გამოცემა "Bild"-ის ინფორმაციით, მსოფლიოში, მათ შორის, ევროპის ქალაქებში, სასტუმრო ნომრების ფასები კვლავ იზრდება.
გერმანელ ექსპერტთა მონაცემებით, სასტუმრო ნომრების ღირებულება გაიზარდა ამ ქვეყნის უმსხვილესი ოცი ქალაქიდან ჩვიდმეტში და მსოფლიოს სახელმწიფოების დედაქალაქების ნახევარზე მეტში, მაგრამ აქაც არსებობს გამონაკლისები – ამსტერდამი, სტამბული, ლისაბონი და მეხიკო, სადაც უკანასკნელ პერიოდში ფასები 5-10 პროცენტით შემცირდა.
ევროპაში სასტუმროების ყველაზე ძვირი ნომრები კვლავაც მოსკოვშია. რუსეთის დედაქალაქში ნომერი ერთი დღე-ღამით საშუალოდ 158 ევრო ღირს.
ტრადიციულად, ძვირია სასტუმროში ღამის გათევა სკანდინავიის ქვეყნებშიც. ჰელსინკისა და სტოკჰოლმში სასტუმროების ნომრის ფასი 120-126 ევროა, კოპენჰაგენსა და ოსლოში კი – 140-143 ევრო.
ლონდონში ნომრის ფასი 140 ევრომდეა, ციურიხში – 126, პარიზში კი – 117 ევრო.
მსოფლიოში ყველაზე ძვირი სასტუმროები ავსტრალიურ სიდნეიშია, სადაც ნომრის ფასი უკანასკნელი წლის განმავლობაში 147-დან 264 ევრომდე გაიზარდა.
არის გამონაკლისებიც. მაგალითად ამერიკის შეერთებული შტატების უმსხვილეს მეგაპოლისში, ნიუ-იორკში, ნომრის ფასი შარშანდელი 234-დან 168 ევრომდე შემცირდა. იგივე მოხდა დუბაიშიც – ნომრის ღირებულება 159-დან 107 ევრომდე დაეცა.
