დღეს ოზურგეთის რაიონულმა სასამართომ მოქალაქე ამირან დევაძის საჩივარი განიხილა, რომლითაც ის საპატრულო პოლიციის თანამშრომლებს უჩიოდა და აღნიშნავდა, რომ 1700 ლარით უკანონოდ დააჯარიმეს.
საქმე ეხება 1 თებერვალს განვითარებულ მოვლენებს – დევაძე ნასვამ მდგომარეობაში გაჩერებულ ავტომობილთან იდგა, რომელიც გასაყიდად გამზადებული ციტრუსით იყო დატვირთული. საპატრულო პოლიციამ ის 1000 ლარით დააჯარიმა (ნასვამ მდგომარეობაში ყოფნის გამო) და ავტომობილიც საჯარიმოზე გადაიყვანა.
დევაძის განმარტებით, ვინაიდან ის ნასვამი იყო, სთხოვა თავის ახლობელს როინ ჭკუასელს, სოფელ შრომიდან თხინვალის გადასახვევამდე გადაეზიდა ციტრუსი. დევაძის თქმით, როცა ერთი რეისი ჩამიტანეს ადგილზე, ის დარჩა ციტრუსით დატვირთულ მანქანასათნ, ხოლო ჭკუასელი კი წავიდა მეორე რეისის გასაკეთებლად. სწორედ ამ დროს დააჯარიმა საპატრულო ეკიპაჟმა.
დევაძემ სასამართლოს საჩივრით 11 თებერვალს მიმართა, დღეს კი მოსამართლე ბიძინა სტურუამ მის მიერ შეტანილი საჩივარი სრულად დააკმაყოფილა და შსს ოზურგეთის საპატრულო პოლიციის პატრულ -ინსპექტორების მირზა კილაძისა და ლევან ირემაძის მიერ დაწერილი ოქმი ბათილად ცნო.
"გაუქმდეს 2015 წლის 3 მარტს ამოწერილი საპატრულო პოლიციის მიერ საჯარიმო ქვითარი, დაკმაყოფილდეს მოქალაქის ამირან დევაძის მიერ შემოტალი საჩივარი"_ აღნიშნა სასამართლო პროცესის დასრულების შემდეგ მოსამართლემ ბიძინა სტურუამ.
როგორც მან განმარტა, აღნიშნული გადაწყვეტილება ფაქტებზე დაყრდნობითა და მოწმეთა ჩვენებების საფუძველზე მიიღო.
საპატრულო პოლიციის წარმომადგენელმა, იურისტმა გურამ გალოგრემ სასამართლოზე ის ვიდეო ფირი წარმოადგინა, რომელიც მხოლოდ პატრულ-ინსპექტორისა და მოქალაქის საუბარს ასახავდა, სადაც ნათლად ჩანდა, როგორ ეუბნებოდა მოქალაქე ამირან დევაძე პატრულ – ინსპექტორებს, რომ ის იყო ნასვამ მდგომარეობაში, თუმცა საჭეს არ მართავდა, იდგა მანქანასთან ახლოს და ტელეფონზე საუბრობდა.
პატრულ – ინსპეტრორებმა, რომლებიც სასამართლო პროცესზე მოწმის სტატუსით დაიკითხნენ, აღნიშნეს, რომ ამირან დევაძე ღამით არასწორი მანევრირებით მოძრავი შენიშნეს, მათ გაუჩნდათ ეჭვი, რომ ის ნასვამი იყო და ამიტომაც გააჩერეს, რისი ამსახველი ვიდეო ჩანაწერი მათ ვერ წარმოადგინეს, რადგან მათივე თქმით იყო ტექნიკური ხარვეზი და ამ ფაქტის ჩანაწერი არ აქვთ.
"ხშირად აღნიშნავთ, რომ ტექნიკურად გაუმართავია, ხარვეზებია, ეს არ შეიძლება. არ არსებობს ფაქტი, სადაც დადასტურდება ადმინისტრაციული ორგანოს მიერ ამოწერილი ჯარიმა, რომ არის სამართლიანი. ამიტომ აღნიშნული ფაქტი არის სავარაუდო, რაც შინაგანი რწმენით მოქალაქის სასარგებლოდ უნდა გადაწყდეს" _ განმარტა მოსამართლემ.
"ამასთანავე, მინდა აღვნიშნო, რომ დაკითხული მოწმის ახსნა -განმარტებაში ვერ შევიტანე ეჭვი, რომ ის არ ამბობდა სიმართლეს, მე ვერ დავინახე მანქანის მეპატრონის როინ ჭკუასელის ტყუილი, ის ჩემი შინაგანი რწმენით სიმართლეს ამბობდა, რასაც ვერ ვიტყვი პატრულ-ინსპექტორების ახსნა-განმარტებებზე. მათ მიერ წარმოდგენილი ჩვენები არ იყო საკმარისი მათი სიმართლის დასამტკიცებლად" _ დასძინა სასამართლო პროცესის დასრულების შემდეგ სტურუამ.
სასამართლო პროცესზე იმყოფებოდა სოფელ შრომაში მცხოვრები პატრულის წარმომადგენელი, გია ცინარიძე, რომელიც საპატრულო დეპარტამენტის უფროსის დავით ცინარიძის ახლობელი და თანასოფლელია. თუმცა აღნიშნული, ჩვენთან საუბრისას არ დაადასტურა გია ცინარიძემ. მისი თქმით ის საერთოდ არ იცნობდა დავით ცინარიძეს.
სასამართლო პროცესის დასრულების შემდეგ "გურია ნიუსთან" კომენტარი არ გააკეთა საპატრულო პოლიციის დეპარტამენტის იურისტმა გურამ გალოგრემ.
მოქალაქე ამირან დევაძემ კი სასამართლოს ღირსეული გადაწყვეტილების მიღების გამო, მადლობა გადაუხადა.
"ვარ ოთხი შვილის მამა, ერთი მშრომელი, პატიოსანი, გაჭირვებული ოჯახის მქონე. მქონდა იმედი რომ სიმართლე გაიმარჯვებდა, ბრძოლას სამართლიანობისთის ყოველთვის აქვს აზრი, მადლობა ბიძინა სტურუას" _აღნიშნა მან.
იურიდიული დახმარების სამსახურის უფროსი ია მემანიშვილი „გურია ნიუსის" მეშვეობით ყველა იმ მოქალაქეს მიმართავს, რომლებიც თვლიან რომ უკანონოდ დააჯარიმეს, მიმართონ სასამართლოს, მათ და დაამტკიცონ თავიანთი სიმართლე.
