენტს ძალიან ბევრი ადამიანი შეესწრო, მაგრამ როგორც ვიცი, საჯარო განხილვაზე გაკეთებული განცხადების გამო, ხუნდაძემ ედიშერის სახლში გაშვების აუცილებლობაზე ზემდგომთანაც კი ისაუბრა. ისიც შემიძლია გითხრათ, რომ სხდომის დასრულების შემდეგ, ღამბაშიძეს მის უშუალო ხელმძღვანელთან საკმაოდ დაძაბული საუბარი ჰქონდა და სწორედ იქ გაჟღერდა პირველად მისი სახლში გაშვების საკითხი, _ ამბობს ჩვენი წყარო.
ამ ფაქტების გადასამოწმებლად ჩვენ ედიშერ ღამბაშიძეს შევხვდით. ჩვენთან საუბრისას, იგი ისეთი პრინციპული აღარ იყო, როგორც ბიუჯეტის საჯარო განხილვის დროს, რამაც ჩვენი წყაროს ინფორმაცია, რომ მას სამსახურიდან გაშვებას აპირებენ, კიდევ უფრო გაამყარა.
_ ბატონო ედიშერ, ბიუჯეტის საჯარო განხილვაზე აღნიშნეთ, რომ კულტურის სფეროში მუშაობის ცუდი ხარისხია და შტატების შემცირების აუცილებლობაზე გააკეთეთ აქცენტი. იქნებ, უფრო დააკონკრეტოთ რას გულისხმობთ ცუდ ხარისხში?
_ ხარისხი არ გვაქვს ცუდი(?!), თუმცა, ყველაფერს ახლავს თავისი ხარვეზები. მე, როგორც კულტურის სამსახურის წარმომადგენელი, გეტყვით, რომ რასაც ვუყურებ ჩემს თანამშრომლებთან ერთად წლის განმავლობაში, თუ რა ღონისძიებები კეთდება და ა.შ, შესაძლებელია, უფრო მეტი მუშაობით უფრო სერიოზულ რაღაცას მივაღწიოთ.
_ თქვენ თქვით, რომ გამოყოფილი თანხა არის დიდი, შედეგი კი მცირეა.
_ მაქსიმალურად საჭიროა გამოიძებნოს თანხა იმისთვის, რომ ყველა ანსამბლს მიეცეს საშუალება, რაიონის გარეთ ჩაატაროს კონცერტები, დაიბეჭდოს მოკლე ბუკლეტები მათ შესახებ, გავიდეთ მუნიციპალიტეტის გარეთ, დავანახოთ იმერეთს, სამეგრელოს როგორ ვმუშაობთ. ვფიქრობ, რომ ბიუჯეტში ხელფასების გარდა, უნდა გამოიყოს სამოძრაო, სამუშაო ფული.
_ საჯარო სამსახურის წარმომადგენლისგან მსგავსი განცხადება პირველი პრეცედენტია. გაბერილ შტატებზე დიდი ხანია საუბრობს მედია, ოპოზიცია, რიგითი მოქალაქეები. ფიქრობთ თუ არა, რომ იგივე კულტურის ცენტრში დასაქმებულები არიან ისეთი ადამიანები, რომლებიც მოვალეობას ან, არ ვერ ასრულებენ?
_ გურია და ჩოხატაური ისეთი კუთხეა, რომ აქ შეიძლება 50 კაცი კი არა, სამასი კაცი მუშაობდეს კულტურაში. საკმაოდ დიდი პოტენციალი გვაქვს. ამ შემთხვევაში მე არ ვსაუბრობ იმაზე, რომ შტატები გაბერილია.
_ თუმცა, ბიუჯეტის საჯარო განხილვაზე ეს გარკვევით თქვით.
_ არა (?!).
_ ჩვენ ამის ვიდეო ჩანაწერი გაგვაჩნია. საინტერესოა, რატომ იცვლით ორი დღის წინ საჯაროდ დაფიქსირებულ პოზიციას? როგორც გვითხრეს, ამ ხმაურიანი განცხადების შემდეგ სერიოზული საყვედურები მიიღეთ ხელმძღვანელობისგან. ეს ხომ არ არის პოზიციის შეცვლის მიზეზი?
_ მე ვერანაირ საყვედურს ვერ მეტყვის ვერავინ იმის გამო, რომ ვამბობ ელემენტარულ რაღაცას _ ადამიანი, რომელიც სამსახურში აკეთებს საქმეს და გასამრჯელოს იღებს, ამ გასამრჯელოდან გამომდინარე, უნდა იყოს პასუხისმგებელი სახელმწიფოს და ხელმძღვანელობის წინაშე. მე ბავშვთა საკითხების სპეციალისტი ვარ. ძალიან დიდი სურვილი მაქვს, რომ ვიმუშაო ბავშვებთან, მაგრამ ეს ბავშვები ჩოხატაურის გარდა, ცხოვრობენ ნაბეღლავში, ქვაბღაში, ზოტში, სამებაში და ასე შემდეგ. ამას სჭირდება სიარული, მოძიება, ბავშვებთან ახლო ურთიერთობა, რომლის საშუალებაც არ გვაქვს, რადგან არ გვრჩება თანხა, რაც მუშაობაში დაგვეხმარება, _ აღნიშნა ღამბაშიძემ.
მისივე თქმით საკუთარი თავისგან მაქსიმალურს მოითხოვს და ამიტომაც არის კრიტიკული სხვების მიმართ. ღამბაშიძე ამბობს, რომ კულტურის ცენტრის აკეთებს იმას, რაც ამ ეტაპისთვის შესაძლებელია:
_ უფრო მეტის გასაკეთებლად უფრო მეტი თანხაა საჭირო. მე მივესალმები გამგებლის გადაწყვეტილებას იმის შესახებ, რომ მოსწავლე ახალგაზრდობის სახლი გამოიყოს ცალკე. ჩემთვის ყოველ შემთხვევაში ეს ძალიან ბევრ რაღაცას ნიშნავს. ჩნდება კიდევ ერთი სერიოზული ადგილი, სადაც მარტო შენობის ფუნქციას არ შესრულდება.
_ გინდათ თქვათ, რომ მოსწავლე ახალგაზრდობის სახლი, ამდენ ხანს მხოლოდ შენობის ფუნქციას ასრულებდა?
_ რამდენადაც ვიცი, 15 000 ლარი იყო მოსწავლე ახალგაზრდობის სახლისთვის გამოყოფილი, რომელიც მთლიანად იხარჯებოდა ხელფასებში. ხელფასი კარგია, მაგრამ მთავარია საქმის გაკეთება. თუკი ბიუჯეტი არ იქნება ისე გაწერილი, რომ კონკრეტულ საქმეს _ ღონისძიებების ჩატარებას, ბავშვებთან ურთიერთობას მოხმარდეს, ისე არაფერი გამოვა.
_ გასაგებია, რომ ფული მხოლოდ ხელფასებზე იხარჯება და საქმე არ კეთდება. რამდენად ფიქრობთ, რომ ეს ყველაფერი არჩევნებს უკავშირდება და ხელფასებზე გაწერილი ბიუჯეტი მხოლოდ იმას ემსახურება, დასაქმებულებმა ხმა მმართველ გუნდს მისცენ. მარტივად რომ ვთქვათ, ხელისუფლება თქვენს ხმებს ყიდულობს?
_ მე ვერავინ ვერ გადამიხდის ფულს იმისთვის, რომ მხოლოდ და მხოლოდ არჩევნებში მივცე ხმა. მე ვარ პასუხისმგებელი სახელმწიფოს წინაშე გამომდინარე იქიდან, რომ ვარ სახელმწიფო მოხელე (საჯარო მოხელე სახელმწიფოს კი არა, ხალხის წინაშე უნდა იყოს პასუხისმგებელი, რადგან ხელფასს ხალხისგან აკრეფილი გადასახადებისგან იღებს. ავტ).
_ მისცემ ხმას ამ ხელისუფლებას იმ კონკრეტული განცხადებების, უკმაყოფილების შემდეგ, რაზეც აქცენტი ბიუჯეტის საჯარო განხილვაზე გააკეთეთ?
_ მე უნდა ვიყო უსინდისო და მართლა თავზე ხელაღებული ადამიანი, რომ ვერ დავინახო ის, რაც ქვეყანაში კეთდება.
_ თუმცა?
_ თუმცა, არაფერი. მაგრამ ბუნებრივია, რომ საკმაოდ დიდი ფიქრის შემდეგ, შეიძლება გაგიჩნდეს რაღაც პროტესტის გრძნობა საკუთარი ოჯახის წინაშეც კი.
_ როდესაც აღნიშნული განცხადება გააკეთეთ, ჩვენთან პირად საუბრებში ჩინოსნებმა აღნიშნეს, რომ თქვენ ხართ ის პიროვნება, რომელიც მუზეუმის დირექტორი იყო, შემდეგ დააკავეს, საპროცესოთი გამოუშვეს და მაინც დაასაქმეს. შესაბამისად, თქვენგან ხმამაღალი განცხადება, რომ არ გვაქვს მუშაობის ხარისხი და ბიუჯეტი არამიზნობრივად არის გაწერილი, აღიქვეს, როგორც ერთ-ერთი ოპონენტის სიტყვები და აღნიშნეს, რომ ამის გამო სამართლიანი იქნება, თუკი გაგათავისუფლებენ. უფრო მეტიც, როგორც გვითხრეს, საჯარო განხილვის დასრულებისთანავე, ეს ერთ-ერთ კაბინეტშიც შეგახსენეს კიდეც. ამ ყველაფრის შემდეგ კი იცვლით პოზიციას, რაც ბუნებრივია, ეჭვებს ბადებს…
_ ედიშერი გუშინ და გუშინწინ არ გამოსულა არც ჩოხატაურში, არც საქართველოში და არც მის ფარგლებს გარეთ. ედიშერს დიდი ხანია იცნობენ და იციან, ვინც არის. როგორც ამბობენ, მე ჩოხატაურის სახე ვარ(?!) და ეს არ არის ის, რომ ვიღაცამ მახსენოს, გუშინ და გუშინწინ რა გავაკეთე. მე ვარ პასუხისმგებელი ჩემს საქციელზე დღეს. გუშინწინ თუ რაღაც გავაკეთე, შეიძლება, რაღაც მივიღე. დამსახურებულად თუ დაუმსახურებლად, ეს სხვა საკითხია და არ მგონია, დღ
ოკვეთილად მხარს ვუჭერ იმ გუნდს, რომელ გუნდთან ერთადაც სამსახურში ვარ. მე მხარს ვუჭერ გამგებელს, ქალბატონს, რომელსაც გვერდში უნდა დავუდგეთ სუყველა, რომ ერთხელ და სამუდამოდ გაკეთდეს ჩოხატაურში ხარისხიანი საქმე.
_ როგორც ვიცით, თქვენ ცოტა ხნის წინ სერიოზული დაპირისპირება გქონდათ საკრებულოს თავმჯდომარესთან, ანტონ ხუნდაძესთან. უფრო მეტიც, ეს დაპირისპირება გამგეობის წინ სიტყვიერი შელაპარაკებით დაიწყო და, როგორც გვითხრეს, თქვენ ხუნდაძეს ხელიც კი დაარტყით. ჩვენი წყაროს თქმით, ამ დაპირისპირების მიზეზი ხუნდაძის თქვენი სამსახურიდან დათხოვნის სურვილი იყო. იქნებ, უფრო დეტალურად ისაუბროთ ამ ფაქტის შესახებ?
_ მოდით, ეს თემა დახურულად ჩავთვალოთ, რადგან მე უკვე დავხურე.
_ რატომ უნდა დავხუროთ თემა, რომელიც საზოგადოებას აინტერესებს? მით უმეტეს, საქმე ეხება რაიონის პირველი პირის და თანამშრომლის ღია, საკმაოდ სერიოზულ დაპირისპირებას?
_ ეს იყო ჩვეულებრივი საუბარი კაცებს შორის.
_ და ეს ჩვეულებრივი საუბარი, საჯარო პირებს შორის ხელის შეხებით დასრულდა გამგეობის წინ, მოწმეების თანდასწრებით?
_ მოდით, ნუ გავიხსენებთ ისეთ რაღაცეებს, რომელიც მე არ მახსოვს.
_ რატომ არ გახსოვთ? ჩვენ ვიცით, რომ სწორედ თქვენი დასაქმების გამო მოხდა ეს დაპირისპირება…
_ მე მაშინ საჯარო მოხელე ვიყავი და ვმუშაობდი.
_ და საკრებულოს თავმჯდომარე თქვენს გაშვებას აპირებდა…
_ არა.
_ მაშინ, განმარტეთ…
_ ჭორები არ მაინტერესებს.
_ ეს ხომ ფაქტია?
_ მოხდა მამაკაცებს შორის ჩვეულებრივი შელაპარაკება, რომელიც შეიძლება, დღეს ჩემს მეგობრებთანაც მომივიდეს…
_ ამბობენ, რომ ხუნდაძე ამის შემდეგ მიზანმიმართულად ცდილობს თქვენს მოცილებას და თქვენი საჯარო განცხადების შემდეგ, ეს საკითხი ზემდგომებთანაც დააყენა…
_ ჩემს მოცილებას ვერავინ ვერ შეძლებს ადვილად. მე ამის მცდელობა არ მიგრძვნია და რომ მეგრძნო, ამას არ გავატარებდი ჩვეულებრივად, _ გვითხრა ღამბაშიძემ და ამ თემაზე საუბრის გაგრძელება იმ მიზეზით აღარ ისურვა, რომ კულტურის ცენტრის საანგარიშო კონცერტის მომზადებაში იყო გადართული და სხვა რამეებზე ფიქრისთვის არ ეცალა.
“გურია ნიუსთან” საუბრისას ანტონ ხუნდაძე ამბობს, რომ ღამბაშიძის სამსახურიდან გათავისუფლების საკითხი მასთან არ განიხილება. იგი ღამბაშიძესთან დაპირისპირებასაც უარყოფს და ამბობს, რომ ეს ყველაფერი ჩვენი “სიზმრების” შედეგია:
_ ედიშერის გათავისუფლების საკითხი ჩემთან არ განიხილება. დანარჩენი შეგიძლიათ გამგებელს ჰკითხოთ (კანონის თანახმად, არასამეწარმეო იურიდიული პირები არა გამგებლის, არამედ საკრებულოს თავმჯდომარის დაქვემდებარებაში არიან. ავტ) და კიდევ, მას ჰყავს ხელმძღვანელი და თუ თუ ვინმეს სახლში წასვლა უნდა, ხელმძღვანელი გადაწყვეტს.
_ ბატონო ანტონ, როგორც ამბობენ, ედიშერ ღამბაშიძის გათავისუფლება თქვენ დიდი ხანია გინდათ. როგორც ჩვენი წყარო ამბობს, თქვენს შორის გამგეობის წინ დაწყებული სიტყვიერი დაპირისპირება ფიზიკურ შეურაცხყოფაში გადაიზარდა. შესაბამისად, მას შემდეგ რაც ღამბაშიძემ საჯარო განხილვაზე განაცხადა, რომ ბიუჯეტი არამიზნობრივია, თქვენ ზემდგომთან მისი სახლში გაშვების აუცილებლობაზეც ისაუბრეთ.
_ ტყუილია. არანაირი დაპირისპირება არ მომხდარა.
_ ღამბაშიძემ ეს ფაქტი დაადასტურა.
_ არ ყოფილა არაფერი. როგორც ჩანს, თქვენ ახალ-ახალ სიზმრებს ნახულობთ.
_ რა შუაშია სიზმრები, კონფლიქტის მონაწილემ დაადასტურა, რომ მსგავს ფაქტს ადგილი ჰქონდა.
_ არ ვიცი, არ გამიგია მასეთი რამ. მე არ ვარ შეხებაში მასეთ რაღაცეებთან, _ აღნიშნა ხუნდაძემ.
ჩოხატაურის მუნიციპალიტეტის გამგებლის, ლელა იმედაშვილის განმარტებით, ღამბაშიძის სამსახურიდან გათავისუფლების საკითხი არ განხილულა. მისივე თქმით, ყველას აქვს უფლება, საკუთარი აზრი გამოთქვას და ამის გამო სამსახურიდან მათ არავინ გაათავისუფლებს. ჩოხატაურის მუნიციპალიტეტის კულტურის ცენტრის დირექტორი, თამარ კეკელიძე, რომელიც ღამბაშიძის უშუალო უფროსია, ამბობს, რომ თანამშრომლისთვის, ბიუჯეტის განხილვის შემდეგ არც საყვედური უთქვამს და მით უმეტეს არ სამსახურიდან გათავისუფლების შესახებ უსაუბრია:
_ მე არ ვიცი, ვინ გაწოდებთ მსგავს ინფორმაციას, მაგრამ გარწმუნებთ, რომ ღამბაშიძეს სამსახურიდან არავინ უშვებს. მას აქვს ძალიან ბევრი საქმე, რომელიც უნდა გააკეთოს და აკეთებს კიდეც. არც საყვედური მითქვამს მისთვის და არც ხმამაღალი საუბარი ყოფილა. კულტურის ცენტრს ძალიან ბევრი საქმე აქვს და ყველა თანამშრომელი ამ საქმის კეთებაშია ჩართული, _ გვითხრა კეკელიძემ.
