გასულ პარასკევს, "გურია ნიუსის" ოზურგეთის ოფისს, რამდენიმე დღის წინ გარდაცვლილი, ჩოხატაურში მცხოვრები 30 წლის ფეხმძიმე ხათუნა ჩხატარაშვილის ოჯახის წევრები დაუკავშირდნენ და შპს " მედალფაში" მათთან ერთად მისვლა ითხოვეს. მათ გამოიძახეს საპატრულო ეკიპაჟიც.
ოზურგეთის სამედიცინო ცენტრში, გარდაცვლილის ოჯახის წევრებსა და "მედალფას" თანამშრომლებს შორის სიტყვიერი დაპირისპირება მოხდა _ ოჯახის წევრები დირექტორთან დავით მდინარაძესთან, მორიგე ექიმთან მაყვალა ინწკირველთან და კონსულტაციის ექიმთან მანანა კუპრაძესთან შეხვედრას მოითხოვენ, რის საშუალებაც მათ არ მიეცათ.
ადგილზე მობილიზებული იყო საპატრულო და პოლიციის ეკიპაჟები.
გარდაცვლილი ხათუნა ჩხატარაშვილის დედამთილი ეთერ კვაჭანტირაძე, მული ნანა კვაჭანტირაძე და გარდაცვლილის და ნანა ჩხატარაშვილი, ექიმებს 30 წლის ფეხმძიმის გარდაცვალებაში სდებდნენ ბრალს: "მოვედით იმიტომ, რომ ხათუნა აქ იმყოფებოდა აღრიცხვაზე. ეუბნებოდნენ, რომ ყველაფერი კარგად მიდისო. აღდგომას გახდა შეუძლოდ. ატარეს რამდენიმე დღე ჩოხატაურსა და ოზურგეთში. 23 აპრილს, თითქმის უკვე გარდაცვლილი, რეანიმობილით გადავიყვანეთ ქუთაისში, თუმცა, ვერაფერი ვუშველეთ. სახლში 8 წლის ობოლი დაგვიტოვეს. შეგვხვდეს მდინარაძე!
ვიცით, რომ ჩვენი მოსვლით ვერაფერს ვერ გავარკვევთ, ყველა თავს გაიმართლებს. სოციალურ ქსელში ამბობენ, ტყუილიაო. როგორ არ რცხვენიათ? დღეს გაუუქმდეს ლიცენზია ამ ექიმებს. ცოცხალი ქალი მოვიყვანეთ და მკვდარი გაგვატანეს!" _ ამბობდნენ გარდაცვლილის ოჯახის წევრები.
ხმაური და დაპირისპირება მას შემდეგ შეწყდა, რაც პოლიციის თანამშრომლებმა ხათუნა ჩხატარაშვილის და და დედამთილი პოლიციაში ჩვენების მისაცემად წაიყვანეს.
შპს " მედალფას" რეგიონულმა დირექტორმა ლევან ანთაძემ და დირექტორმა დავით მდინარაძემ " გურია ნიუსი", რატომღაც დაინტერესებულ მხარედ მიიჩნიეს და მიკერძოებაში დაგვდეს ბრალი _ მათი გაღიზიანება "გურია ნიუსის" ვებგვერდზე გამოქვეყნებულმა სტატიამ _ "დაგვიანებული მკურნალობა თუ ექიმების დაუდევრობა _ რა გახდა ფეხმძიმე ახალგაზრდის სიკვდილის მიზეზი", გამოიწვია ..
ლევან ანთაძე: "მინდა გირჩიოთ, რომ ნუ ისარგებლებთ იმ ოჯახის გაჭირვებით, ნუ დაძაბავთ ისედაც დაძაბულ სიტუაციას. რაც შეეხება მოსაზრებებს, რომ არსებობს თუ არა ექიმების ბრალეულობა, არსებობს კომპეტენტური ორგანო და ის ორგანო შეისწავლის ამ საქმეს თავიდან ბოლომდე. თუ ვინმე დამნაშავეა, დაისჯება, მაგრამ ამ სიტუაციაში, სიმართლე გითხრათ, ვერ ვხედავ ჩვენი კლინიკის ექიმების ბრალეულობის არსებობას."
დავით მდინარაძე: "ჩემი ინტერვიუს გარდა, აბსოლუტურად ყველაფერი ტყუილი გიწერიათ. ის ქალბატონი, ვისაც თქვენ იშველიებთ, ქალბატონი ია მაღლაკელიძე, აქ არ ყოფილა, ის არის ქუთაისში. ეს ინფორმაცია არ არის სწორი და თქვენეული ინტერპრეტაცია გაქვთ მიცემული, ეს არის ჩემი აზრი," _ ამბობს მდინარაძე და მოგვმართავს: "მითხარი, რა, რატომ იქცევი ასე? რატომ შვრები ამას? აი, უბრალოდ რატომ აკეთებ, ვერ ვხვდები, რა! უწყობ ხელს დაძაბულობას, რაში გჭირდება ეს სკანდალი? არც ერთ მოსაზრებას არ ვეთანხმები, რაც წერია წერილში _ გიწერია ტყუილები, რაც შემეკითხეთ და რა გიპასუხეთ, ის მომასმენინეთ, შეგნებულად ცდილობთ ამას ყველაფერს. ქუთაისში ჩახვედით? ხომ ხართ ობიექტური? ხომ აწარმოებთ ჟურნალისტურ გამოძიებას? მოიკითხეთ ისიც და ამის მერე დაწერეთ სიმართლე, არ არის აქ სასაკლაო."
"არავის პატივს არ სცემთ. აქ, ოზურგეთში დაბადებული და გაზრდილი ხართ, რაში გაწყობთ ეს? ვიღაც ქუთაისელი მაღლაკელიძე ვინ არის?!" _ გვითხრეს ექიმებმა.
მორიგე ექიმმა მაყვალა ინწკირველი, მისივე თქმით, "ახსნა-განმარტებას" აკეთებს: "ახსნა-განმარტება მინდა გავაკეთო, რაც თქვენ " გურია ნიუსის" პირველ გვერდზე გიდევთ, იმასთან დაკავშირებით; თქვენ არ გაინტერესებთ მეორე მხარე, ვისაც ადანაშაულებთ ხელაღებით. მაყვალა ინწკირველს იცნობდით საერთოდ? თქვენ გაქვთ შეფასებები დადებული, ან მაღლაკელიძე თუ მადანაშაულებს, საერთოდ არ ვიცნობ მას, ვინ არის,"_ ამბობს ინწკირველი და აკონკრეტებს: .
"ღამის სამ საათზე გადმოყვანილი იქნა პაციენტი სასწრაფო დახმარების ბრიგადის მიერ. იყო 30 კვირის ორსული, ზოგადად, დამაკმაყოფილებელ მდგომარეობაში; ჩივილები _ ჩაწოლითი ხასიათის ტკივილებით მუცელში.. ორსული წინა ორი დღის განმავლობაში იტარებდა მედიკამენტურ ტოკოლიზს, ორსულობის შენარჩუნების მიზნით; შემოსვლის დროს ზოგადი მდგომარეობა დამაკმაყოფილებელი იყო; აღსანიშნავი და ყურადსაღები იყო კანსა და ლორწოვან გარსზე გამოხატული სიყვითლე, რის მიზეზის ძიებაც დაიწყო ჩემს მიერ პაციენტის შემოსვლის წუთიდან. იგი კონსულტირებულ იქნა ინფექციონისტის მიერ, გამოვიკვლიეთ ღვიძლის ფუნქცია, შარდის საერთო ანალიზი. ამის მიხედვით გაუგრძელდა მკურნალობა. ორსულობის შენარჩუნებისთვის უგრძელდებოდა ტოკოლიზი. დაწყებული ჰქონდა, ჰორმონოთერაპია; 3 საათიდან 9-ის ნახევრამდე პაციენტი იმყოფებოდა ჩემი მეთვალყურეობის ქვეშ. შემოსვლის დროს ნაყოფის გულისცემა იყო კარგი, ინტოქსიკაციის ფონზე, სავარაუდოა, რომ ის შეწყდა. გადაწყდა პაციენტის მშობიარობა ბუნებრივი გზებით, რისთვისაც დაიწყო მომზადება მკვდარი ნაყოფის გამოსაძევებლად. 9-ის ნახევარს შემდეგ ჩატარდა ყველა მანიპულაცია, რაც იყო საჭირო. ეს კომენტარი შემიძლია გავაკეთო იმაზე, რასაც თქვენ წერდით " გურია ნიუსის" პირველ გვერდზე."
მანანა კუპრაძე: "მე ვარ კონსულტაციის ექიმი. ჩემთან იმყოფებოდა აღრიცხვაზე ხათუნა ჩხატარაშვილი. ჰქონდა სამი ვიზიტი, ჩაუტარდა კვლევები, რაც აღნიშნულია ისტორიაში. მას არანაირი ჩივილები მუცლის დაჭიმულობაზე არ ჰქონია. დაახლოებით 20 აპრილს მირეკავდა, მოვიწამლეო. ვუთხარი, მიმართე ინფექციონისტს,-მეთქი. მიმართა ექიმს ჩოხატაურში; იქ გაუკეთეს გადასხმა. იქედან მერე, დილით ჩამოვიდა ჩემთან. როგორც კი მოვიდა, ჰქონდა საშვილოსნოს ჰიპერტონუსი და მაშინვე მოთავსებული იქნა სტაციონარში."
ეთერ და ნანა კვაჭანტირაძეებმა ოზურგეთის სამედიცინო ცენტრის ექიმების წინააღმდეგ ჩვენება უკვე მისცეს.
რედაქციისგან: "მედალფას" ექიმების ბრალდებებზე, "გურია ნიუსი" უფლებამოსილია განაცხადოს, რომ წერილი _ "დაგვიანებული მკურნალობა თუ ექიმების დაუდევრობა _ რა გახდა ფეხმძიმე ახალგაზრდის სიკვდილის მიზეზი", დაწერილია ჟურნალისტური, ადამიანური და ყველანაირი ეთიკის დაცვით; მასში, როგორც ექიმები ბრძანებენ, არ არის არც ერთი შეფასებითი სიტყვა, რომელიც ჟურნალისტს ეკუთვნის. რედაქციას მომართა მოქალაქე ია მაღლაკელიძემ და ჩვენთვის არავითარი მნიშვნელობა არ აქვს, ქუთაისელია ის თუ სხვა რომელიმე ქალაქში ცხოვრობს _ მან გვთხოვა დახმარება, გაგვაცნო მისი ნათესავის გარდაცვალების შესახებ საკუთარი მოსაზრება, რომელზეც კომენტარის საშუალება მივეცით მეორე მხარესაც _ "მედალფას" დირექტორს დავით მდინარაძეს.
თავისთავად, ოჯახი, რომლსაც გარდაცვლილი ჰყავს, მძაფრად გამოხატავს ემოციას და ამას ექიმები ჟურნალისტის შეურაცხყოფით არ უნდა პასუხობდნენ!
ყველა მხარის ჩანაწერი, მათ შორის, თუ როგორ ექცევიან მედიცინის მუშაკები ჟურნალისტს, რომელმაც ტრაგიკული ფაქტი და გარდაცვლილი ახალგაზრდის ოჯახის წევრების პოზიცია დააფიქსირა, "გურია ნიუსის" რედაქციაში ინახება.
