შობის ბრწყინვალე დღესასწაულს ყველა ქრისტიანი დიდი სიხარულით ეგებება. ამ დღეს შობის მარხვა სრულდება და მარხულთა უმეტესობა საშობაო ღვეზლით იხსნილებს. როცა ოჯახის წევრები ტაძარში ეგებებიან შობის დღესასწაულის მობრძანებას, ოჯახის ერთი წევრი მაინც სახლში რჩება და საშობაო ღვეზლის მომზადებას იწყებს.
საშობაო ღვეზლის მომზადების ერთ-ერთი რეცეპტი ჩოხატაურის მუნიციპალიტეტის სოფელ იანეულში მცხოვრები, 87 წლის ეშანა მგალობლიშვილისგან ჩავიწერეთ, რომელსაც უკვე წლებია, ეს საპატიო მისია აკისრია ოჯახში.
უხუცესმა ქალბატონმა გულდასმით გაგვაცნო საშობაო ღვეზლის მომზადების წესი: _ საშობაო ღვეზლის მომზადება რთული სულაც არ არის. პირველ რიგში, ვამზადებთ ცომს ფქვილით, წყლით, საფუარით. რბილი ცომისთვის კარგი იქნება, თუ დავუმატებთ ცოტა ზეთს ან მარგარინს. როცა ცომი გაფუვდება, გავაბრტყელებთ, ჩავდებთ დაფშვნილ ყველს და ყველზე დავაწყობთ მოხარშული კვერცხის რამდენიმე ნაჭერს. ღვეზელს ნახევარმთვარის ფორმა უნდა ჰქონდეს. დავდებთ ცხიმწასმულ ცხელ ტაფაზე. ზემოდან რომ კარგად დაიბრაწოს, უნდა წავუსვათ კვერცხის გული ან ზეთში არეული მაწონი. ვდებთ ღუმელში 15-20 წუთის განმავლობაში. ჩვენს ოჯახში ვაცხობთ იმდენ ღვეზელს, ოჯახის რამდენი წევრიც არის.
სრულიად საქართველოს ვულოცავ შობის ბრწყინვალე დღესასწაულს. ღმერთი გფარავდეთ! _ ამბობს ქალბატონი ეშანა და “გურია ნიუსიც” ამ დალოცვით გილოცავთ შობა-კალანდის დღესასწაულს.
