გაძვირდება თუ არა რეგიონებში ელექტროენერგიის საფასური მიმდინარე წლის სექტემბრის დასაწყისში გახდება ცნობილი.
საქმე იმაშია, რომ "ენერგო-პრო ჯორჯიამ" საქართველოს ენერგეტიკისა და წყალმომარაგების მარეგულირებელი ეროვნულ კომისიას ტარიფის კორექტირების თხოვნით მიმართა, რის მიზეზადაც კომპანიაში ელექტროენერგიის შესყიდვის საფასური გაძვირებას ასახელებენ.
საქართველოს ენერგეტიკისა და წყალმომარაგების მარეგულირებელ ეროვნულ კომისიაში აცხადებენ, რომ "ენერგო-პრო ჯორჯიას"მიმართვის საფუძველზე დოკუმენტაციის შესწავლა უკვე დაიწყო და მათ ამისთვის 150-დღიანი ვადა 10 სექტემბრამდე აქვს.
"ენერგო-პრო ჯორჯიას" საზოგადოებასთან ურთიერთობის სამსახურის ინფორმაციით, იმდენად მოიმატა დენის ღირებულებამ, რომ უკანასკნელ თვეებში "ენერგო-პრო ჯორჯიამ" ყველა ფინანსური რესურსი გამოიყენა ამ მიმართულებით და ეს რესურსიც მთლიანად ამოიწურა.
"ამის გათვალისწინებით კომპანიამ გადაწყვიტა, რომ ტარიფის კორექტირების განცხადებით სემეკ–ს მიმართოს. "ენერგო–პრო ჯორჯიამ" ენერგეტიკისა და წყალმომარაგების მარეგულირებელი ეროვნული კომისიას წარუდგინა ყველანაირი კალკულაცია და გათვლები, თუმცა ტარიფის გადახედვასთან დაკავშირებით საბოლოო გადაწყვეტილება სემეკმა უნდა მიიღოს", _ აცხადებენ "ენეგო-პრო ჯორჯიაში".
როგორც "გურია ნიუსს" საქართველოს ენერგეტიკისა და წყალმომარაგების მარეგულირებელი ეროვნული კომისიაში განუცხადეს, შემოსული წერილობითი მოთხოვნების საფუძველზე, 23 აპრილის საჯარო სხდომაზე, დაიწყო საჯარო ადმინისტრაციული წარმოებები შპს "ჯიფაუერის"("ენერგო-პრო ჯორჯიას" შვილობილი კომპანია) ელექტროენერგიის წარმოების ტარიფისა და სს "ენერგო პრო ჯორჯიას"ელექტროენერგიის შესყიდვის ნაწილში ელექტროენერგიის მოხმარების ტარიფის კორექტირების შესახებ.
"ნორმატიული ადმინისტრაციულ-სამართლებრივი აქტების გამოცემის თაობაზე კომისიაში წარმოსადგენი მოსაზრებების ბოლო ვადად განისაზღვრა 2015 წლის 29 მაისი, ხოლო აქტის გამოცემის ბოლო ვადად შპს "ჯიფაუერისათვის"– 2015 წლის 3 სექტემბერი, ხოლო სს "ენერგო–პრო ჯორჯიასათვის"– 2015 წლის 10 სექტემბერი“, _ აღნიშნავენ სემეკში და დასძენენ, რომ საჯარო ადმინისტრაციული წარმოების დაწყების შესახებ ცნობები, თანდართული პროექტებით, განთავსდება კომისიის ვებ-გვერდზე, რომლებზეც კომისიაში წინადადებების წარმოდგენა წერილობითი ფორმით ნებისმიერ დაინტერესებულ პირს შეუძლია.
ასევე, სემეკში განმარტავენ, რომ კომისიაში შემოსულია შპს "საქართველოს საერთაშორისო ენერგეტიკული კორპორაციისა"და შპს "მტკვარი ენერგეტიკას“ წერილობითი მოთხოვნები ელექტროენერგიის წარმოების ტარიფის კორექტირების თაობაზე. აღნიშნულ საკითხებზე საჯარო ადმინისტრაციული წარმოებების დაწყების შესახებ კომისია 30 აპრილის საჯარო სხდომაზე იმსჯელებს.
საქართველოს ენერგეტიკისა და წყალმომარაგების კომპანია ასევე აქვეყნებს შპს "ჯიფაუერისა"და სს "ენერგო პრო ჯორჯიას"წერილობით მიმართვებსა და განმარტებებს ტარიფის გადახედვის მოთხოვნასთან დაკავშირებით, სადაც აღნიშნულია, რომ მიმდინარე წლის 8 აპრილს შპს "ჯიფაუერმა"საქართველოს ენერგეტიკისა და წყალმომარაგების მარეგულირებელ ეროვნულ კომისიაში წარმოადგინა წერილობითი მოთხოვნა ელექტროენერგიის წარმოების ტარიფის კორექტირების თაობაზე.
შპს "ჯიფაუიერის"განმარტებით, აშშ დოლართან მიმართებაში ეროვნული ვალუტის გაცვლითი კურსის მკვეთრი ცვლილებიდან გამომდინარე, ელექტროენერგიის წარმოების მიზნით შესასყიდი ბუნებრივი გაზის ფასი არსებითად განსხვავდება დაგეგმილი-შესასყიდი ბუნებრივი გაზის ღირებულებისაგან“.
საქართველოს ენერგეტიკისა და წყალმომარაგების მარეგულირებელი ეროვნული კომისიის 2014 წლის #14 დადგენილებით დამტკიცებული "ელექტროენერგიის წარმოების, გადაცემის, დისპეტჩერიზაციის და ელექტროენერგეტიკული ბაზრის ოპერატორის მომსახურების ტარიფების გაანგარიშების მეთოდოლოგიის" მე-20 მუხლის 12 პუნქტის მიხედვით, კომისია უფლებამოსილია გარანტირებული სიმძლავრის წყაროს ელექტროენერგიის წარმოებისათვის საჭირო ბუნებრივი გაზის შესყიდვის დაგეგმილი ფასის სავალუტო კურსის და სათბობის ხვედრითი ხარჯის მაჩვენებლის არსებითი ცვლილების შემთხვევაში, განახორციელოს სატარიფო წლისათვის დადგენილი გარანტირებული სიმძლავრის წყაროს ელექტროენერგიის წარმოების ტარიფის ერთხელ კორექტირება.
რაც შეეხება სს "ენერგო პრო ჯორჯიას", სემეკის ინფორმაციით, კომისიაში წერილი მან მიმდინარე წლის 15 აპრილს წარადგინა, რომლითაც მოითხოვა ელექტროენერგიის შესყიდვის ნაწილში მოხმარების ტარიფის კორექტირება.
სს "ენერგო პრო ჯორჯიას"განმარტების შესაბამისად, კომპანიას გაუჩნდა ფულადი სახსრების დეფიციტი, რაც გამოწვეულია ელექტროენერგიის შესყიდვის ღირებულების ზრდით. შესასყიდი ელექტროენერგიის ღირებულების ზრდაზე გავლენა იქონია იმპორტირებული ელექტროენერგიის ღირებულების ზრდამ, ასევე ელექტროენერგიის გადაცემის ტარიფის ცვლილებამ.
"საქართველოს ენერგეტიკისა და წყალმომარაგების მარეგულირებელი ეროვნული კომისიის 2014 წლის 30 ივლისის #14 დადგენილებით დამტკიცებული "ელექტროენერგიის განაწილების, გატარების და მოხმარების ტარიფების გაანგარიშების მეთოდოლოგიის 23-ე მუხლის მე-4 პუნქტის შესაბამისად, კომისია უფლებამოსილია სს "ენერგო პრო ჯორჯიას"ელექტროენერგიის მოხმარების ტარიფის კორექტირება განახორციელოს სატარიფო წლის განმავლობაში ერთხელ“, _ აცხადებენ სემეკში.
