გურიის გუბერნატორის მოადგილედ დანიშნული სოსო ერქომაიშვილი 2014 წლის თვითმმართველობის არჩევნებში ქალაქ ოზურგეთში მეორე ტურში , "პატრიოტთა ალიანსის" ოზურგეთის მერობის კანდიდატის, შოთა გოგიბერიძის მხარდამჭერი იყო. სოსო ერქომაიშვილსა და ქალაქ ოზურგეთის მერს ბეგლარ სიორიძეს შორის თვითმმართველობის არჩევნებზე სიტყვიერი დაპირისპირებაც მოხდა, _ ამის შესახებ , "გურია ნიუსთან" სოსო ერქომაიშვილი საუბრობდა. მისი თქმით, ბეგლარ სიორიძემ , სიტყვიერი შეურაცხყოფა მიაყენა #60/55 საარჩევნო უბანთან. ამ ფაქტთან დაკავშირებით "ქართული ოცნების" და "პატრიოტთა ალიანსის" მხარდამჭერებს შორის შეხლა-შემოხლა მოხდა.
გუბერნატორის ამჟამინდელი მოადგილე " გურია ნიუსთან" აღნიშნავდა, რომ ერთ-ერთ საარჩევნო უბანზე ყოფნისას, გაჩერდა "ტოიოტას" ჯიპი: „დავინახე, რომ ბეგი სიორიძე იყო, დამიძახა და მითხრა: "სოსო უკვე წაგებული გაქვს, სასწრაფოდ დატოვე ოზურგეთიო" და შემდეგ მომაყენა სიტყვიერი შეურაცხყოფა".
დღეს სოსო ერქომაიშვილი გურიის გუბერნატორის გია სალუქვაძის მოადგილედ დაინიშნა.
გაგრძელდება თუ არა პიროვნული დაპირისპირება მერსა და გუბერნატორის მოადგილეს შორის, იცნობს თუ რა პრობლემებს ოზურგეთში, რა მიზნები აქვს და კონკრეტულად ვისი კადრია ახალი მოადგილე? ამ კითხვებზე სოსოს ერქომაიშვილი გვპასუხობს, ამბობს, რომ " ქართულ ოცნებას" წარმოადგენს და ქვეყნისთვის სასიკეთო მიზნებს ემსახურება:
_ ქართული ოცნების" ნებისმიერი ჯარისკაცის სურვილია, ემსახუროს ქვეყანას. ჩემი სურვილი იყო, რომ წამოვსულიყავი გურიაში. მიზნები მკაფიო და მნიშვნელოვანია _ მაქსიმალურად წინა პლანზე წამოვწიოთ მოქალაქეები, მოსახლეობა. ჩვენ მათ ირგვლივ ვტრიალებთ და ყველაფერს გავაკეთებთ, იმისათვის, რომ მოქალაქეები იყვნენ წელში გამართული, იმედიანი და მომავალზე ორიენტირებულნი.
_ ბატონო სოსო, იცნობთ თუ არა პრობლემებს გურიის პრობლემებს და თქვენი აზრით, რომელია მათ შორის ყველაზე დიდი?
_ მე მგონი, ყველაზე დიდი პრობლემა მოსახლეობის არაინფორმირებულობაა, მათთან შეხვედრების ნაკლებობა. მიახლოებით ვიცი, მოსახლეობას რა აწუხებს. ორი დღეა, რაც დავინიშნე და საქმეში ძირეულად ჩახედული არ ვარ.
_ ბატონო სოსო, ვისი კადრი ბრძანდებით?
_"ქართული ოცნების"… პარტიასა და აღმასრულებელ ხელისუფლებასთან ერთად შეთანხმებით მოხდა ჩემი დანიშვნა, ერთობლივად მიიღეს გადაწყვეტილება, იქედან გამომდინარე, რომ 2012 წლიდან ვარ ჩართული ამ პროცესებში. მე მათ მადლობას ვუხდი ნდობისთვის.
_თქვენ თვითმმართველობის არჩევნებში "პატრიოტთა ალიანსის" მერობის ყოფილი კანდიდატის, შოთა გოგიბერიძის აქტიური მხარდამჭერი იყავით. ამბობთ, რომ "ქართულ ოცნებას" წარმოადგენთ, თუმცა, არჩევნებზე მისი კანდიდატის წინააღმდეგ იბრძოდით. რატომ გაემიჯნეთ მაშინ "ქართულ ოცნებას"?
_ მე ვუჭერდი მხარს შოთა გოგიბერიძეს და არა „პატრიოტთა ალიანსს". მე და შოთა 2012 წლიდან მოვდივართ ერთად, ვმეგობრობთ, ვიცი მისი შესაძლებლობები. ჩვენ, ბოლოსდაბოლოს, დემოკრატიულ ქვეყანაში ვცხოვრობთ და ამ მხრივ ქვეყანამ ნაბიჯი გადადგა წინ. ყველანაირ ლოგიკაში ჯდება, რომ ადამიანი იქცეოდეს ისე, როგორც ფიქრობს, რომ უკეთესია. არჩევნებზე მომხდარი დაპირისპირება დემოკრატიულ ჩარჩოებს არ გასცდენია.
_ ადამიანი, რომელმაც თქვენივე განცხადებით, არჩევნებზე მოგაყენათ სიტყვიერი შეურაცხყოფა, გეუბნებოდათ, "სასწრაფოდ დატოვე ოზურგეთი, წაგებული გაქვსო", დღეს ქალაქის მერია, თქვენ კი _ გუბერნატორის მოადგილე. არც თუ ისე დიდი ხნის წინ, სოციალურ ქსელში სიორიძის მისამართით წერდით სტატუსებს: "მალე გაიგებთ, ვინ აირჩია ოზურგეთმა!". როგორ აპირებთ მერთან თანამშრომლობას?
_ ძალიან მარტივი პასუხი მექნება _ მე მას არ ვიცნობდი მაშინ. მოდით, ეს კითხვა დავტოვოთ უპასუხოდ… არჩევნების პერიოდში სიტუაცია უფრო გამძაფრებულია. ერთ რეგიონში ერთად მოვხვდით საჯარო სამსახურში, ამიტომ უფლება არ გვაქვს პირადი ინტერესების გამო სახელმწიფო შეხედულებებს ვუღალატოთ. ჩვენ ვართ სახელწიფო სამსახურში, ამიტომ გვერდზე უნდა გადავდოთ ყველაფერი პირადული. ვიცი, რომ ქალაქ ოზურგეთში სამუშაოები მიმდინარეობს, უფრო გავერკვევი სიტუაციაში, ჩვენ ხალხს ერთად უნდა ვემსახუროთ, კეთილი ვინებოთ და ხალხს ისე მოვექცეთ, როგორც შეეფერება.
_ ბატონო სოსო, ვიხილავთ თუ არა შოთა გოგიბერიძეს მალე საჯარო სამსახურში?
_ ეს ჩემი გადასაწყვეტი არ არის _ მე ნებისმიერ ადამიანს ვუსურვებ, რომ დასაქმდეს.
