ლანჩხუთის მუნიციპალიტეტის საკრებულოს სოციალურ საკითხთა კომისიამ, საკუთარი კომპეტენციის ფარგლებში, მომავალი სესიის, რომელიც 30 აპრილსაა დაგეგმილი, დღის წესრიგი მიმოიხილა.
კომისიის წევრებმა პროექტი, რომელიც ლანჩხუთში ტრანსპორტის რეგულირების საკითხს უკავშირდება, ყოველგვარი შენიშვნების გარეშე ერთხმად მოიწონეს. ასევე მოწონებით შეხვდნენ გარევაჭრობის რეგულირებასთან დაკავშირებულ პროექტსაც. თუმცა, დეპუტატმა ნონა მურვანიძემ ადამიანურ ფაქტორზე გაამახვილა ყურადღება და იკითხა თუ არსებობს ალტერნატიული ფართი, რომლითაც ამ გარემოვაჭრეებს უზრუნველყოფენ.
კომისიამ მიზანშეწონილად ჩათვალა თვეში ერთხელ ერთმა კონკრეტულმა ა(ა)ი პ ანგარიშით წარსდგეს დეპუტატთა წინაშე.
გამგეობის საფინანსო-საბიუჯეტო და მუნიციპალური შესყიდვების სამსახურის უფროსმა, როლანდ ლაშხიამ, 2014 წლის ბიუჯეტის ანგარიშის შესახებ ისაუბრა. მისი თქმით, მართალია ბიუჯეტი 98, 5%-ით შესრულდა, თუმცა, არ ჩავარდნილა.
ლაშხიას მოხსენების შემდეგ, ნონა მურვანიძეს კითხვა გაუჩნდა – თუ როგორია პირველ კვარტალში ბიუჯეტის შესრულების მაჩვენებელი, რაზეც უპასუხეს, რომ 14%.
დეპუტატი დარეჯან ბურჭულაძე დაინტერესდა თუ რა თანხები ვერ აითვისა გამგეობის სოციალურმა სამსახურმა და რა მუხლებში. სამსახურის უფროსის, მარინა კეიდიას პასუხით გაირკვა, რომ პროგრამების თანხვედრის გამო, თანხები აუთვისებელი დარჩა მრავალშვილიანებისა და ვეტერანთა დაფინანსების კუთხით.
როცა ჯერი საკითხის მხარდაჭერაზე მიდგა, დამსწრე ცხრა კომისიის წევრიდან მას ხელი ექვსმა აუწია, თავშეკავებულებმა კი აქცენტი საკითხის ბუნდოვანებაზე გააკეთეს.
კომისიის სხდომას ა(ა) ი პ „კულტურის დაწესებულებათა გაერთიანების“ დირექტორის მოვალეობის შემსრულებელი გია იმნაიშვილიც ესწრებოდა და მოხსენებითაც გამოვიდა. იგი მიიჩნევს, რომ კულტურის სფეროში დასაქმებულთა ხელფასები მწირია და უნდა მოხდეს მისი ზრდა. ამას გარდა ეს სამსახური თანხის დეფიციტს ხარჯვით ნაწილშიც განიცდის.
თანხის დამატების თაობაზე იმნაიშვილი წინადადებით უკვე შევიდა საკრებულოში და სოციალურ საკითხთა კომისიის სხდომაზე მოხდა კიდეც მისი განხილვა.
საქმე ისაა, რომ აღნიშნული სამსახურის ბიუჯეტი 867 ათას ლარს მოიცავს, საიდანაც 745 ათასი ლარი ხელფასებში მიდის, ანუ ეს ბიუჯეტის 86%-ია.
„გაერთიანება შეიქმნა, სადაც ადმინისტრაციაში მაღალი ხელფასებია, თუმცა, წინააღმდეგობებს ვაწყდებით ორგანიზაციაში შემავალი სხვადასხვა სუბიექტებში დასაქმებულ პირთა მხრიდან, სადაც დაბალი ხელფასებია. ხარჯვით ნაწილშიც არ გვაქვს საკმარისი თანხები, ბევრი რამაა მოსაწესრიგებელი, თუმცა, საამისო საშუალება არ გაგვაჩნია. ამიტომაც გარკვეული ხნით ტაიმაუტიც კი ავიღეთ, რომ ცოტათი მაინც მოგვეწესრიგებინა არსებული მდგომარეობა. ამიტომაცაა, რომ არანაირ ღონისძიებას არ ვატარებთ. ახლა ცხრა მაისისთვის გვაქვს დაგეგმილი რაღაცეები, 26 მაისისთვის კი ფართომასშტაბიან ღონისძიებას ვგეგმავთ.
გამგებელთან მქონდა საუბარი და იმედი მაქვს ბიუჯეტის კორექტირება მოხდება და ადამიანები, რომლებიც კულტურის სფეროში მოღვაწეობენ სათანადოდ დაფასდებიან. ფაქტობრივად, რეორგანიზაცია დასრულებულია, თუმცა, გარკვეული ცვლილებები შესაძლოა ისევ მოხდეს. კარგი იყო თავის დროზე შექმნილიყო კომისია, რომელიც იმსჯელებდა თუ როგორ და რა სახით უნდა მომხდარიყო ცვლილებები. მე არ ვიქნებოდი ავტორი ვინმეს გაუბედურების, მაგრამ ვხედავდი, რომ სადღაც შტატები გადამეტებული იყო. მე ვიცი ჩემი სფერო, რომელსაც ერთი წელი ვხელმძღვანელობდი და კარგი იქნება გაერთიანების დირექტორად გაცილებით გამოცდილ კადრს თუ შეარჩევენ“, – განაცხადა იმნაიშვილმა.
მისი გამოსვლის შემდეგ, დეპუტატთა ნაწილი მიიჩნევდა, რომ შტატები გადამეტებული იყო, ზოგიც პირიქით. აზრთა სხვადასხვაობის მიუხედავად, კომისია წინადადებით შევა საკრებულოში იმსჯელოს „კულტურის დაწესებულებათა გაერთიანებისთვის“ დამატებით თანხის გამოყოფის თაობასა და დირექტორის დანიშვნის საკითხზე.
