"ემ ენ ჯორჯიას" მფლობელი ვახტანგ გოძიაშვილი, კომპანიის საქმიანობაში ხელისუფლების წარმომადგენელთა ჩარევასთან დაკავშირებით საქართველოში აკრედიტებული დიპლომატიურ წარმომადგენლობებსა და არასამთავრობო ორგანიზაციებს მიმართავს.
აღნიშნული გადაწყვეტილება, როგორც გოძიაშვილი აღნიშნავს, მან ყოფილი პრემიერის ბიძინა ივანიშვილის მხრიდან რეაგირების არარსებობის გამო მიიღო.
"შპს "ემ ენ ჯორჯია" დაფუძნდა 2014 წლის აპრილში, ვახტანგ გოძიაშვილისა და ლაშა ასანიძის მიერ. კომპანიის საქმიანობის სფერო უნდა ყოფილიყო მომსახურების გაწევა ამერიკული კომპანია "ჯორჯიან-ამერიქან ელოიზი"-ს შვილობილი, ქართული კომპანია შპს "ჯორჯიან მანგანეზი"-სთვის.
შპს "ემ ენ ჯორჯიას" და "ჯორჯიან მანგანეზს" შორის გაფორმებული, ექსკლუზიური ხელშეკრულების საფუძველზე, ჩვენი კომპანია იღებდა ვალდებულებას, გაეწია მომსახურება საქართველოში მანგანუმის მადნის მოპოვება-გადამუშავება-მიწოდების სახით ზემოთ ხსენებული კომპანიისათვის. ხელშეკრულებიდან გამომდინარე, შპს "ემ ენ ჯორჯიას" საქმიანობა უნდა დაეწყო 2014 წლის აპრილში, რისთვისაც ფირმა მზად იყო როგორც მენეჯმენტის კუთხით, ასევე იურიდიულად და ტექნიკურად.
თუმცა, როდესაც "ემ ენ ჯორჯიას" უკვე უნდა დაეწყო ხელშეკრულებით გათვალისწინებული საქმიანობა, ხელისუფლების ყოფილი და დღევანდელი თანამდებობის პირების, გიორგი გახარიასა (ბიზნეს ომბუდსმენი) და ზვიად ჯანყარაშვილის (იმ ჟამად საქართველოს შსს-ის გენერალური ინსპექციის უფროსი) მხრიდან განხორცილდა ჩვენს საქმიანობაში უხეში ჩარევა და ხელის შეშლა. ზემოთ ხსენებული პიროვნებების მიერ განხორციელდა კონკრეტული მითითება "ჯორჯიან მანგანეზის" მიმართ, რომ ამ უკანასკნელს არ მოეცა ჩვენთვის მუშაობის დაწყების უფლება. განხორციელებული ზეწოლიდან გამომდინარე, "ჯორჯიან მანგანეზი" იძულებული გახდა, სიტყვიერი მითითების სახით, ჩვენთვის მოეთხოვა ურთიერთობის გარკვევა ხელისუფლების იმ წარმომადგენლებთან, რომლებიც ჩართულნი არიან და დაინტერესებულნი არიან აღნიშნული საკითხით.
ხელისუფლების წარმომადგენელთა მხრიდან ჩვენს ბიზნესში ჩარევის და ხელის შეშლის გამო კომპანიამ ვერ დაიწყო კონტრაქტით გათვალისწინებული საქმიანობა და შესაბამისად, "ემ ენ ჯორჯიამ" განიცადა რამდენიმე მილიონი დოლარის ზარალი, ასევე შეილახა კომპანიის რეპუტაცია ჩვენს პარტნიორებთან. ჩვენ, ამა წლის 20 აპრილს, შპს "ემ ენ ჯორჯიას" გარშემო განვითარებული მოვლენების შესახებ, ღია წერილით ვაცნობეთ საქართველოს ყოფილ პრემიერმინისტრს, ბატონ ბიძინა ივანიშვილს და მივმართეთ თხოვნით, დაინტერესებულიყო აღნიშნული ფაქტებით, რადგან ბატონმა ივანიშვილმა პირადად აღუთქვა საქართველოში მოქმედ ბიზნესმენებს მხარდაჭერა იმ შემთხვევაში, თუ მოხდებოდა ბიზნესზე ზეწოლის, ჩარევის ან ხელშეშლის ფაქტი. მაგრამ, სამწუხაროდ, ჩვენს ამ ღია წერილს ბატონი ივანიშვილის მხრიდან გამოხმაურება არ მოჰყოლია.
ჩვენ წარმოვადგინეთ არაერთი მტკიცებულება, რომელთა მიხედვითაც, ჩვენ ვთვლით, რომ დასტურდება კონკრეტული თანამდებობის პირების მხრიდან შპს "ემ ენ ჯორჯია"-ზე განხორციელებული ზეწოლის, ბიზნესში ჩარევის და ხელშეშლის ფაქტები, რომლებიც გააშუქა საქართველოს არაერთმა ტელეარხმა.
ამჯერად, ჩვენ დაგვრჩენია მხოლოდ ის, რომ მოგმართოთ თხოვნით თქვენ, რომ დაინტერესდეთ შპს "ემ ენ ჯორჯიას" საქმიანობაში ხელისუფლების წარმომადგენელთა მხრიდან ჩარევის და ბიზნესის ხელშეშლის ფაქტებით. თქვენი დაინტერესების შემთხვევაში მზად გახლავართ, პირადად გავცეთ პასუხი თქვენს ნებისმიერ შეკითხვას და წარმოგიდგინოთ მეტი კონკრეტიკა ჩვენს მიერ მოყვანილ ფაქტებზე. გვაქვს თქვენი ყურადღების და მხარდაჭერის დიდი იმედი", – აღნიშნულია განცხადებაში.
შეგახსენებთ, რომ ცოტა ხნის წინ გამოქვეყნებულ ღია წერილს "ჯორჯიან მანგანეზი" გამოეხმაურა. კომპანიისთვის, მიმართვის გავრცელების შემდეგ, გაუგებარი იყო, თუ რატომ დაუკავშირა კომპანია "ემ ენ ჯორჯიამ" კომპანიებს შორის არსებული ბიზნეს დავა პოლიტიკას.
