“მთავარია, გვქონდეს წყალი და გზა”

ოზურგეთის მუნიციპალიტეტის დაბა ნასაკირალის მოსახლეობის ერთი ნაწილი "გურია ნიუსს" დაუკავშირდა.

"გააშუქეთ ჩვენი პრობლემები. როგორც არის შესაძლებელი, ისე დაგვეხმაროს ხელისუფლება. ნახეთ, როგორი გზები გვაქვს. წყალი სამ დღეში ერთხელ მოდის, ისიც ახლა, თორემ ადრე სულ არ იყო, უწყლოდ ვიხრჩობოდით, საიდან ვეზიდებოდით წყალს, ვინ იცის! დაბის ცენტრში ყველაფერი დაშლილია. აღარც კლუბი გვაქვს _ დაანგრიეს. სიცოცხლე ჩამკვდარია. თუ დაბაში გზა არ იქნება, რაც არ უნდა გააკეთო აქ, არაფერს მნიშვნელობა არ აქვს. უგზოობა ჩვენი უპირველესი პრობლემაა. დანგრეულია უზარმაზარი ჩაის ფაბრიკა, სადაც ათასობით ტონა ჩაი მუშავდებოდა, დასაქმებული იყო ადგილობრივი მოსახლეობის უმეტესობა, რამდენი წელია თურქეთში მოსახლეობის 90 პროცენტი მიდის ჩაის საკრეფად. ასეა წელსაც, დაცლილია დაბა კაცებისგან, _ გვითხრეს ნასაკირალის მცხოვრებლებმა.

_ ვთხოვეთ ხელისუფლებას, რომ უწყლობის პრობლემა მოაგვაროს, ასევე, სკოლის შენობას სჭირდება რეაბილიტაცია. საავადმყოფოს შენობაც რეაბილიტაციას საჭიროებს, ამის შესახებაც ვთხოვეთ ხელისუფლებას. 10 წელია, დაბას, რომელიც, ფაქტობრივად, პატარა ქალაქია, ყურადღება არ ექცევა, არც ერთი პრობლემა არ არის მოგვარებული, მხოლოდ გაზია გამოყვანილი, მაგრამ საკითხავია, აქვს კი ყველას საშუალება, რომ მისი საფასური გადაიხადოს? თურქეთში სამუშაო 10 მაისს იხსნება და ამ დროს უკვე ვერც ერთ მამაკაცს ვერ ნახავ დაბაში, ყველა თურქეთში მიდის ჩაისა და თხილის საკრეფად, _ გვითხრა ადგილობრივმა მცხოვრებმა ზურაბ ირემაძემ.

_ პრობლემების მეტი რა არის? უგზოობა, ეკონომიური და სოციალური პრობლემები. ჩვენი ერთადერთი შემოსავალი მხოლოდ სეზონიდან სეზონამდე დაგროვილი "თურქეთის" ფულია, სხვა არაფერი. უმუშევრობაა, როგორც ყველა სოფელში 99 პროცენტი თურქეთში მუშაობით ირჩენს თავს. შემოსავალი თხილია, მანდარინი… მშრომელი ხალხი ცხოვრობს ნასაკირალში, თუმცა, შემოსავალი არ გვაქვს, _ თქვა ოთარ ადაძემ.

პრობლემების შესახებ ისაუბრა ჯემალ ანთაძემ: "უმუშევრობაა, წყალი ყველგან არ არის, "კუნძულის" უბანზე იხრჩობიან უწყლობით, თუ მიაწვდით ხმას ხელისუფლებას, კარგი იქნება."

ოზურგეთის მუნიციპალიტეტის გამგებლის მოადგილე ბადრი გობრონიძე ჩვენთან საუბარში ამბობს, რომ დაბა ნასაკირალისთვის, 2015 წელს, სოფლის მხარდაჭერის პროგრამის ფარგლებში, 49 ათას 531 ლარი გამოიყო: _ სოფლის კრებაზე ადგილობრივი მოსახლეობა გამგებელთან ერთად იმ პრიორიტეტებზე შეჯერდა, რომელზე მუშაობა ნასაკირალში 2015 წლის ბოლომდე უნდა დასრულდეს. გამოყოფილი თანხის ფარგლებში, ნასაკირალში, წერეთლის ქუჩაზე, სახანძროს დასახლებასა და აფრიკის უბანში წყლის ქსელის მოსაწყობად უკვე შეძენილია პლასტმასის მილები და წყლის რეზერვუარის მოსაწყობი მასალები. დაბის სასაფლაოს შესაღობად შევიძინეთ 2 ტონა ცემენტი, 8 კბმ ღორღი და მავთულბადე.

სოფლის მხარდამჭერი პროგრამის ფარგლებში, მოსახლეობის მოთხოვნის შესაბამისად, ზურაბ რამიშვილის უბანში დაიგება ბეტონის გზა, შეკეთდება დაბის საბავშვო ბაღი და მისი შემოგარენი. ბეტონის გზები დაიგება ხალიდი მიქელაძის და ავთო ირემაძის უბნებშიც. მოეწყობა მოსაცდელი და დამონტაჟდება გარეგანათება.

გარდა იმისა, რომ მუნიციპალიტეტი სოფლის პროგრამით გამოყოფილი თანხების სწრაფად და ეფექტურად ათვისებას გეგმავს, თემებში სტიქიის დროს დაზიანებული ინფრასტრუქტურის აღდგენა რეგიონში გასახორციელებელი პროექტების ფონდიდან მოხდება. სტიქიის სალიკვიდაციო ღონისძიებებისთვის გამოყოფილია 68 ათას 832 ლარი, რომლის ფარგლებში, სულ 15 პროექტი გახორციელდება. ძირითადი თანხა რთულ მონაკვეთებზე ბეტონის საფარის დაგებას მოხმარდება.

რაც შეეხება ქუჩების ნუმერაციას, პროცესი უახლოეს დღეებში დაიწყება, _ გვითხრა ბადრი გობრონიძემ.

ნასაკირალის ცენტრი

ყოფილი საავადმყოფოს შენობა ნასაკირალში

ნასაკირალის სკოლა