"ჩემს სიდედრს მეორე სიძეც ჰყავს. ისე ცნობისთვის, რა უნდა გითხრათ _ რადგან ჩემი სიდედრია, ამიტომ ამეკრძალა მისთვის აუქციონში მონაწილეობის მიღება?!" _ ასეთი კომენტარი გააკეთა "გურია ნიუსთან" წარმოშობით ოზურგეთელმა, უკვე სკანდალურმა გოჩა სალუქვაძემ ბავშვთა სტომატოლოგიური კლინიკის გაყიდვასთან დაკავშირებით.
ქალაქ ოზურგეთის ცენტრში, 9 აპრილის ქუჩაზე მდებარე ბავშვთა სტომატოლოგიური კლინიკა აუქციონის წესით იზოლდა გოცირიძემ შეიძინა.
აღსანიშნავია, რომ აუქციონი ქალაქ ოზურგეთის მერიამ ისე გამოაცხადა და ჩაატარა, რომ ამის შესახებ არა თუ საზოგადოებამ, არც კლინიკის თანამშრომლებმა და არც ქალაქ ოზურგეთის მუნიციპალიტეტის საკრებულოს დეპუტატებმაც არ იცოდნენ.
როგორც კლინიკის რამდენიმე თანამშრომელმა გვითხრა, ისინი ითხოვდნენ ქალაქ ოზურგეთის მერიისგან გარე ფასადის მოწესრიგებას, ამის შესახებ, როგორც თავად ამბობენ, მათ განცხადებითაც მიმართეს მერიას.
ქალაქ ოზურგეთის საკრებულოს დეპუტატი გოჩა ძიმისტარაშვილი, როგორც დეპუტატი და ამ ქალაქის მცხოვრები, მიიჩნევს, რომ უნდა გაუქმდეს აუქციონის შედეგები და აღდგეს ქალაქში ბავშვთა კბილის პოლიკლინიკა.
“რამდენიმე დღის წინ ჩემთვის ცნობილი გახდა, რომ აუქციონის წესით ყოფილი ბავშვთა კბილის პოლიკლინიკა შეიძინა გოჩა სალუქვაძის სიდედრმა _ იზოლდა გოცირიძემ. საზოგადოებას მინდა შევახსენო, რომ ეს სწორედ ის გოჩა სალუქვაძეა, რომელსაც ლობირებდა ქალაქ ოზურგეთის მერი ბეგლარ სიორიძე, საზოგადოებისთვის ცნობილია , რომ ერთხელ ჩაგდებული პროექტი ერთ კვირაში ისევ შემოიტანა და თავისას მიაღწია. საქმე ეხებოდა ბაზრის ტერიტორიაზე პირდაპირი მიყიდვის წესით გასაცემ ქონებას, რომელიც უნდოდა გოჩა სალუქვაძეს. მან დეპუტატებს "გამოშტერებულები" უწოდა და ამბობდა, რომ არანაირი ფული არ ჰქონდა. ბუნებრივია, ისმის ლოგიკური კითხვა _ თუ მას ფული არ აქვს, როგორ ყიდულობს 20 000 ამერიკულ დოლარად კბილის პოლიკლინიკის შენობას. არავის არ სჯერა იმის, რომ მისმა სიდედრმა, რომელიც არის პენსიონერი, 20 000 ამერიკული დოლარი გადაიხადა ამ ქონებაში. ასევე ჩნდება ლოგიკური კითხვა _ რატომ მაინც და მაინც გოჩა სალუქვაძის სიდედრმა? ქალაქის მერსა და ამ პიროვნებას შორის ინტერესები იკვეთება ხშირად. უფრო მეტიც _ გაჟღერდა ინფორმაცია, რომ კბილის სტომატოლოგიური კლინიკა გოჩა სალუქვაძის ძმამ "ვითიბი ბანკის" მმართველმა ბიძინა სალუქვაძემ იყიდა.
აღსანიშნავია, ისიც, რომ მერიაში შემოსული იყო განცხადება _ ექიმები და ექთნები ითხოვდნენ ბავშვთა კლინიკის შენარჩუნებას, იმ მოტივით, რომ ეს ერთადერთი იყო გურიის რეგიონში," _ აცხადებს გოჩა ძიმისტარაშვილი.
ქალაქ ოზურგეთის საკრებულოს დეპუტატი ნათია შარაშენიძე ამბობს, რომ სტომატოლოგიური კლინიკის გაყიდვის ამბავი მისთვის მეხის გავარდნას ჰგავდა:
"გუშინდლამდე არავინ იცოდა, როდის და ვისზე გაიყიდა ოზურგეთის ქონება, ეჭვს იწვევს ის საკითხი, რომ თუ ყველაფერი ღიად და გამჭვირვალედ ჩატარდა, რატომ იყო გასაიდუმლოებული აუქციონის დღე, რატომ არ იცოდა ამის შესახებ საზოგადოების ფართო ფენებმა და რატომ იცოდა მხოლოდ მერთან დაახლოებულმა ვიწრო წრემ? ეჭვს იწვევს ასევე ისიც, რომ ოზურგეთის ყველა ქონების გასხვისებასთან რატომ ფიგურირებს ერთი და იგივე პიროვნების სახელი და გვარი, რომელიც იმავდროულად არის ქალაქის მერთან დაახლოებული პიროვნება? ეჭვს ბადებს ბევრი საკითხი, ჩნდება ბევრი კითხვები, რომლებზეც, სამწუხაროდ პასუხი არ არის. არადა ეს კლინიკა ხომ უნიკალურია თავისი შინაარსით და შესაძლებელი იყო ამ კლინიკის ფუნქციის აღდგენა ისე, რომ თანაბრად გამოადგებოდა ოზურგეთს, მთლიანად რეგიონს და მოგებასაც მოუტანდა ქალაქს," _ა მბობს შარაშენიძე.
"ვითიბი ბანკის" მმართველი ბიძინა სალუქვაძე ამბობს, რომ არავითარი ფორმალობა არ არსებობს:
"იზოლდა გოცირიძე მუშაობდა წლების განმავლობაში აღნიშნულ პოლიკლინიკაში. არავითარი საერთო და კავშირი არ არის ჩემს ძმასთან ად იზოლდას შორის აუქციონთან დაკავშირებით," _ ამბობს ბიძინა სალუქვაძე
ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე განმარტავს, რომ საკრებულომ მერიას თანხმობა მისცა იმაზე, რომ ქალაქის ცენტრში მდებარე რამდენიმე შენობა, რომელიც ავარიულ მდგომარეობაშია და საჭიროებდა გარე ფასადის მოწესრიგებას, აუქციონის წესით გაეყიდა:
_ ერთერთი ასეთი იყო 9 აპრილის ქუჩაზე მდებარე ბავშვთა კბილის სტომატოლოგიური კლინიკა, _ამბობს კობალაძე.
ბიზნესმენი გოჩა სალუქვაძე “გურია ნიუსთან აღნიშნავს, რომ იზოლდა გოცირიძე, რომელმაც აუქციონის წესით იყიდა ბავშვთა სტომატოლოგიური კლინიკა, მისი სიდედრია, თუმცა აღნიშნულთან დაკავშირებით მას რაიმე ინტერესი არ აქვს.
"ისე, ცნობისთვის, ჩემს სიდერს მეორე სიძეც ჰყავს. რა უნდა გითხრათ? იყო დამპალი, ავარიული შენობა. ნუ მახსენებენ მე, მაქ ჩემი წილი არაფერი არ არის, რა ვქნა ახალა ჩემმა სიდედრმა იყიდა, მუშაობდა 50 წელიწადი თვითონ და მისი ქმარი, შენობა იყო დამპალი და ყველაფერი გასაკეთებელია. რა მექნა ახლა მ ე _ რახან ჩემი სიდედრია, ამეკრძალა, არ იყიდო,-მეთქი? რას აკეთებს, რა ვიცი", _ გვითხრა გოჩა სალუქვაძემ.
როდის გამოცხადდა აუქციონი 9 აპრილის ქუჩაზე მდებარე ბავშვთა სტომატოლოგიური კლინიკის გაყიდვასთან დაკავშირებით, როდის ჩატარდა იგი, რამდენი პირი იღებდა მონაწილეობას, რა ფასად იყო შეფასებული, ვინ გაიმარჯვა, სად იყო გამოცხადებული აღნიშნული აუქციონის შესახებ, ამ კითხვებზე ქალაქ ოზურგეთის მერიის პრესსამსახური ასეთ კომენტარს აკეთებს:
"9 აპრილის ქუჩაზე მდებარე ბავშვთა სტომატოლოგიური კლინიკის გაყიდვასთან დაკავშირებული აუქციონი გამოცხადდა 2015 წლის 23 თებერვალს. აღნიშნული ინფორმაცია გამოქვეყნდა ქალაქ ოზურგეთის მუნიციპალიტეტის მერიის ოფიციალურ ვებ-გვერდზე _ www.ozurgeti.gov.ge და ადგილობრივ გაზეთში "ალიონი’" (23 თებერვალი N8 (2015)
განაცხადების მიღება შეწყდა 24 მარტს, დღის 12:00-ზე. აუქციონში მონაწილეობდა ერთი პრეტენდენტი _ იზოლდა გოცირიძე, რომელიც გამარჯვებულად გამოცხადდა 24 მარტს, 14:00-ზე. ქონების საწყისი ფასი იყო 27 500 ლარი.“
