ქალაქ ოზურგეთის მუნიციპალიტეტის ცენტრალური სტადიონის ყოფილმა დირექტორმა მურთაზ აბაშიძემ გურიის ახალ გუბერნატორს გია სალუქვაძეს ოფიციალური წერილით 29 მაისს მიმართა და მასთან პირადად შეხვედრა მოითხოვა. აბაშიძის თქმით, გუბერნატორმა მასთან პირადი შეხვედრის სურვილი არ გამოხატა და ასევე ოფიციალურად უპასუხა.
განცხადებაში, რომელსაც კოლექტიური წერილის სახე აქვს, აღნიშნულია:
“ბატონო გია, ვეტერან მეომართა ერთმა ჯგუფმა გადავწყვიტეთ მოგახსენოთ, რეალურად რა ხდება ოზურგეთის რაიონში. 9 წლის განმავლობაში ვებრძოდით კრიმინალურ ბანდას, ადგილობრივი ხელისუფლება არანაირ ყურადღებას არ იჩენს ჩვენს მიმართ, პირიქით, არც დახმარება, არანაირი დასაქმება ჩვენთვის არ არსებობს.
2008 წლის აგვისტოს მოვლენების ჩათვლით ყველა უბედურებამ ჩვენს კისერზე გადაიარა. 3 წლის უკან ბიძინა ივანიშვილის გამოჩენამ იმედი ჩაგვისახა, რომ სიტუაცია ქვეყანაში და მათ შორის ოზურგეთშიც შეიცვლებოდა, მაგრამ კიდევ ერთხელ მოვტყუვდით, ქალაქის მერმა ბეგლარ სიორიძემ არ დაასაქმა “ქართული ოცნების“ მხარდამჭერები, მეტიც სამსახურიდან გამოუშვა მურთაზ აბაშიძე, რომელიც პირნათლად ასრულებდა მასზე დაკისრებულ მოვალეობას. აბაშიძე სამსახურიდან ყოველგვარი ახსნა-განმარტების საფუძველზე დაითხოვეს. დაზარალებულმა ორჯერ გაასაჩივრა და ორივეჯერ სასამართლომ გამართლებულად სცნო. ქალაქის მერი მოსამართლის გადაწყვეტილებას არ სცნობს. სტადიონის დირექტორის განთავისუფლების შემდეგ, “ქართული ოცნების“ კიდევ 4 მხარდამჭერი გაათავისუფლა სამსახურიდან და მათ ადგილზე მიიყვანეს ისეთი ადამიანები, რომლებსაც ფეხბურთთან არანაირი შეხება არ აქვს. ისინი ბეგლარ სიორიძის ახლობლები და მხარდამჭერები, ყოფილი „ნაციონალები“ არიან. ჩვენ ვეტერანი მეომრები გთხოვთ დროულად იქნას გამოძიებული ეს საქმე, თუკი თქვენ სურვილი გექნებათ ჩვენთან შეხვედრის მოვალთ და ყველაფერს მოგახსენებთ. ჩვენ, ვეტერანი მეომრები, თუ კი სამართალი არ აღსდგება, მივმართავთ რადიკალურ ზომებს. კიდევ ერთხელ გიმეორებთ, ჩვენ ვართ კანონმორჩილები. სისხლი და ოფლი ვღვარეთ და თუ ქვეყანას დასჭირდება, მზად ვართ ეს კიდევ გავაკეთოთ. იმედია ჩვენს თხოვნას რეაგირების გარეშე არ დატოვებთ“ _ აღნიშნულია კოლექტიურ წერილში.
მურთაზ აბაშიძე “ გურია ნიუსთან“ აღნიშნავს, რომ გურიის გუბერნატორმა მასთან შეხვედრის სურვილი არ გამოხატა და წერილს ასევე ოფიციალურად უპასუხა:
“ ბატონო მურთაზ, თქვენი 2015 წლის 29 მაისის კოლექტიური განცხადების პასუხად გაცნობებთ, რომ 2015 წლის 4 ივნისს კორესპონდენციით (#412) მივმართეთ ქალაქ ოზურგეთის მუნიციპალიტეტის მერიას, მოეწოდებინათ ინფორმაცია განცხადებაში მოყვანილ გარემოებებთან დაკავშირებით.
საპასუხო 2015 წლის 8 ივნისის წერილით გვეცნობა, რომ შრომითი საქმიანობისას ჩადენილი უხეში დარღვევების გამო, ა(ა).ი.პ. “ ქალაქ ოზურგეთის მუნიციპალიტეტის ცენტრალური სტადიონი“ -ს დირექტორის თანამდებობიდან განთავისუფლდით 2014 წლის 2 დეკემბერს.
„საქართველოს ორგანული კანონის “ ადგილობრივი თვითმმართველობის კოდექსის“ თანახმად, დანიშვნა-განთავისუფლება მერის ექსკლუზიური უფლებამოსილებაა, ხოლო ადგილობრივი თვითმმართველობის ორგანოები ექსკლუზიურ უფლებამოსილებებს ახორციელებენ საქართველოს კანონმდებლობით დადგენილი წესით _ დამოუკიდებლად და საკუთარი პასუხისმგებლობით.
ამასთან, ქ. ოზურგეთის მუნიციპალიტეტის მერის წერილით გვეცნობა, რომ თქვენი სამსახურში აღდგენის საქმის განხილვა მიმდინარეობს ქ. ქუთაისის სააპელაციო სასამართლოში. ხსენებულიდან გამომდინარე სასამართლო პროცესის დასრულებამდე, შეზღუდულნი ვართ გავატაროთ სარეკომენდაციო ხასიათის ქმედითი ღონისძიებები შუამდგომლობის სახით“.
გურიის გუბერნატორი ასევე უგზავნის აბაშიძეს ოფიციალურ წერილს, რომელიც გუბერნიას ქალაქ ოზურგეთის მერიამ მიწერა:
„2015 წლის 4 ივნისის წერილის პასუხად გაცნობებთ, რომ რომ ა.(ა.) ი.პ. ქალაქ ოზურგეთის მუნიციპალიტეტის ცენტრალური სტადიონის დირექტორი მურთაზ აბაშიძე შრომით საქმიანობისას ჩადენილი უხეში დარღვევის გამო დირექტორის თანამდებობიდან გათავისუფლდა 2014 წლის 2 დეკემბერს.
2014 წლის 26 დეკემბერს ბ. მურთაზ აბაშიძემ სარჩელით მიმართა ოზურგეთის რაიონულ სასამართლოს და მოითხოვა, მისი განთავისუფლების შესახებ ქალაქ ოზურგეთის მერის 2014 წლის 2 დეკემბერს გამოცემული ბრძანების ბათილად ცნობა.
ოზურგეთის რაიონულმა სასამართლომ 2015 წლის 18 თებერვლის გადაწყვეტილებით დააკმაყოფილა მურთაზ აბაშიძის სარჩელი და ბათილად სცნო ქალაქ ოზურგეთის მუნიციპალიტეტის მერის ბრძანება.
მერიას მიაჩნია, რომ ოზურგეთის რაიონული სასამართლოს გადაწყვეტილება მოკლებულია სამართლებრივ საფუძველს, სასამართლომ სწორად (ობიექტურად) არ შეაფასა და სრულყოფილად არ გამოიკვლია საქმეში არსებული ფაქტობრივი გარემოებები. შესაბამისად მუნიციპალიტეტის მერიამ ოზურგეთის რაიონულ სასამართლოს 18. 02. 2015 წლის გადაწყვეტილება გაასაჩივრა ქუთაისის სააპელაციო სასამართლოში. დღეის მდგომარეობით, საქმე წარმოებაში მიღებულია და ველოდებით სასამართლოს სხდომის ჩანიშვნას.
აღნიშნულ განცხადებას ხელს ბეგლარ სიორიძე აწერს.
სტადიონის ყოფილი დირექტორი “ გურია ნიუსთან“ მერის მხრიდან მის გადაბირებაზეც საუბრობს. მისივე თქმით, მას ღამის 11 საათზე დაურეკეს და მერთან ბეგლარ სიორიძესთან შეხვედრა სთხოვეს.
შეხვედრა ღამით, მერის სამუშაო ოთახში შედგა. სიორიძემ მას გაჩუმების სანაცვლოდ ქალაქ ოზურგეთის მუნიციპალიტეტის ცენტრალური სტადიონის გენერალური დირექტორის მოადგილის პოსტი შესთავაზა, რაზეც აბაშიძემ უარი განაცხადა.
“ველოდებოდი გუბერნატორიდან კონკრეტულ პასუხს, რომ შემხვდებოდა, გამესაუბრებოდა, დაინტერესდებოდა ამ საკითხით, თუმცა მივიღე სხვა შედეგი, გაწბილება, რაც ცუდ რამეზე მიგვანიშნებს.
25 აპრილს მიმართა ბეგლარმა სასამართლოს, სადაც ალბათ უთხრეს, რომ ვერ მოიგებდა ამ პროცესს და ამ პიროვნებასთან მორიგდიო, 27 აპრილს კი ღამის 11 საათზე მან ჩემთან შეხვედრა მოითხოვა.
თუ დამნაშავე ვიყავი, რატომ მოისურვეს ჩემთან შეხვედრა ღამის 11 საათზე? რატომ მომთხოვა გაჩუმება თანამდებობის სანაცვლოდ? თუ არ მეკუთვნოდა რატომ ჩამერიცხა ხელფასი 2000 ლარის ოდენობით? “ _ ამბობს აბაშიძე.
ქალაქ ოზურგეთის მერი მურთაზ აბაშიძის ბრალდებებს უარყოფს, ხოლო შეხვედრას და თანამდებობის შეთავაზებას ადასტურებს. მერის პოზიცია აღნიშნულთან დაკავშირებით ასეთია:
“ცალსახად შემიძლია ვთქვა, რომ ქალაქის მერიისა და ა.ა.ი.პ.-ების მხრიდან თანამშრომლები პარტიული ნიშნით არც ინიშნებიან და არც თავისუფლდებიან. სამსახურში მიღების ან დათხოვნის დროს ჩემთვის აბსოლუტურად არა აქვს მნიშვნელობა, ვინ რომელი პარტიის მხარდამჭერია. ხოლო ვინც ‘’ქართულ ოცნებას’’ გაწეულ ღვაწლს აყვედრის, ამ პარტიის მტერი სწორედ ის არის. გაუგებარია სტადიონის რომელ ოთხ თანამშრომელზე და ჩემს ახლობლებზეა საუბარი, დააკონკრეტოს ბატონმა მურთაზმა, ვისზე საუბრობს.“
რაც შეეხება აბაშიძესთან შეხვედრის ფაქტს, გამომდინარე იქედან, რომ მურთაზ აბაშიძეს არ გააჩნია მენეჯერული თვისებები და არ არის საკმარისად კომპეტენტური დირექტორის პოსტისთვის, შევთავაზე დირექტორის მოადგილის პოსტი. თუმცა მან შეთავაზებაზე უარი განაცხადა. რაც შეეხება სასამართლო გადაწყვეტილების აღსრულებას, ქალაქ ოზურგეთის მუნიციპალიტეტის მერიას მიაჩნია, რომ ოზურგეთის რაიონული სასამართლოს გადაწყვეტილება სამართლებრივ საფუძველს მოკლებულია. სასამართლომ ობიექტურად არ შეაფასა გარემოებები. შესაბამისად, ქალაქის მერიამ ოზურგეთის რაიონული სასამართლოს 18.02.2015 წლის გადაწყვეტილება ქუთაისის სააპელაციო სასამართლოში გაასაჩივრა. დღეის მდგომარეობით საქმე წარმოებაში მიღებულია და ვიმოქმედებთ სასამართლოს გადაწყვეტილების შესაბამისად“ _ აღნიშნავს ქალაქ ოზურგეთის მერი.
რატომ არ გამოთქვა გურიის გუბერნატორმა მურთაზ აბაშიძესთან შეხვედრის სურვილი და დაინტერესდა თუ არა ის საკითხის შესწავლით, გუბერნატორი გვპასუხობს, რომ თუ კი ვინმეს მასთან შეხვედრის სურვილი აქვს, ის მზადაა ყოველ ოთხშაბათს მიიღოს მოქალაქეები.
“ დღეში ჩემთან შემოდის ძალიან ბევრი განცხადება, ასე ზეპირად არ მახსოვს ვინ არის მურთაზ აბაშიძე. რაც შეეხება ჩემთან შეხვედრის სურვილს, კი ბატონო, გადაეცით, რომ აუცილებლად შევხვდები და მოვუსმენ, მოვიდეს“ – განაცხადა გუბერნატორმა.
