"გურია ნიუსის" პრესკლუბში "თავისუფალი დემოკრატების" ლანჩხუთის ორგანიზაციის წარმომადგენლებმა დღეს ადგილობრივ მედიასთან პრესკონფერენცია გამართეს.
პარტიის ადგილობრივი ორგანიზაციის თავმჯდომარემ ელგუჯა ჩხაიძემ ლანჩხუთში არსებული ვითარება ნეგატიურად შეაფასა და თქვა, რომ 2012 წელის არსებული მოლოდინი არ გამართლდა და ქვეყანა არაფორმალურად იმართება:
_ სამართლიანობის აღდგენა გვერდზე დარჩა, მიდის ქვეყნის არაინსტიტუციური მართვა, რაც ხელს უშლის სახელმწიფოს განვითარებას. ამის გამოძახილია ბოლო დროს ლანჩხუთში განვითარებული მოვლენები – გამგებლის პირველი მოადგილე ვახტანგ ზენაიშვილი თანამდებობიდან გაათავისუფლეს მხოლოდ იმიტომ, რომ "თავისუფალი დემოკრატების" წევრია.
ბატონი ვახტანგის თანამდებობიდან გათავისუფლება დააჩქარა პროფკავშირების თავმჯდომარემ ლანჩხუთში მაგული კუნჭულიამ, რომელსაც დიდი სურვილი აქვს დაიკავოს გამგებლის მოადგილის თანამდებობა; იმის ნაცვლად, რომ პროფკავშირი იყოს დაინტერესებული ადამიანის უფლების დაცვით, პირიქით ხდება. დღეს ბატონ ვახტანგს მაგული კუნჭულიამ უთხრა, რომ იგი თანამდებობიდან კანონიერად გაათავისუფლეს. რა იცის მან წინასწარ, სასამართლოს გადაწყვეტილებამდე, რაა კანონიერი?! კუნჭულიას პროფკავშირი ერთი დიდი საექსკურსიო ბიურო ჰგონია!
ვარწმუნებ ყველას, რომ ვახტანგ ზენაიშვილი თანამდებობიდან უკანონოდაა გათავისუფლებული, რასაც კვალიფიციური იურისტებიც ადასტურებენ, და ძალიან მალე აღდგება სამსახურში, მაგრამ ამ საქმის მონაწილეებმა უნდა იქონიონ სინდისი და დატოვონ თანამდებობები! _ განაცხადა ჩხაიძემ.
საკრებულოს წევრი პარტია "თავისუფალი დემოკრატებიდან გიორგი ჩახვაძე მიიჩნევს, რომ "როგორც წინა ხელისუფლების დროს, ახლაც ქვეყანაში დემოკრატია არ დგას იმ საფეხურზე, როცა პოზიციას და ოპოზიციას თანაბრად მიეცემა საშუალება, განსხვავებული აზრის მიუხედავად, ერთად წარმართონ და გადაწყვიტონ ქვეყნის საჭირბოროტო საკითხები".
პარტია "თავისუფალი დემოკრატების" წევრი თამარ ასკურავა ეთანხმება თანაპარტიელებს და მიიჩნევს, რომ "ქართული ოცნების" ხელისუფლებაში მოსვლის შემდეგ, ეს არ არის არც პირველი და არც უკანასკნელი თანამდებობიდან უკანონოდ გათავისუფლების შემთხვევა."
თავად ვახტანგ ზენაიშვილმა დეტალურად ისაუბრა, თუ როგორ მიიღო მუნიციპალიტეტის გამგებელმა პოლიტიკური გადაწყვეტილება მისი გათავისუფლების შესახებ: "ხუთშაბათი დღე იყო, 11-12 საათი იქნებოდა, როცა გამგებელმა შემომითვალა, რომ ჩემთან საუბარი სურდა. მისი თქმით, არჩევანი უნდა გამეკეთებინა თანამდებობასა და პარტიას შორის, – თუ გინდა თანამდებობაზე დარჩე, მაშინ თანამდებობა უნდა დატოვოო. ამ შემთხვევაში ჩემთვის არ არის მნიშვნელოვანი, რომ ხელფასს და თანამდებობას დავკარგავდი. სახელმწიფო სამსახურში აქამდე არასდროს მიმუშავია, მაგრამ გამქონდა თავი, შეიძლება უკეთესადაც კი, მაგრამ აქ დგება პრინციპების, პოლიტიკური კულტურის და სახელმწიფო ინტერესების საკითხი. ამიტომ, გამგებლის შემოთავაზებაზე უარი განვაცხადე და მანაც მიიღო გადაწყვეტილება: დაიწერა ბრძანება, რომელშიც არანაირი საფუძველი და მიზეზი მითითებული არ არის. ამ ბოლო დროს, იურიდიული სამსახურის უფროსს ემჩნევა, რომ გამგებელს კანონს ისე განუმარტავს, როგორც ეს მას ესიამოვნება, მაგრამ ჩვენ მივმარტავთ სასამართლოს, რომელიც კანონს მართებულად განმარტავს.
ზაზა ურუშაძემ საკუთარ კაბინეტში განმიცხადა, რომ მას "აწვებიან" გუბერნიაში _ შვიდმა კაცმა მაგიდაზე ხელი მიბრახუნა, ზენაიშვილს როგორ აჩერებ სამსახურშიო. აქვე ურუშაძემ მითხრა,თავად თქვი, როგორ იქნება არჩევნების დროს მე რომ გადავდგე და საპარლამენტო არჩევნებში მივიღო მონაწილეობა, მაშინ ხომ შენ უნდა შეასრულო ჩემი მოვალეობა, მაშინ როცა ოპოზიციური პარტიის წარმომადგენელი ხარო. ურუშაძის ეს ქმედებები მომდინარეობს მისი ოცნებიდან, გახდეს პარლამენტის დეპუტატი, მაგრამ როგორც საკუთარ ყურებს ვერ დაინახავს, ისე დეპუტატობას ვერ ეღირსება. ორ თვეს ვაძლევ ვადას, ვერც გამგებელი ვეღარ იქნება, რადგან ეს უმსგავსობა ერთხელ და სამუდამოდ უნდა დამთავრდეს ლანჩხუთში! ჩვენ ბრძოლას წარვმართავთ ორი კუთხით _ გავაპროტესტებთ ხელისუფლების იმ სისტემურ მეთოდოლოგიას, კურსს, ოპოზიცია ჩამოიშოროს სახელისუფლებო შტოებიდან იქნება ეს ადგილობრივი თვითმმართველობები თუ ზედა ეშელონები. ასევე გავაპროტესტებთ თვითმმართველობის დონეზე ზაზა ურუშაძის ქმედებებს, როგორც უვარგისი მენეჯერის, როგორც უვარგისი ხელმძღვანელის, რომელსაც არ შესწევს უნარი მუნიციპალიტეტს უხელმძღვანელოს. ამას ჩვენ გავაკეთებთ ფაქტებითა და დოკუმენტებით, სულ მალე ყველაფერს წარმოვადგენთ.
საერთოდაც, თვითმმართველობაში გადმოიტანო ის, რაც ზევითაა, არ შეიძლება. არც ცენტრალურ ხელისუფლებაში უნდა კეთდებოდეს აქცენტი პარტიულ კუთვნილებაზე, მითუმეტეს თვითმმართველობებში, სადაც სხვა კანონები მოქმედებს, სხვა შინაგანი ურთიერთობები მართავს; პარტიული კუთვნილება ხელს არაფერს უშლის, არანაირი მნიშვნელობა არ აქვს რომელი პარტიის წევრი ვარ, იმისთვის რომ ლანჩხუთში საქმიანობა გავაგრძელო თვითმმართველობის დონეზე. მაგრამ, როცა ადამიანს პასუხისმგებლობის აღება არ შეგიძლია საკუთარ თავზე, როცა სხვას გინდა გადააბრალო ყველაფერი, როცა არასდროს არ იცი არაფერი და ამბობ: არ ვიცი, არ გამიგონია, პირველად მესმის, – ამ ტექსტით მართავ რაიონს, ეს უკვე კითხვის ნიშნებს ბადებს. პარტიულობა არაფერ შუაშია.
მოვუწოდებ "ქართულ ოცნებას", რომ "ოცნებასთან" თავშეფარებული ზაზა ურუშაძე ძალიან მალე გამოვა სამზეოზე და ყველას დავანახებ. რა შვილიც ბრძანდება!"
ვახტანგ ზენაიშვილმა ჟურნალისტების კითხვებსაც უპასუხა:
_ თქვენი სამსახურიდან გაშვებას ხომ არ უკავშირებთ თქვენს ბოლოდროინდელ განცხადებებს კაზარიანის საქმესთან დაკავშირებით?
_ არ ვიცი, ზაზა ურუშაძემ ჩემთან საუბრისას ერთადერთ არგუმენტად ჩემი პოლიტიკური შეხედულება მოიყვანა. მისი თქმით, ვინაიდან მე ვარ "თავისუფალი დემოკრატების" წევრი, გუბერნიაში შეუძლებლად მიაჩნიათ ჩემი ამ თანამდებობაზე მუშაობა. სხვა არგუმენტი ჩვენს შორის არ განხილულა. ურუშაძემ მითხრა, რომ ჩვენ მეგობრები ვართ, მაგრამ ერთი კვირაა ლოგინზე არ უძინია ისეთი ზეწოლა მიმდინარეობს მასზე – ადრე იტყოდა, ძველი გუბერნატორი "მაწვებოდა", ახლა ასეთ დღეში ვარო. მან კაზარიანიც ახსენა და თქვა, რომ ის არაფერ შუაშია. მე მისთვის არაფერი დამიბრალებია, ვთქვი ის, რასაც რატომღაც ხალხი ამბობდა და ფიქრობდა.
_ გუბერნატორის როლი როგორია ამ საქმეში და ფიქრობთ, რომ კადრების დანიშვნის საქმეში უშიშროება ერევა?
_ ერევა, რა თქმა უნდა ერევა და რა თქმა უნდა, სისტემური პოლიტიკაა ეს ყველაფერი, რასაც ხელს უწყობს ისიც, რომ რაიონს ხელმძღვანელობს უნებისყოფო, უპრინციპო, უხერხემლო ადამიანი, რომელსაც პირადი ინტერესების გარდა სხვა არაფერი ამოძრავებს, მას მუნიციპალიტეტი საკუთარ ჩოხასავით აქვს მორგებული და მიაჭენებს როგორც უნდა ისე. ზაზა ურუშაძე რომ თავის სიმაღლეზე იდგეს, ის რომ პიროვნება იყოს, ღირსება რომ ქონდეს, მაშინ ასეთ მითითებებს არ მიიღებდა და ვერ აიტანდა. მას აქვს შანსი ახლაც, თუ არ უნდა ამ ფარსში მონაწილეობა, კეთილი ინებოს და გადადგეს, ნუ იქნება ამ სისტემური დანაშაულის ნაწილი. წინა გუბერნატორის დროს მან ვერ შეასრულა დავალება ჩემს გათავისუფლებასთან დაკავშირებით, იმიტომ რომ პირველები ჩვენ ვიყავით, ვინც ურუშაძე დაიცვა მაშინ.
კითხვაზე, რატომ გაათავისუფლეთ ზენაიშვილიო, ურუშაძე პასუხობს, ახალი სიცოცხლე მინდა შემოვიტანო გამგეობაშიო, – მალე გავასაჯაროებ, როგორ ადევს რეზოლუციებს ზაზა ურუშაძე და ამის ნახვის შემდეგ არ გაგიკვირდებათ, როგორ არჩევს ის კადრებს. მისი დასაყრდენი ინტელექტუალების ნაწერი რომ ნახოთ, გაოცდებით! კაი ხანს ვითმინეთ და აღარ დავუშვებთ ეს უვიცობა, ეს სიბნელე, ეს უსწავლელობა კიდევ აჯდეს ლანჩხუთის რაიონს თავზე და ისე მიაჭენებდეს, როგორც მოეპრიანებათ.
ჩვენ ვიბრძოლებთ სუფთა პოლიტიკური მეთოდებით და ურუშაძეს ნუ ეგონება, რომ რადგან არჩეულია, რამე გარანტირებული აქვს. მრავალი პოლიტიკური მეთოდი არსებობს, იმპიჩმენტსაც მივმართავთ, მოსახლეობასაც, ყველა მეთოდს გამოვიყენებთ, რომ ის თანამდებობას ჩამოვაშოროთ. დუღილის ტემპერატურა კი არ გაჩერდება, არამედ მოიმატებს!
პრესკონფერენციაზე დასახელებული პირების _ ზაზა ურუშაძის და მაგული კუნჭულიას კომენტარებს მოგვიანებით შემოგთავაზებთ.
