ამ სიტყვებით მიმართავდნენ ერთმანეთს ქალაქ ოზურგეთის მუნიციპალიტეტის საკრებულოს, სამანდატო, საპროცედურო, იურიდიულ საკითხთა და ეთიკის კომისიის უკვე ყოფილი და დეპუტატების მიერ ახლადარჩეულ თავმჯდომარეები საკრებულოს დღეს გამართულ სხდომაზე.
ქალაქ ოზურგეთის მუნიციპალიტეტის საკრებულოს მორიგი სხდომა დღეს 3 საათზე დაიწყო, 3 საათზე მეტი ხანი გაგრძელდა და ხმაურით, დეპუტატებს შორის ხმამაღალი დაპირისპირების და ურთიერთბრალდებების ფონზე წარიმართა.
დეპუტატებს შორის დაპირისპირება სამანდატო, საპროცედურო, იურიდიულ საკითხთა და ეთიკის კომისიის თავმჯდომარის პოსტიდან გოჩა ძიმისტარაშვილის გადაყენების საკითხმა გამოიწვია.
საკრებულოს თავმჯდომარემ დეპუტატების _ ნინო გოგუაძის, ნანული ორაგველიძისა და ნინო ტაბატაძის მიერ საკრებულოში შეტანილი განცხადება კიდევ ერთხელ წაიკითხა.
დეპუტატმა თამარ ნადირიძემ საკრებულოს თავმჯდომარეს მიმართა, თუ რას ნიშნავდა განცხადებაში მოყვანილი არგუმენტები, რომ ძიმისტარაშვილი შანტაჟს და ზეწოლას ახორციელებდა დეპუტატებზე და მიმართეს თუ არა მათ პროკურატურას. ის საკრებულოს თავმჯდომარეს განცხადებაში მოყვანილი ფაქტების დასაბუთებას სთხოვდა.
თამარ ნადირიძემ განმარტა, რომ რადგან დღეს ხმების იძულებით მიცემა ხდებოდა, ამის გამო ის პროკურატურას მიმართავდა.
ლევან მგელაძემ აღნიშნა, რომ გოჩა ძიმისტარაშვილისთვის საკრებულოს არც ერთ სხდომაზე არაეთიკური საქციელი არასდროს არ შეუნიშნავს. მანვე გაიხსენა საკრებულოს წინა სხდომაზე ქალაქ ოზურგეთის მერის ბეგლარ სიორიძის მიერ ძიმისტრაშვილის მიმართ შეურაცხყოფის მიყენების ფაქტები, როცა მერმა მას "საკრებულოს სირცხვილი" უწოდა.
ბეგლარ სიორიძემ მგელაძის მიერ მისი მისამართით გაჟღერებულ ბრალდებას ხაზი გაუსვა და აღნიშნა, რომ გოჩა ძიმისტარაშვილი ნამდვილად საკრებულოს სირცხვილია: "სირცხვილი და თავის მოჭრა არ არის, კაცი დეპუტატებს ფულს ძალავდეს? ხომ საუბრობს ამის შესახებ ქალბატონი ნანული? რაც დღეს მოვისმინე, ეს არის სირცხვილი!" _ აღნიშნა სიორიძემ.
მერის ამ განცხადებას დეპუტატ ნათია შარაშენიძის რეპლიკა მოჰყვა: "სამწუხაროა, ბატონო გოჩა რომ თქვენ ჩაცუცქული არ გყავთ!" შარაშენიძის ამ რეპლიკას საკრებულოს თავმჯდომარის მოადგილემ ნინო გოგუაძემ კითხვა შეაგება: "ქალბატონო ნათია, თქვენ მენტალიტეტის მიმდევარი ბრძანდებით?"
ნინო გოგუაძემ განცხადებაში მოყვანილი ფაქტები განმარტა და გოჩა ძიმისტარაშვილს კიდევ ერთხელ დასდო ბრალი არაეთიკურ საქციელში: "ვსვამ მარტივ შეკითხვას: ერთი დეპუტატის მიერ მეორე დეპუტატისთვის ფულის გამოძალვის მცდელობა, არის თუ არა მინიმუმ არაეთიკური საქციელი?"
ნინო გოგუაძის მიერ დასმული ამ შეკითხვის შემდეგ დეპუტატმა ნანული ორაგველიძემ განმარტა, რომ გოჩა ძიმისტარაშვილი მას და დეპუტატ ნინო ტაბატაძეს ფულს სძალავდა:
ნანული ორაგველიძე: "გოჩა პარტიის წევრების მიმართ იყო აგრესიული. ჩვენს შორის დაძაბულობა დაიწყო მაშინ, როცა მე სრულიად დამოუკიდებლად მივეცი ხმა ბაზრის გაყიდვას. ის მე მთხოვდა, რომ აზრი შემეცვალა ამასთან დაკავშირებით და ხმა არ მიმეცა _ არიან ამის მოწმეები. თქვენ ასეთივე ფორმით ექცეოდით ქალბატონ ნინო ტაბატაძეს, ირინა საჯაიას, გადადიოდით პირდაპირ შეურაცხყოფაზე. განა გაქვთ ამის უფლება? იძახდით, რომ ირინა გაიყიდა, ნინო გაიყიდაო! თქვენ ქალბატონ ნინოს ჩემთან ერთად არ დაავალეთ, რომ ხელფასი ოთხად გაგვეყო და სამი მეოთხედი თქვენთვის მომეცა და ერთი მეოთხედი ჩემთვის დამეტოვებინა? აი, ამის შემდეგ ნახავთ თქვენ, ვინ არის პოლიტიკური გვამი. გამეცით პასუხი!"
გოჩა ძიმირტარიშვილმა განცხადებების ასლები მოითხოვა და აღნიშნა, რომ ის პროკურატურას აუცილებლად მიმართავდა: "ჩემთვის არ არის მნიშვნელოვანი, ვიქნები კომისიის თავმჯდომარე თუ არა. ეს არის ჩემს მიმართ წმინდა სახის პოლიტიკური დევნა. თქვენ ირბენთ სასამართლოში ჩემთან ერთად წლების მანძილზე."
ძიმიტარაშვილმა კიდევ ერთხელ უწოდა დეპუტატებს ირინა საჯაიასა და ნანული ორაგველიძეს პოლიტიკური გვამი, რაზეც ირინა საჯაიამ უპასუხა: "პოლიტიკური გვამიც ხარ და მძორიც", რასაც დეპუტატების მხრიდან სიცილი მოჰყვა.
გოჩა ძიმისტარაშვილის თანამდებობიდან გადაყენებას 9 დეპუტატმა მისცა ხმა, 4 წინააღმდეგი წავიდა, ერთი ბიულეტენი კი ბათილი აღმოჩნდა, შემდეგ კი სამანდატო, საპროცედურო, იურიდიულ საკითხთა და ეთიკის კომისიის თავმჯდომარის პოსტზე ძიმისტარიშვილის მაგივრად ირინა საჯაია აირჩიეს.
