აღნიშნული განცხადება ქალაქ ოზურგეთის მუნიციპალიტეტის საკრებულოს დეპუტატმა თამარ ნადირიძემ, საკრებულოს სხდომის დასრულების შემდეგ გამართულ ბრიფინგზე გააკეთა.
საქმე ეხება საკრებულოს სხდომაზე მერიის მიერ გატანილ საკითხს, რომელიც ორი ა.ი.პ.ი-ს გაერთიანებას გულისხმობს.
ქალაქ ოზურგეთის მუნიციპალიტეტის საკრებულოს მორიგ სხდომაზე, დღის წესრიგით გათვალისწინებული ექვსი საკითხი დაამტკიცეს.
პირველი საკითხი ფრაქცია "ოზურგეთი ჩემი ქალაქია" შექმნას შეეხებოდა, მასში დეპუტატები ნანული ორაგველიძე, ნინო ტაბატაძე და ირინა საჯაია გაერთიანდნენ. ხმაური გამოიწვია მეექვსე საკითხმა, სადაც ქალაქის მერია ა.ი.პ.ი -ების ოზურგეთის მუნიციპალური კულტურის ცენტრისა და მოსწავლე ახალგაზრდობის სახლის რეორგანიზაციის დაწყების შესახებ თანხმობას ითხოვდა.
აღნიშნულ საკითხთან დაკავშირებით ქალაქ ოზურგეთის მერიის კულტურის სამსახურის უფროსმა, მარინა ჯაფარიძემ ისაუბრა. მისი განმარტებით, ორი ა.ი.პ. ის გაერთიანება უკეთესს პირობებს შექმნის კულტურის განვითარებისთვის.
"მთავარი აქცენტი ამ ორი დაწესებულების გაერთიანებისა გახლავთ ის მოტივი, რომ სამი თაობა ერთიანდება, სამივე ასაკობრივი ჯგუფი იქნება ერთ სივრცეში მოთავსებული. აქცენტს ვაკეთებთ იმაზე, რომ ხარისხი იყოს უკეთესი კულტურის განვითარების კუთხით. გაერთიანებულ ორგანიზაციას ექნება ერთიანი მენეჯმენტი, გაუმჯობესდება პირობები, განთავსდება კინოს შენობის რეაბილიტაციის შემდეგ მეორე სართულზე, შენობის ინფრასტრუქტურის კუთხით მოწესრიგების შემდეგ, თანამშრომლებს ექნებათ მუშაობის ნორმალური პირობები."
მარინა ჯარაფიძეს კითხვით მიმართა საკრებულოს დეპუტატმა თამარ ნადირიძემ. მისი თქმით საინტერესოა, ამ საკითხთან დაკავშირებით იღებდა თუ არა პასუხისმგებლობას მერიის კულტურის სამსახურის უფროსი, რაზეც ჯაფარიძემ უპასუხა, რომ ის კულტურის მიმართულებით უკეთესს ხარისხზე საუბრობს.
საკრებულოს სხდომაზე ფრაქცია "ოზურგეთის მომავლისათვის" თავმჯდომარე ლევან მგელაძემ და წევრმა თამარ ნადირიძემ პროტესტი გამოთქვეს მოსწავლე ახალგაზრდობის სახლისა და კულტურის ცენტრის გაერთიანებასთან დაკავშირებით და განმარტეს, რომ მოსწავლე ახალგაზრდობის სახლი არის ტრადიციებისა და ისტორიის მქონე, რომლის გაუქმებაც ოზურგეთის ისტორიის წაშლას ნიშნავს.
კულტურის სამსახურის უფროს მარინა ჯაფარიძის თქმით, ამით ტრადიციები არ ირღვევა.
საკრებულოს დამოუკიდებელმა დეპუტატმა გოჩა მგელაძემ აღნიშნა, რომ საქართველოში 37 ქალაქში არის მოსწავლე ახალგაზრდობის სახლი და გამონაკლისი რატომ არის ოზურგეთის, სადაც ფაქტიურად უქმდება ეს ორგანიზაცია?
"37 ქალაქი ცდება და ჩვენ უფრო კარგ ჭკუაზე ვართ? ნუ დავარღვევთ ტრადიციებს", – განაცხადა მგელაძემ.
ქალაქ ოზურგეთის მერმა ბეგლარ სიორიძემ საკრებულოზე აღნიშნულ საკითხთან დაკავშირებით განმარტა, რომ ორი ა.ი.პ.ი.ს გაერთიანებით დაახლოებით 40 000 ლარის ეკონომია მოხდა. მისი თქმით, შტატები არის ხელოვნურად გაბერილი და აუცილებლად შესამცირებელია.
"საინტერესო იცით რა არის? როგორც კი ამ ქალაქში რაიმე შენდება თუ კეთდება, იმ წუთში წინააღმდეგობას უწევთ, როგორც კი რაიმე საკითხის მიმართ ეფექტური ნაბიჯი გადაიდგმება, თუნდაც ახლა, იმ წუთს წინააღმდეგობას ვაწყდებით. აბა, გიხსნით გარკვევით, რომ ა.ი.პ.ი.- ების გაერთიანებით სადღაც 40 000 ლარის ეკონომიას მივიღებთ, ჯერ მივიღოთ თანხმობა, დავიწყოთ რეორგანიზაცია, მუშაობას, რომ დავასრულებთ გაჩვენებთ შემდეგ რა ეფექტიც ექნება. ისე ჩემზე მეტი მტკივნეული იქნება ვინმესთვის , ამ ქალაქში ორი ა.ი.პ.ის რეორგანიზაცია? და ფიქრობთ რაზე ვსაუბრობთ საერთოდ? ასე არ გამოვა, თუ გვინდა ქვეყნის აშენება, უნდა წავიდეს რაღაცაზე, უნდა გავანაწყენოთ ვიღაცა, სხვანაირად ვერ მოხერხდება, მე მაწუხებს პირველ რიგში ეს, მგელი და კრავი კი არ არის რომ შეჭამოს კულტურის ცენტრმა ახალგაზრდობის სახლი? ნუ მასწავლით ყველაფერში ჭკუას, ბრძანეთ თქვენი აზრი და დაასრულეთ როგორმე!"-აღნიშნა სიორიძემ.
რაზეც თამარ ნადირიძემ მიმართა:"რატომ გვიკრძალავთ სიტყვის ამოღებას?"
სხდომის დასრულებისას საკრებულოს თავმჯდომარე გელა კობალაძემ აღნიშნა, რომ რეორგანიზაციაზე თანხმობის მიცემა არ ნიშნავს, იმას, რომ ეს პროცესი დასრულდება, მისი განმარტებით იქნება კონსულტაციები ორივე აიპთან, იქნება პლუსება და მინუსებზე საუბარი და შემდეგ მიიღებენ გადაწყვეტილებას, გაერთიანდეს ეს აიპები თუ არა.
საკრებულოს სხდომის დასრულების შემდეგ ბრიფინგი გამართეს ფრაქცია "ოზურგეთის მომავლისათვის" თავმჯდომარე ლევან მგელაძემ და წევრმა თამარ ნადირიძემ:
მათ ჟურნალისტებს კიდევ ერთხელ განუმარტეს, რომ მოსწავლე ახალგაზრდობის სახლი თითქმის 75 წლიანი ორგანიზაციაა, აქ სწავლობენ სოციალურად დაუცველი ბავშვები.
"აქ გაიზარდა უამრავი საზოგადო მოღვაწე და კარგი თაობა, მათ შორის მეც, ჩემი მეგობრებისთვისა და თანატოლებისათვის ეს არის ისტორია, მათ შორის მათთვისაც კი ვინც დღეს თანხმობა მისცა ამ ორგანიზაციების გაერთიანებას. დააყენოთ წინ ქალაქის ისტორია და არ გაუქმდეს მოსწავლე ახალგაზრდობის სახლი. თუ ეს ასე მოხდა, ჩათვალეთ, რომ გაუქმდა ოზურგეთის ისტორია."
თამარ ნადირიძემ კი ფრაქციის სახელით კოალიცია " ქართულ ოცნებას" მიმართა:
"დღევანდელ სხდომაზე კიდევ ერთხელ დავრწმუნდი, რომ ქალაქს მერი კი არ ჰყავს, არამედ ბატონ – პატრონი. "ბატონი" მართავს არა მარტო ქალაქს, მერიას, არამედ მთელ საკრებულოს, მას საკრებულოს თავმჯდომარის ფუნქციაც აქვს შეთავსებული. თუ კი ვინმე საკრებულოს სხდომაზე განსხვავებულ აზრს გამოთქვამს, გადადის შეტევაზე და ღიად აცხადებს, რომ არ აინტერესებს ჩვენი აზრი. მე გადავდივარ პოლიტიკურ მოწოდებაზე, როგორც საკრებულოს დეპუტატი და ჩემი ფრაქციის სახელით მინდა მივმართო "ქართულ ოცნებას", იღებს თუ არა მერის ქმედებებზე კოალიცია "ქართული ოცნება" პასუხისმგებლობას? რაც ოზურგეთში ექვსი თვის მანძილზე ხდება? ამ თემასთან დაკავშირებით ჩვენ ბრიფინგსაც ჩავატარებთ. მერის ქმედებები გასცდა ყოველგვარ ზღვარს , ეს არის ძალიან ცუდის მომასწავებელი. როგორ შეიძლება დეპუტატის ინტერესი არ აინტერესებდეს მერს?!"
