როგორც ოზურგეთის მუნიციპალიტეტის საკრებულოდან და გამგეობიდან მიღებული ოფიციალური წერილიდან გავიგეთ, მიმწოდებელი ვალდებული იყო, 2011 წლის 31 დეკემბერს, ოზურგეთში მოეწყო საახალწლო საზეიმო შოუ-კონცერტი შემსყიდველის მიერ განსაზღვრული ჯგუფის _ “ფემილის” მონაწილეობით. ასევე, ხელშეკრულებით ირკვევა, რომ კონცერტის მონაწილეთა გადაადგილება ოზურგეთამდე და უკან, მონაწილე ჯგუფის წევრების სასტუმროში დაბინავება, სცენის გახმოვანება-განათება, საკონცერტო ნომრების შესრულებისა და გახმოვანების მაღალი ხარისხი უნდა უზრუნველეყო.
ოზურგეთში, ახალი წლის ღამეს, თეატრალურ მოედანზე ღია ცის ქვეშ ჯგუფი “ფემილის” (Fამილყ) წევრებმა რამდენიმესაათიანი კონცერტი გამართეს; მსმენელი კონცერტით უკმაყოფილო არ დარჩენილა, თუმცა ყველამ ერთხმად აღიარა, რომ 45 ათასი ლარი რამდენიმესაათიანი კონცერტისთვის ძალიან დიდი თანხა იყო და ამ თანხის დახარჯვა ამ საღამოსთვის არ ღირდა. როგორც დოკუმენტიდან გავარკვიეთ, აღნიშნული ჯგუფის წევრებს, ჰონორარის სახით 5 000 ლარი ერგოთ.
“სოლისტების სასტუმრო მომსახურება 9 ადამიანზე, 315 ლარი დაჯდა; სოლისტების ტრანსპორტით მომსახურება თბილისი-ოზურგეთი-თბილისი _ 1711 ლარი; საშემოსავლო 20% სოლისტების მომსახურებაზე _ 1 756 ლარი და 50 თეთრი; შპს “სითი ივენთს” სცენაზე გახმოვანების და განათების მოწყობა გენერატორით (თიკო ნიჟარაძე) _ 12 000; შპს “ბიზნეს პროტოკოლი პლიუსის” იურისტის ხელფასის ხარჯები საშემოსავლო 20%-ის ჩათვლით _ 6 250 ლარი; შპს “ბიზნეს პროტოკოლი პლიუსის” ფინანსისტის ხელფასის ხარჯები საშემოსავლო 20%-ის ჩათვლით _ 6 250 ლარი. შპს “ბიზნეს პროტოკოლი პლიუსის” თანამშრომლების ხელფასების ხარჯები საშემოსავლო 20 %-ის ჩათვლით _ 3 211 ლარი”, _ აღნიშნულია შპს “ბიზნეს პროტოკოლი პლიუსის” მიერ წარმოდგენილ ხარჯთაღრიცხვაში.
“გურია ნიუსი” ჯგუფი “ფემილის” ერთ-ერთ წევრს თამუნა ლეკვეიშვილს და მის მეუღლეს, აღნიშნული ჯგუფის დამაარსებელს გიგი ოქროპირიძეს დაუკავშირდა. თამუნამ და გიგიმ, ჩვენგან გაიგეს, რომ კონცერტის ჩასატარებლად 45 000 ლარი იყო გამოყოფილი. მათი თქმით, წარმოდგენაში მონაწილეობისთვის ჯგუფმა მხოლოდ 5 000 ლარი მიიღო.
თამუნა ლეკვეიშვილი: _ წავიკითხე თქვენი სტატია, ძალიან არასასიამოვნო და გასაკვირი იყო ჩემთვის, როცა წერდით, რომ მაყურებელი კმაყოფილი არ დარჩა… დიახ, სიამოვნებით გიპასუხებთ კითხვებზე.
_ ვისი მოწვევით გამართეთ კონცერტი? როგორც ირკვევა, თქვენ ძალიან ძვირადღირებული ანსამბლი აღმოჩნდით.
_ ახალ წელს ჩასატარებელი ღონისძიებებისთვის, საქართველოს პრეზიდენტის ფონდიდან გამოიყო თანხები და ყველა რაიონში ჩატარდა კონცერტები. ჩემს მეუღლეს ჰყავს ჯგუფი. მე არაფერ შუაში ვარ, ჯგუფის ერთ-ერთი წევრი ვარ. მერიიდან დაურეკეს, 5 000 ლარს ჩაგირიცხავთ, თუ ჩაატარებთ ოზურგეთში კონცერტსო. მე მაქვს ბლანკის ამონაწერი, რითაც დასტურდება, რომ ჩამერიცხა 5 000 ლარი; აქედან, 3 000 ლარი გადანაწილდა ჯგუფის სხვა წევრებზე და 2 000 ლარი ავიღეთ მე და ჩემმა მეუღლემ.
_ იქნებ, თქვენი ჯგუფის შესახებ გვითხრათ _ როდის შეიქმნა… ოზურგეთელები “ფემილის” წევრებისგან მხოლოდ თქვენ გიცნობდათ. ასევე, საინტერესოა, როგორ გადანაწილდა 45 000 ლარი?
_ მე არაფერი ვიცი, როგორ გადანაწილდა დანარჩენი თანხები.
_ შპს “ბიზნეს პროტოკოლი პლიუსის” თავმჯდომარეს, ლევან ლომინაძეს იცნობთ?
_ ერთი წუთით, ჩემს მეუღლეს დაგალაპარაკებთ, მან უფრო კარგად იცის ყველაფერი.
გიგი ოქროპირიძე, ჯგუფი “ფემილის” დამაარსებელი: _ ლევანს ვიცნობ, ლევანი დამიკავშირდა და შემითანხმდა კონცერტთან დაკავშირებით.
მე, ძალიან დიდი ხანია ვწერ სიმღერებს, სხვადასხვა სახელით გამოდიოდა ჩემი ჯგუფები. შეგიძლიათ სოციალურ ქსელებში ნახოთ. “ფემილი” სპონტანურად შეიქმნა, რამდენიმე მუსიკოსი მივდივართ, ვუკრავთ და ვატარებთ კონცერტებს. მე, არ ვიცი ზუსტად რამდენი ლარი იყო გამოყოფილი… ის კი ვიცი, რომ კონცერტზე ბოლომდე დავიხარჯეთ და კარგი სიმღერები შევთავაზეთ მაყურებელს, _ გვითხრა გიგი ოქროპირიძემ.
შპს “ბიზნეს პროტოკოლი პლიუსის” დამფუძნებელმა, ლევან ლომინაძემ “გურია ნიუსთან” მას შემდეგ არ ისურვა საუბარი, რაც ჩვენი კითხვა: როგორ მოხდა თანხის გადანაწილება და რატომ ერგოთ მომღერლებს დაბალი და მისი ორგანიზაციის წარმომადგენლებს გაცილებით მაღალი ჰონორარი, მოისმინა (სატელეფონო საუბრის სტილი დაცულია):
_ ბატონო ლევან, ოზურგეთში კონცერტის ჩატარებისთვის, პრეზიდენტის ფონდიდან, თქვენ მიერ დაფუძნებულ შპს-ს ჩაერიცხა 45 000 ათასი ლარი; როგორ გადანაწილდა აღნიშნული თანხა?
_ მოდით, დავიწყოთ თავიდან. პირველ რიგში, ვინ მოგცათ ჩემი ნომერი? მეორე, რაც ჩატარდა მანდ, გადანაწილდა ყველაზე. ასე დეტალურად, მე, ჯერ ერთი, არც მახსოვს და მეორე ის, რომ სრული უფლება მაქვს, არც გითხრათ და მერე მესამე, რატომ ხდება ასე ჩაძიება?
_ “გურია ნიუსი” ამ საკითხთან დაკავშირებით მუშაობს და გვაინტერესებს, რა მოხდა…
_ გადმომრიცხავს დაელაპარაკეთ, თქვენ ხომ გაქვთ ეს ინფორმაცია ისედაც?
_ ჩვენ ინფორმაციას ვამოწმებთ.
_ მინდა გითხრათ, რომ არასწორი ინფორმაცია გაქვთ. დავიწყოთ იქედან, იმიტომ, რომ, თქვენ გიწერიათ კონკრეტულად ერთმა ჯგუფმა მიიღო ეს თანხა, რაც აბსურდია, აბსოლუტური სისულელეა, პირდაპირ რომ ვთქვათ. მე, უკაცრავად, შეხვედრაზე შევდივარ და უბრალოდ, ვერ დაგელაპარაკებით.
_ მაშინ თქვენ გვითხარით, რა არის სიმართლე?
_ სიმართლე, სიმართლე… კაი, უკაცრავად, კარგად ბრძანდებოდეთ, _ ასე “შეეცადა” “აბსურდული სისულელის” გაბათილებას ლომინაძე.
შპს “ბისნეს პროტოკოლი პლიუსი” 2010 წლის 28 სექტემბერს დაფუძნდა და მისი ერთპიროვნული მეწილე თავად ლომინაძეა.
ასევე, დოკუმენტიდან ირკვევა, რომ ოზურგეთის მუნიციპალური კულტურის ცენტრსა და შპს “ბიზნეს პროტოკოლი პლიუსს” შორის ხელშეკრულება გამარტივებული სახელმწიფო შესყიდვის საფუძველზე შედგა. ოზურგეთის მუნიციპალიტეტის გამგებლის მოვალეობის შემსრულებლის, ილია ვაშაყმაძის თქმით, გამარტივებული შესყიდვა გახორციელდა “სახელმწიფო შესყიდვების შესახებЙЙ საქართველოს კანონის პირველი მუხლის 3 პუნქტის “ეЙЙ ქვეპუნქტის შესაბამისად.
საქართველოს ახალგაზრდა იურისტთა ასოციაციის ოზურგეთის ოფისის ინფორმაციით, ამ კანონის მოქმედება არ ვრცელდება შემდეგ სახელმწიფო შესყიდვებზე:
“საქართველოს პრეზიდენტის, საქართველოს პარლამენტის თავმჯდომარის, საქართველოს პრემიერ-მინისტრის, საქართველოს მინისტრის, საქართველოს სახელმწიფო მინისტრის ან/და ქ. თბილისის მერის შეხვედრებისა და ვიზიტების, საქართველოს პარლამენტში დელეგაციების მიღებისა და საქართველოს პარლამენტის დელეგაციების საზღვარგარეთ ვიზიტების ორგანიზების უზრუნველსაყოფად, საქართველოს საგარეო საქმეთა სამინისტროში დელეგაციების მიღებისა და საქართველოს საგარეო საქმეთა სამინისტროს დელეგაციების საზღვარგარეთ ვიზიტების ორგანიზების უზრუნველსაყოფად; აგრეთვე, საქართველოს პრეზიდენტის, საქართველოს მთავრობისა და ქ. თბილისის მერიის სარეზერვო ფონდებიდან გამოყოფილი თანხებით გასახორციელებელ სახელმწიფო შესყიდვებზე”, _ გვითხრეს ახალგაზრდა იურისტთა ასოციაციაში.
