"ქალბატონო მარინა, თქვენ იხილავთ ჩემი შვილის შალვა მამალაძის ბრალდების საქმეს გამოძალვის ფაქტზე, როგორც პროცესებიდან ჩანს თქვენ აშკარად ტენდენციურად, მიკერძოებით და არაობიექტურად მიგყავთ საქმე პროკურატურის სასარგებლოდ. აშკარად დაუსაბუთებლად არ დააკმაყოფილეთ ჩვენი ადვოკატების მიერ დასაბუთებული შუამდგომლობები, მათ შორის თქვენი სამართლიანი აცილების საკითხიც. პროცესებზე აშკარად დაარღვიეთ კანონის მოთხოვნებიც. რადგან პროცესი მიგყავთ მიკერძოებით და არასამართლიანად, გვაქვს საფუძვლიანი ეჭვი, რომ ბრალდებულები წინასწარ გყავთ განწირული დასასჯელად"_ ეს იმ წერილის ნაწყვეტია, რომლითაც ოზურგეთის რაიონული სასამართლოს მოსამართლეს მარინა კიკნაძეს, ასევე საქართველოს იუსტიციის უმაღლესი საბჭოს მდივანს და უზენაესი სასამართლოს თავმჯდომარეს ნინო გვენეტაძეს, პატიმრის შალვა მამალაძის დედამ, ქეთევან ნაკაიძემ დღეს ოფიციალურად მიმართა.
ქალაქ ოზურგეთში მცხოვრები ბრალდებულები შალვა მამალაძე, ბესიკ ბორჩხაძე, ნოშრევან ქვეითაია და გიგა შეშელიძე უკვე რვა თვეა პატიმრობაში იმყოფებიან.
ოთხივე მათგანს ბრალდება წარდგენილი აქვს ინდ მეწარმეების დავით და ნიკოლოზ აბაშმაძეებისგან თანხის გამოძალვის ფაქტზე.
ოზურგეთის რაიონულ სასამართლოში აღნიშნულ საქმესთან დაკავშირებით საქმის არსებითი განხილვა და ბრალდების მხარის მტკიცებულებების გამოკვლევა მიმდინარეობს, რომლის დასრულების შემდეგ მოხდება დაცვის მხარის მტკიცებულებების გამოკვლევა.
დღეს ოზურგეთის რაიონულ სასამართლოში უკვე მეოთხე სასამართლო პროცესი ჩატარდა.
ბრალდებულების ინტერესების დამცველი სოსო ჯალაღონია “გურია ნიუსთან“ მოსამართლის მიერ სავარაუდო, მოსალოდნელ, უკანონო გადაწყვეტილების შესახებ საუბრობს:
"როგორც ჩემი დაცვის ქვეშ მყოფმა პირებმა მითხრეს, რამდენიმე თვის წინ პოლიციის მაღალჩინოსნები დაემუქრნენ და მათ მოთხოვეს საქართველოს დატოვება. რაც ცხადია, უკანონობა იყო. ისინი დააშინეს, შემდგეგ მოხდა მათი დაკავება დაზარალებული ძმების დავით და ნიკოლოზ აბაშმაძეების ჩვენების საფუძველზე. აბაშმაძეები არიან ამ საქმის ერთ-ერთი ძირითადი მოწმის პაატა გვარჯალაძის ახლობლები, თანასოფლელები"- ამბობს ჯალაღონია და აღნიშნული ინციდენტის შესახებ ჰყვება:
" აღნიშნული პირები იმყოფებოდნენ პატიმრის, ნოშრევან ქვეითაიას სახლში. ამ დროს ერთ-ერთი გავიდა გარეთ და დარეკა პოლიციელ გვარჯალაძესთან, რომელსაც უთხრა, რომ ნოშრევან ქვეითაია და მისი მეგობრები ძალავდნენ თანხას. იმის ნაცვლად, რომ დაერეკა პოლიციაში და ეს ფაქტი ეცნობებინა, დაუკავშირდა თავის მეგობარს, მთავარ მოწმეს, პოლიციელს გვარჯალაძეს. ამას არც გვარჯალაძე უარყოფს. მან მეგობრად დაასახელა ეს დაზარალებულები. გვარჯალაძე, თავის თანმხლებ პირებთან ერთად, თავს დაესხა უკვე პატიმრობაში მყოფ ადამიანებს."
სოსო ჯალაღონიას მიაჩნია, სასამართლო პროცესები მიმდინარეობს ტენდენციურად:
"არის აშკარად ცუდი ჩვენებები, სასამართლო ამას ყურადღებას არ აქცევს. დავაყენეთ გარკვეული სახის დასაბუთებული შუამდომლობები, არცერთი მოსამართლემ არ დააკმაყოფილა, მოსამართლემ მიკერძოება გამოავლინა, მისი პასუხი იყო მხოლოდ ერთი _ არ კმაყოფილდება თქვენი შუამდგომლობები! მოვითხოვეთ მოსამართლის აცილება მისი ტენდენციურობის გამო. მაგრამ მან არ აიცილა ეს საქმე."
პატიმრების უფლებების დამცველმა დღეს რამდენიმე შუამდგომლობით მიმართა მოსამართლეს, მათ შორის ერთ-ერთი მოწმის, გამომძიებელის მიშა სიხარულიძის მიერ მიცემული ჩვენების დაუშვებლად ცნობა მოითხოვა, რაც მოსამართლემ არ დააკმაყოფილა.
ჯალაღონიას განმარტებით, სიხარულიძის მიერ მიცემული ჩვენება ურთიერთგამომრიცხავი იყო.
"გუშინ დაიკითხა ერთ-ერთი მთავარი მოწმე, პოლიციელი მიშა სიხარულიძე, რომელმაც აშკარად ურთიერთსაწინააღმდეგო ჩვენებები მისცა არა მარტო პროცესზე, არამედ, ასევე დაუპირისპირდა გამოძიების დროს მიცემულ ჩვენებებსაც. მისი ჩვენებები აშკარად წინააღმდეგობაში მოდიოდა სხვა მოწმეების ჩვენებებთან.
ჩვენ დავაყენეთ მოწმის, მიშა სიხარულიძის მიერ მიცემული ჩვენების დაუშვებლად ცნობა. მოსამართლემ ამაზეც უარი გვითხრა და ვერანაირი არგუმენტით ვერ დაასაბუთა ეს უარი.
ამის შემდეგ ოთხივე ბრალდებულმა პროტესტის ნიშნად სხდომა დატოვა. ნაცვლად იმისა, რომ მოსამართლეს სხდომა გაეგრძლებინა, უკანონოდ გადადო, რაც იმაში გამოიხატება, რომ შეწყვიტა მოწმის დაკითხვა და განაცხადა, რომ ხვალ გავაგრძლებთ ამ მოწმის დაკითხვასო, რაც კანონით აკრძალულია. "_აღნიშნავს ადვოკატი.
ბრალდებულების უფლებების დამცველი "გურია ნიუსთან" მოსამართლის უკანონობაზე საუბრობს:
"გვინდა სამართლიანი სასამართლო. არსებულმა სასამართლომ ნაცვლად იმისა, რომ დაცვის მხარესა და ბრალმდებელის მხარეს შეგვიქმნას თანაბარი პირობები, აშკარად ტენდენციურად უდგება დაცვის მხარეს და მის სამართლიან მოთხოვნებს არ აკმაყოფილებს.
დღეს ქალბატონმა მოსამართლემ, ისევ და ისევ დაჟინებით და საპროცესო კანონმდებლობის სრული იგნორირებით ფაქტობრივად სამართლის ნორმების გამოყენების გარეშე, არ დააკმაყოფილა დაცვის მხარის მიერ დაყენებული შუამდგომლობა ექსპერტ – ბიოლოგის ნინო გელბახიანის დისტანციურ დაკითხვასთან დაკავშირებითაც.
აშკარაა უკვე რომ მოსამართლეს განაჩენი დაწერილი აქვს, ისიც გამამტყუნებელი განაჩენი, ის არ გვისმენს და არ აკმაყოფილებს დაცვის მხარის სამართლიან მოთხოვნებს, ხოლო პროკურორის ნებისმიერ შუამდგომლობას აკმაყოფილებს. მას სურს ასიამოვნოს პროკურორს და ამ ბიჭების მიმართ გამოიტანოს გამამტყუნებელი განაჩენი.
დღეს დაიკითხა ორი ექსპერტი, რომლებმაც მისცეს ბრალდების მხარის სასიკეთოდ ჩვენებები.
მოსამართლისგან ობიექტურ გადაწყვეტილებას არ ველოდებით. მას უკვე გამოტანილი აქვს განაჩენი ამ ბიჭებისთვის. ეს იქნება უკანონო, უსამართლო, გადაწყვეტილება , რომელსაც აუცილებლად გავასაჩივრებთ სააპელაციო სასამართლოში" _ამბობს ოთხივე პატიმრის უფლებების დამცველი სოსო ჯალაღონია.
დღეს ოზურგეთის რაიონული სასამართლოს მიმდებარე ტერიტორიაზე მოსამართლის მიმართ პროტესტი პატიმრების მშობლებმა ხმამაღლა გამოხატეს. მათი განცხადებით, აღნიშნული საქმე უყურადღებოდ არ დარჩება და ისინი პროტესტის გამოხატვის სხვა ზომებს მიმართავენ.
" ჩემს შვილს რომ დაემუქრნენ, არ გაგახარებთ საქართველოს თუ არ დატოვებო, მაშინ გავჩუმდი. გამაჩერეს, არ ისაუბრო ამის შესახებო. შევცდი, ხმა რომ არ ამოვიღე. ახლა არ გავჩერდები და აბსოლიტურად ყველა იმ პირს დავასახალებ, ვინც ამას აკეთებდა. 7 საათი ჰყავდათ ჩემი შვილი მაშინ პოლიციაში" . _ გვითხრა ერთ- ერთი პატიმრის დედამ.
ოზურგეთის რაიონული პროკურატურის პროკურორი შოთა ჩხაიძე "გურია ნიუსთან" აღნიშნულ საქმესთან დაკავშირებით კომენტარს აკეთებს და აღნიშნავს, რომ სასამართლო საბოლოო გადაწყვეტილებას, მხარეების მიერ წარდგენილი მტკიცებულებებიდან გამომდინარე, მიიღებს.
რაც შეეხება მოსამართლესთან მის კავშირებს და გარიგებას, აღნიშნულთან დაკავშირებით ჩხაიძე ამბობს, რომ ბრალდების მხარეს მოსამართლესთან არანაირი კომუნიკაცია არ გააჩნია.
"აქვე მინდა დავამატო, რომ დაცვის მხარე ცდილობს მოახდინოს ზემოქმედება მოსამართლეზე, სასამართლო პროცესებზე, რაც გამოიხატება იმაში, რომ მათ რამდენჯერმე უსაფუძვლოდ დააყენეს მოსამართლის აცილების შუამდგომლობა. როცა სასამართლომ სრულიად ობიექტურად უთხრა დაცვის მხარეს უარი, კანონის მოთხოვნათა დარღვევით დაყენებული შუამდგომლობის დაკმაყოფილებაზე "_ განმარტა პროკურორმა.
