(გურია ნიუსი, ლანჩხუთი) _ ლანჩხუთელმა კარატისტებმა გასულ წელს ყველა სეზონის მიღწევა გააუმჯობესეს და სხვადასხვა სინჯის მედლების მონაგარი მნიშვნელოვნად გაზარდეს. გასულ კვირას ჩვენებურებმა აჭარის მთავარ ქალაქ ბათუმში წლის ბოლო შეჯიბრი გამართეს და 12 სხვადასხვა სინჯის მედლის მოპოვება შეძლეს.
ამ და მიმდინარე წლის სპორტულ შედეგებზე კარატე-დოს გურიის ფედერაციის პრეზიდენტი მერაბ თურქია გვესაუბრება:
_ 18 დეკემბერს ქალაქ ბათუმში გაიმართა აჭარის ღია პირველობა კარატე-დოში, რომელშიც მონაწილეობდა ქუთაისის ორი კლუბი, ბათუმის, ქობულეთის, ჩხოროწყუს, ფოთისა და ლანჩხუთის სპორტული ცენტრის 12 კარატისტი, სულ 150-მდე მონაწილე. ჩვენი კარატისტებისგან ტურნირი მედლების გარეშე არავის დაუტოვებია. პირველი ადგილები მოიპოვეს _ გიორგი ზენაიშვილმა, ონისე ცინცაძემ, გუგა ივანაშვილმა, საბა გოგოძემ, გიორგი კეჭეხმაძემ. ფინალური ორთაბრძოლები დათმეს და შესაბამისად მეორე ადგილები დაისაკუთრეს _ გიორგი ჩხაიძემ, გოგიტა შავაძემ, შალვა ჩხაიძემ, თორნიკე ცინცაძემ, დავით დარჩიამ. ხოლო მესამე საპრიზო ადგილზე დათო წილოსანი, გოგიტა მახარაძე გავიდნენ. ტურნირი 8 წლიდან 17-წლამდე ასაკის ბავშვებს შორის მიმდინარეობდა და ჩვენ ყველა ასაკში გვყავდა წარმომადგენელი. ჩვენი გუნდი შეჯიბრებებისთვის, ჩემთან ერთად, ლაშა ბერიძემ მოამზადა.
_ ალბათ, ძალიან კმაყოფილი ხართ წლის მონაგარით?
_ რა თქმა უნდა. წელს ძალიან ნაყოფიერი წელი გვქონდა. ბათუმის ტურნირამდე 67 ოქროს მედალი გვქონდა მოპოვებული, ამას 18 დეკემბერს კიდევ დაემატა 5 ოქრო და ჯამში 72 ოქროს მედალი გამოგვივიდა. ვერცხლის და ბრინჯაოს მედლებს აღარ ვითვლით, იმდენი დაგვიგროვდა.
_ ყველაზე წარმატებული მაინც ევროპის ჩემპიონატი იყო, სადაც 6 ოქროს მედალი მოიპოვეს ლანჩხუთელმა კარატისტებმა.
_ ეს არის გასაოცარი შედეგი. ჩვენი მუნიციპალიტეტიდან ამდენი ევროპის ჩემპიონი მგონი არც ერთ სახეობაში არ გვყოლია, რაც, ბუნებრივია, ძალიან სასიხარულო ფაქტია. 2011 წლამდე კარატე-დოში ევროპის სამი ჩემპიონი გვყავდა. 2001 და 2003 წლებში ესენი იყვნენ ნათია თურქია, დავით დარჩია და თათია თურქია. მას შემდეგ საკმაოდ დიდხნიანი პაუზა გამოგვივიდა. წელს სტამბულში გამართულ ევროპის პირველობაზე ოქროს მედლები მოიპოვეს _ გიორგი ჩხაიძემ, გუგა ივანაშვილმა, საბა გოგოძემ, გიორგი კეჭეხმაძემ, დავით წილოსანმა, თორნიკე ცინცაძემ. ჩვენმა აღსაზრდელებმა ორი ოქროს მედალი კიდევ გუნდურ პირველობაზე მოიპოვეს. აღსანიშნავი იყო რუსეთის საკმაოდ ძლიერი ნაკრების დამარცხება.
_ გასულ წელს ერთი ჩვენებური საქართველოს წლის საუკეთესო კარატისტთა ხუთეულშიც კი შევიდა.
_ ეს იყო ძალიან სასიამოვნო ფაქტი. შარშან კარატე-დოს ფედერაციის რეიტინგით 5 საუკეთესო სპორტსმენს შორის დასახელდა თათია თურქია, ხოლო გურიის რეგიონი საუკეთესო იყო საქართველოს მასშტაბით.
_ როგორც ვიცით, კარატეს სექცია ჩვენს მუნიციპალიტეტში რამდენიმე სოფელში უკვე ფუნქციონირებს.
_ მუნიციპალიტეტში კარატეს 6 სექცია მოქმედებს. ესენია: წყალწმინდის, ჯუმათის, ლესის, აცანის, მამათის და ლანჩხუთის. 4 მწვრთნელ-ინსტრუქტორი ვმუშაობთ _ მე, ლაშა ბერიძე, მანუჩარ ჩხაიძე და ტარიელ კვაჭაძე.
საქართველოს კარატე-დოს ფედერაციას ყოველწლიურად ჩამოყავს მსოფლიო ფედერაციის შეფ-ინსტრუქტორები, რომლებიც ატარებენ სემინარებს და შესაბამის სერტიფიკატს ანიჭებენ მწვრთნელებს. ჩვენი ყველა მწვრთნელი სერტიფიცირებულია. დღეს ჩვენს სექციებში 150 ბავშვი ეუფლება კარატეს. ვისაც სურვილი აქვს, 6 წლიდან შეუძლია, მოიყვანოს ბავშვი და მას ჩვენ ვარჯიშებს დავუწყებთ. ბევრი თვლის, რომ ეს ასაკი პატარაა და 9 წლამდე თავს იკავებენ. არადა, 9 წლის ბავშვი უკვე იმდენად არის მომზადებული, რომ შედეგს დადებს.
_ ახალი წლიდან რა ტურნირებს უნდა ველოდოთ?
_ 26-27-28 იანვარს თურქეთის ქალაქ არხავში გაიმართება ევრაზიის თასი კარატე-დოში. ჩვენი სპორტული სკოლის გუნდი უკვე მიწვეულია ამ ღონისძიებაზე და აქტიურადაც ვემზადებით. იმედს გამოვთქვამთ, რომ სეზონის და წლის პირველი ტურნირი წარმატებული იქნება და კიდევ ერთხელ მოვიპოვებთ უმაღლესი სინჯის მედლებს.
