მიუხედავად იმისა, რომ სამართალდამცველებმა ჩხაიძეს ფერმის მტვრადქცეული საცავიდან ახალთახალი ტომრით ავტომატი, ხოლო სახლში ქათმის ბუდიდან ახალდადებულ კვერცხთან ერთად ავტომატის მჭიდი “აღმოუჩინეს”. ზოგადად, რა თქმა უნდა, დაუჯერებლად ჩანს რადიკალ ოპოზიციონერს, რომელსაც იარაღთან შეხება ჰქონდა (აფხაზეთსა და სამაჩაბლოში საქართველოს ერთიანობისთვის იბრძოდა და ამ მხრივ მისადმი არანაირი კითხვები არ არსებობს!) სახლში ან ფერმაში ავტომატი შეენახა! ამასთან, გაუგებარია ხელისუფლების თუ სამართალდამცველების ქმედება _ მართლაც რომ ავტომატი ჰქონოდა ჩხაიძეს, ყველა შემთხვევაში ეს სკანდალი იყო და თუნდაც წმინდა პროფესიონალური კუთხითაც არ უნდა “აწყობდეთ” მისი დაკავება. ანუ წესით ხელისუფლებასა არ უნდა დაეგეგმა ასეთი ოპერაცია.
მაშ, რა მოხდა? როგორც ლანჩხუთელ “რესპუბლიკელთა” ლიდერმა რომან ბიწაძე ამბობს, “ელგუჯა არის აფხაზეთის და “ასოცსაათიანი” აგვისტოს ომის მონაწილე, ამიტომ ადვილი დასაჯერებელი შეიძლება იყოს ხალხისთვის, რომ ჩხაიძეს ჰქონოდა ცეცხლსასროლი იარაღი, მით უმეტეს, რომ მას წლების უკან დოკუმენტალურად ჩაბარებული აქვს ავტომატი შესაბამის უწყებაში. აქედან გამომდინარე, ძალოვნებს იმედი აქვთ, აფიქრებინონ ვინმეს, რომ ჩხაიძემ ერთი იარაღი კი ჩააბარა, მაგრამ შესაძლებელია, მეორეც ჰქონოდაო. ელგუჯა სიგარეტსაც არ ეწევა და გურულად რომ ვთქვათ, ნარკოტიკზეც “გაკუჭებულია”, ამიტომ მას ნარკოტიკს ვერ ჩაუდებდნენ”.
პატიმრობიდან გათავისუფლებულმა ელგუჯა ჩხაიძემ პრესკონფერენცია გამართა:
_ ბატონო ელგუჯა, რა ვითარებაში მოხდა თქვენი დაკავება?
_ სახლში ვიყავი, ბიჭები იყვნენ მოსულები სტუმრად და მაგიდასთან ვისხედით. პოლიციიდან დამირეკეს და მითხრეს, რომ ჩემი ნახვა უნდოდათ. მომაკითხეს და წამიყვანეს ჩემს ფერმაში. შემომთავაზეს _ ვინმე წამოიყვანე, თუ გინდა, მეზობელიო. უარი ვუთხარი. მივედით ფერმასთან და იქ მოგვადგა რამდენიმე მანქანა _ უკვე მივხვდი, რაშიც იყო საქმე. იქ ერთ-ერთი ადგილია, სადაც კარგა ხანია არავინ მისულა, ამიტომაც არის მტვერი. სწორედ ამ ადგილიდან ამოიღეს ახალთახალი ტომარა, რომელშიც იდო ავტომატი.
_ ქათმის ბუდეზე მჭიდის აღმოჩენა უკვე საღამოს მოხდა.
_ ეგ მე ოჯახის წევრებისგან ვიცი. ტუალეტში გასვლა მოუთხოვია ერთ-ერთ პოლიციელს და იქიდან აქვს გადანაგდები მჭიდი. არ იცოდა, იქ ქათმის ბუდე თუ იყო, თორემ კვერცხის ქვემოდან მაინც დადებდა მჭიდს, მაგრამ სიბნელე იყო და ვერ დაინახა. სად გაგონილა, რომ ადამიანი იმ ბუდეში დებდეს მჭიდს, საიდანაც ოჯახის წევრები ყოველდღე კვერცხს იღებენ?
_ კონკრეტულ შემთხვევას რა უსწრებდა წინ, ანუ რატომ მაინცდამაინც თქვენ და რატომ ახლა?
_ სავარაუდოდ, ეს უკავშირდება იმ ფაქტს, რომ ბიძინა ივანიშვილის მხარდამჭერი ხელმოწერების შეგროვებას გავუკეთე ორგანიზება. ამასთან, ბოლო დროს ძალიან ვაქტიურობდი. როგორც ჩანს, ინფორმაციებმა ჩვენი პარტიული საქმიანობიდან და ჩვენი გამონათქვამებიდან გაჟონა და შურისძიება ასეთი სახით მოახდინეს.
_ თქვენზე ზეწოლის მოხდენას ცდილობდნენ?
_ ფსიქოლოგიურ ზეწოლას ახდენდნენ, თუმცა, მე არაფერი მქონდა ასაღიარებელი. ყველაფერზე “არა”-ს ვეუბნებოდი, ხელი არაფერზე მოვუწერე. მერე მირჩიეს, “რად გინდა ბოდიალი, აღიარე, რომ წლების წინ შეინახე ეს ავტომატი და გაგიშვებთო”. გამჭვირვალე შენობის მიღმა ისევ ბინძური ქმედებები იმალება. ჩადებაშიც არ არიან პროფესიონალები _ წლების წინ როგორ შევინახავდი ავტომატს, რომელიც ახალთახალ ტომარაში იდო და რომელსაც ჰქონდა წარწერა _ 2011 წელი?! მერე მითხრეს, რატომ ხარ ჩვენზე განაწყენებული, ოჯახის წევრები დაუსაქმებელი გყავსო? არავისთვის მითხოვია სამსახური, ვმუშაობდი და ჩემით მივიღე წასვლის გადაწყვეტილება. პოლიციელებს ვუთხარი _ დემოკრატია მინდა,-მეთქი! ამაზე ირონიულად ჩაილაპარაკეს _ შენ ქვეყანას არავინ დაგანგრევინებსო. რაღაცაზე ვთქვი _ აქედან გავალ და რადგან საქართველოში არ მაყენებთ, საფრანგეთში წავალ,-მეთქი. ამაზე იცინოდნენ _ ამას სამსახური კი არა, საფრანგეთში ცხოვრება უნდაო. მე მათ ვუთხარი, გურულები ფირალებად ოჯახების შეურაცხყოფის შემდეგ მიდიოდნენ და თუ დამჭირდა, ავტომატს მართლაც ვიშოვნი,-მეთქი. ამაზე მკითხეს, სად იშოვიო? რაც ავტომატი გვქონდა, ომში რომ ვიბრძოდით, პოლიციელებისგან ვიყიდე,-მეთქი. ასე იყო მაშინ მართლაც.
თავიდან ადვოკატიც არ მყავდა და სიმართლე გითხრათ, არც მომითხოვია _ დღეს ადვოკატი შებოჭილია. ამათ რაც უნდათ, სასამართლო მაინც იმას ამტკიცებს. როგორც ჩანს, ზემოდან მოუვიდათ დირექტივა. როცა ადვოკატი შემოვიდა და მომილოცა, კალანდას მილოცავდა, მეგონა. მალე გაგიშვებენო, მითხრა. ვფიქრობ, რომ ჩემი დაკავება ადგილობრივ დონეზე მოიფიქრეს და უნიჭოდ შეასრულეს.
_ ფიზიკურ ზეწოლას ადგილი არ ჰქონია?
_ პრინციპში, არა, თუ არ ჩავთვლით ამ ფაქტს: სანამ ადვოკატი მოვიდოდა, შემიყვანეს ერთ-ერთ კაბინეტში, გამიკეთეს ხელბორკილი, ძალიან მომიჭირეს, ერთმა თავი გადამიგრიხა და ამ დროს ხელიდან რაღაცაზე ანაბეჭდები დამატოვებინეს. ვფიქრობ, ეს იყო მჭიდი, რადგან პატარა იყო და ავტომატი ვერ იქნებოდა. ვუთხარი _ თუ ავტომატი და მჭიდი ჩემი იყო, ეს რაში გჭირდებათ,-მეთქი. რა თქმა უნდა, ამაზე რეაგირება არ ჰქონიათ. როცა ჩემი გათავისუფლება გადაწყდა, ყველა ერთდროულად გახდა გმირი _ რატომ დაიჭირეთო, ერთმანეთს ეუბნებოდნენ. ერთადერთი დღე მაქვს პოლიციაში განატარები _ კალანდასთან ერთად დაბადების დღესაც იზოლატორში შევხვდი.
_ რა ხდებოდა სასამართლოზე და რატომ არ მოხდა მასზე მსურველთა დასწრება?
_ ასეთი იყო სასამართლოს და პროკურატურის სურვილი. პროცესისთვის არც მომისმენია, მოსამართლე რაღაცას კითხულობდა, 2 000-ლარიანი გირაო შემიფარდეს და სასამართლო 7 მარტს დანიშნეს. ათი 7 მარტი მოვა, სანამ ეს სასამართლო გაიმართება.
როგორც ჩვენი წყარო ამბობს, ჩხაიძის გათავისუფლების საქმეში დიპლომატიური კორპუსი, მათ შორის ამერიკის საელჩო ჩაერთო. აღნიშნული ინფორმაცია აქვს თავად ჩხაიძესაც. სერიოზული ძალა რომ ჩაერთო, იმ ინფორმაციითაც დასტურდება, რომლის მიხედვითაც, მომხდარის გამო, თანამდებობა დაატოვებინეს ერთ-ერთ პოლიციელს, რომელსაც სავარაუდოდ, მიაწერენ იმ ჩავარდნილ ოპერაციას, რომელმაც ოპოზიციას მხოლოდ პიარი გაუკეთა და საზოგადოება ხუმრობის ხასიათზე დააყენა _ ხელისუფლება ჰიბრიდულ სიმინდს ტყვიებისმდებელი ქათმებით ჩაანაცვლებსო.
