“გურია ნიუსის” სტატიას გარემოს დაცვის სამინისტროს რეაგირება მოჰყვა

გარემოს დაცვის მინისტრმა გიგლა აგულაშვილმა "გურია ნიუსისთვის" მიცემული პირობა შეასრულა _ ჩვენს მიერ გამოქვეყნებულ სტატიას, რომელიც ჩოხატაურის მუნიციპალიტეტის სოფელ ერკეთის ახალაშენებულ საბავშვო ბაღის შენობის პრობლემებს ეხებოდა, რეაგირება მოჰყვა.გარემოს დაცვის სამინისტროს გეოლოგიის დეპარტამენტმა საბავშვო ბაღის შენობების (ძველი და ახალაშენებული) განთავსების ადგილების გეოდინამიკური პირობების შესახებ ვიზუალური საინჟინრო-გეოლოგიური დასკვნა დადო.

დოკუმენტში აღნიშნულია, რომ ერკეთში მდებარე საბავშვო ბაღის შენობების განთავსების და მათი მიმდებარე სივრცის გეოდინამიკური მდგომარეობა გეოლოგიის დეპარტამენტის მთავარმა და წამყვანმა სპეციალისტებმა საქართველოს გარემოსა და ბუნებრივი რესურსების დაცვის მინისტრის გიგლა აგულაშვილის დავალების თანახმად ადგილზე გასვლით შეაფასეს:

_ სოფელი ერკეთი, კერძოდ მისი ცენტრალური უბანი მდებარეობს მდინარე სუფსის ხეობის მარცხენა, ეროზიულ-ძველმეწყრულ ფერდობზე, რომლის დახრილობა 8-25 გრადუსის ფარგლებშია. საბავშვო ბაღის ორივე შენობა განთავსებული ზემოთ აღწერილი ფერდობის ლოკალურ, შედარებით მდგრად ადგილებზე.

ჩვენ მიერ 2013 წლის გაზაფხულზე შედგენილ დასკვნაში აღვნიშნავდით, რომ ბაღის ძველ შენობაზე დაფიქსირებული მცირე ზომის ბზარები ძირითადად გამოწვეული იყო ნაგებობის უხარისხო მშენებლობით და მისი არასწორი ექსპლუატაციით. ამ შენობაში დღესაც მიმდინარეობს აღზრდა-განათლებითი პროცესი და პირველ სექტემბრამდე (ახალი ბაღის შენობის გახსნის თარიღი) მას რაიმე შეფერხება არ ემუქრება. 

 რაც შეეხება ბაღის ახალ შენობას, ის აგებულია ხელოვნურად მოსწორებულ ზედაპირზე. ნაგებობის კედლებზე იშვიათად ფიქსირდება 1-2 მმ. სიგანის ბზარები, ხოლო საძირკველის მიმდებარედ არსებულ უმნიშვნელო ჩადაბლებებში ზედაპირული წყლის მცირედი გუბურებია," _ წერია დასკვნაში.

გარემოსა და ბუნებრივი რესურსების გეოლოგიის დეპარტამენტი  ნაგებობის ნორმალური ექსპლუატაციის პირობების უზრუნველსაყოფად ადგილობრივ მუნიციპალიტეტს რეკომენდაციებს აძლევს და პრევენციული ღონისძიებების გატარებას ურჩევს:

"უნდა მოხდეს ზედაპირული და ნაგებობის სახურავიდან ჩამონადენი წყლების ორგანიზებული გადაყვანა იქვე ახლოს არსებულ ხევში;

ნაგებობის გარშემო გაკეთდეს ჰიდროსაიზოლაციო საფარი (შემონაკირწყლი), რათა გამოირიცხოს საფუძვლის გრუნტების ზედმეტი დატენიანება და მისგან გამოწვეული უარყოფითი შედეგები;

სამშენებლო მოედნის მოშანდაკების დროს ხელოვნურად ჩამოჭრილი ფლატეს გასწვრივ გაკეთდეს არანაკლებ 2 მეტრამდე სიმაღლის რკინა ბეტონი კედელი;

 საჭიროა კედელსა და ფლატეს შორის სივრცე შეივსოს ბალასტით, რაც ხელს შეუწყობს გრუნტის წყლების დრენირებას;

საჭიროა ფლატეს წარბის ზოლში ფიქსირებული ლოდების გატანა და არსებული ზოლის რელიეფის ზედაპირის შეძლებისდაგვარად დახრილობის შემცირება," _ აღნიშნულია რეკომენდაციაში, რომელსაც ხელს გეოეკოლოგიურ გართულებებზე რეაგირების სამმართველოს მთავარი სპეციალისტი, სტიქიური პროცესებისა და საინჟინრო-გეოლოგიის სამმართველოს წამყვანი სპეციალისტი და გეოლოგიის დეპარტამენტის უფროსი აწერენ.

ამავე დასკვნაში აღნიშნულია, რომ  ჩოხატაურის მუნიციპალიტეტის გამგებლის წარმომადგენლის კახა თედორაძის გადმოცემით, ბაღის შენობის კედელსა და ფლატეს შორის არსებულ ზოლში მშენებლებს  დაგეგმილი აქვთ სადრენაჟო მილის გრუნტში ჩადება, რაც კიდევ უფრო გაზრდის გრუნტის წყლების დრენირებას.

"ზემოთ ჩამოთვლილი ღონისძიებების დროულად და ხარისხიანად შესრულება ხელს შეუწყობს საბავშვო ბაღის ნაგებობის ნორმალურ ექსპლუატაციას,"  _ წერენ სპეციალისტები.

ჯერჯერობით, უცნობია გაითვალისწინებენ თუ არა ამ რეკომენდაციებს ჩოხატაურის მუნიციპალიტეტში. გამგებლის მოადგილის თამაზ ჯინჭარაძის თქმით, ამ თემაზე კომენტარი პირველმა პირმა უნდა გააკეთოს, რომელიც გასულ კვირას საქართველოში არ იმყოფებოდა. 

ირაკლი კუჭავას თქმით, კომენტარს მას შემდეგ გააკეთებს, რაც დასკვნას გაეცნობა.

აღსანიშნავია, რომ გარემოს დაცვის სამინისტრომ გარდა ამ შემთხვევისა, ყურადღება გაამახვილა ჩვენს სტატიაში აღნიშნულ კიდევ ერთ ფაქტზე _ დეკემბერში ჩაბარებული საბავშვო ბაღის შენობის (რომელსაც უკვე ბზარები აქვს) მიმდებარე ტერიტორიაზე დაყრილ სამშენებლო ნაგავზე. როგორც სამინისტროში გვითხრეს, მუნიციპალიტეტს აღნიშნული ტერიტორიის დასუფთავება დაევალა.