საქართველოს ფინანსთა სამინისტრომ EBRD-ის ყოველწლიური შეხვედრისა და ბიზნესფორუმის ორგანიზებისთვის სახელმწიფო ბიუჯეტიდან ამ დროისთვის გაწეული ხარჯები გამოაქვეყნა, რომელსაც "გურია ნიუსი" უცვლელად გთავაზობთ:
"პარლამენტის ეზოში შენდება 4 დროებითი ნაგებობა. აღნიშნული სამუშაოების მთლიანი ღირებულება შეადგენს – 2,607,464 ლარს. ესაა კონსტრუქციის ტიპის ნაგებობები, რომლებიც რჩება სახელმწიფოს საკუთრებაში და შესაძლებელი იქნება მათი გამოყენება ამ ტიპის საერთაშორისო თუ სხვა მნიშვნელოვანი და მასშტაბური ღონისძიებებისთვის, რის შესაძლებლობაც ქვეყანას აქამდე არ ჰქონდა.
მოსწავლე-ახალგაზრდობის სასახლეს ჩაუტარდება სარემონტო სამუშაოები. მოხდება შენობის განახლება, კეთილმოწყობა. ამ სამუშაოების მთლიანი ღირებულება შეადგენს – 255,487 ლარს.
როგორც მინიმუმ, 25 წელია ამ ისტორიულ შენობაში არაფერი გაკეთებულა. ამჟამად კეთება სველი წერტილები, რომელიც სავალალო მდგომარეობაში იყო, ბავშვებს უკეთდებათ საცეკვაო დარბაზი.
დელეგაციების ოფისების კომპიუტერული და საოფისე ინვენტარით აღჭურვის მთლიანი ღირებულება შეადგენს – 1,346,066 ლარს. აქ შედის კომპიუტერები, მაგიდები, სკამები და სხვა საოფისე ინვენტარი. აღნიშნული ინვენტარით უნდა აღიჭურვოს პარლამენტში დელეგაციების ოფისები, პრესცენტრის დროებითი შენობა, საკონფერენციო დროებითი შენობები. ინვენტარი ასევე რჩება სახელმწიფო საკუთრებაში.
ღონისძიების ფარგლებში 64 ქვეყნისა და საერთაშორისო ორგანიზაციების მაღალი დონის დელეგაციის წევრთა მომსახურების მიზნით შესყიდული 67 ავტომობილის, „ტოიოტა ქამრი"-ს მთლიანი ღირებულება შეადგენს – 4,718,475 ლარს.
როგორც მოგეხსენებათ, ასეთი მაღალი დონის ღონისძიების პროტოკოლის გათვალისწინებით, სტუმრების მომსახურება უნდა განხორციელდეს ბიზნეს-კლასის ავტომობილებით.
ბაზრის კვლევის შედეგად დადგინდა, რომ აღნიშნული სტანდარტის შესაბამისი ავტომობილების საზღვარგარეთიდან შემოყვანის და ქირის საფასური, სახელმწიფოს დაუჯდებოდა დაახლოებით 3 მლნ 500 ათასი ლარი, რომელიც საქართველოს ეკონომიკაშიც კი არ რჩებოდა.
შესაბამისად, ხელისუფლების გადაწყვეტილებით, მიზანშეწონილად ჩაითვალა ავტომობილების შეძენა, მათი სახელმწიფოს საკუთრებაში დატოვება და შემდგომ წლებში გამოყენება.
აღსანიშნავია, რომ აღნიშნული ავტომობილების გამოყენება გათვალისწინებულია ევროპის ახალგაზრდული ოლიმპიური ფესტივალის "თბილისი 2015" ფარგლებში.
EBRD-ის ყოველწლიური შეხვედრისა და ბიზნესფორუმისთვის:
საქართველოს პარლამენტში შეიცვლება 491 კარი, საერთო ღირებულებით – 895,919 ლარი;
მობილური სატელეფონო მომსახურების შესყიდვა – 25,000 ლარი;
სპეცკავშირების მომსახურების შესყიდვა – 1,000,000 ლარი;
საქართველოს პარლამენტში ხდება სატელეფონო სადგურებისა და ინტერნეტის ქსელური მოწყობილობების შეცვლა და გაძლიერება.
აუდიო-ვიზუალის, სინქრონული თარგმნის მომსახურების ქირის საფასური შეადგენს – 900,000 ლარს;
აღნიშნული მომსახურებით მოხდება ყოველწლიური შეხვედრისა და ბიზნესფორუმის ფარგლებში მიმდინარე ღონისძიებების პირდაპირი ტრანსლირებები და მათი უზრუნველყოფა 5 ენაზე სინქრონული თარგმანით" _ აღნიშნულია გავრცელებულ განცხადებაში.
