“განსხვავებული აზრის გამო არავის ვდევნი”

იმის გასაგებად, თუ რა ღონისძიებები ჩატარდა მუნიციპალიტეტში და რის გაკეთებას აპირებს ხელისუფლება მოსახლეობის ცხოვრების პირობების გასაუმჯობესებლად, ლანჩხუთის გამგებელს გიორგი გოგუაძეს ვესაუბრეთ.

_ მიუხედავად იმისა, რომ ჩვენს მუნიციპალიტეტში ბევრი ინფრასტრუქტურული პროექტი გახორციელდა, ხალხისთვის მთავარ პრობლემად მაინც რჩება სიღარიბე და უმუშევრობა. გაქვთ თუ არა რაიმე გეგმა არსებული მძიმე სოციალური მდგომარეობის გამოსასწორებლად?

_ ჩვენ ყოველდღიურად ვშრომობთ არსებული მდგომარეობის შესაცვლელად. ჩემი გამგებლობის პერიოდში, ლანჩხუთში შეიქმნა 29 შეზღუდული პასუხისმგებლობის საწარმო, რომლებშიც ათობით ლანჩხუთელია დასაქმებული. სხვადასხვა ქალაქმშენებლობით პროექტებზე, როგორიცაა გზების კეთილმოწყობა, წყალგაყვანილობის სისტემის შეცვლა, სწორედ ლანჩხუთელები მუშაობენ, მაგრამ, სამწუხაროდ, პროფესიონალი კადრები გვაკლია. როცა ვაცხადებთ ტენდერებს სხვადასხვა სამუშაოს შესრულებაზე, ადგილობრივ ფირმებს არ შემოაქვთ განაცხადი და იძულებული ვხდებით თბილისიდან ან სხვა ქალაქებიდან შემოვიყვანოთ საამშენებლო ფირმა. ამ შემთხვევაშიც ვცდილობთ ადგილობრივები დავასაქმოთ. ხშირად ეს პროექტები 6-7 თვიდან ერთ წლამდე გრძელდება და დასაქმების ერთწლიანი პერსპექტივა გარანტირებულია.

_ ახალი თურქული კანონმდებლობის შესაბამისად, თებერვლიდან, უცხო ქვეყნის მოქალაქეები, რომლებმაც 3 თვე დაჰყვეს თურქეთში, მომდევნო სამ თვის განმავლობაში თურქეთის ტერიტორიაზე ვეღარ შევლენ. არადა, ლანჩხუთის მოსახლეობის დიდი ნაწილი სწორედ თურქეთში მუშაობით არჩენს ოჯახს. ამ კანონის ამოქმედების შემდეგ ისინი, ფაქტობრივად, ვეღარ შეძლებენ მეზობელ ქვეყანაში მუშაობას. ხომ არ აქვს ადგილობრივ მთავრობას მათთვის ალტერნატიული შეთავაზება?

_ ამ კანონს ვერაფერს დავუპირისპირებთ. ჩვენი მოსახლეობის დიდი ნაწილი, უბრალოდ, მიეჩვია უცხო ქვეყანაში დაქირავებულ შრომას. შარშან გუბერნატორმა აცანაში მოიყვანა ჩაის გადამუშავების და რეალიზაციის საქმეში გამოცდილი პიროვნება, რომელსაც ჰქონდა ამერიკის შეერთებულ შტატებში მუშაობის გამოცდილება. მან შესთავაზა ადგილობრივებს ჩაის მიმღები საწარმოს დაარსება, სადაც მოსახლეობა 1.5 ლარად ჩააბარებდა მოკრეფილ ჩაის, მაგრამ აცანელთა დიდი ნაწილი წინააღმდეგი წავიდა. მოტივი ერთადერთი იყო _ ისინი თურქეთში მუშაობენ სეზონურ სამუშაოზე და დღიურად 30 ლარს იღებენ. მე ვკითხე მათ: არ გირჩევნიათ დღეში 15 ლარი გამოიმუშავოთ და საკუთარ სახლებში იყოთ,-მეთქი? საბოლოო ჯამში, შედეგს ვერ მივაღწიეთ. ჩვენ ვერ დავაარსებთ საწარმოებს, ჩვენ მხოლოდ ის შეგვიძლია, რომ ხელი შევუწყოთ მეწარმეს, გამოცდილ ადამიანს ამ საქმეში. მაგრამ ბევრს თუ აქ მუშაობას უცხოეთში წასვლა ურჩევნია, ვერაფერს გავხდებით.

_ ხელისუფლებამ გლეხებს 30-ლარიანი ვაუჩერები დაურიგა საგაზაფხულო სამუშაოების ჩასატარებლად. თქვენი აზრით, საკმარისია ეს თანხა რაიმე სახის სამუშაოს საწარმოებლად? ხომ არ აპირებთ ადგილობრივი რესურსით დახმარება გაუწიოთ სოფლის მოსახლეობას?

_ 30-ლარიანი ვაუჩერი ცუდი რატომ არის? ამ თანხით გლეხი 5 000 კვადრატულ მეტრ ფართობს დახნავს და დასათესად გაამზადებს. ხშირად, საგაზაფხულო სამუშაოების დაწყების წინ, გლეხს ფული არ აქვს საწვავის შესაძენად ან ტრაქტორისტის დასაქირავებლად. მიღებული ვაუჩერებით გლეხი ამ პრობლემას მოაგვარებს. ჩვენ შეგვიძლია, ახალი სასოფლო-სამეურნეო ტექნიკით დავეხმაროთ მათ. თუ 1 000 მეტრის დახვნა 4 ლარი ღირს, პრეზიდენტის ნაჩუქარი ტექნიკით ჩვენ შარშან 2 ლარად დავახვნევინეთ. ესეც შეღავათია.

_ თქვით, რომ თქვენი გამგებლობის პერიოდში, ლანჩხუთში შეიქმნა 29 შეზღუდული პასუხისმგებლობის საწარმო. ხომ ვერ დაგვისახელებთ რამდენიმე მათგანს?

_ ლაშისღელეში შეიქმნა თხილის გადამამუშავებელი საწარმო, სადაც 25 ქალია დასაქმებული. გვიმბალაურში თაფლის გადამამუშავებელი საწარმო ფუნქციონირებს, სადაც აწარმოებენ როგორც ქილებში ჩამოსხმულ თაფლს, ასევე ერთჯერად პოლიეთილენის პაკეტებში დაფასოებულსაც. ასეთ პროდუქტს კარგად ყიდულობენ სასტუმროები და ავიაკომპანიები თვითმფრინავის მგზავრებისთვის, მაგრამ ჩვენ გვაქვს უფრო ამბიციური გეგმებიც. ალბათ, იცით, რომ ლანჩხუთს მყარი ეკონომიკური ურთიერთობები აქვს უკრაინაში, ხერსონის ოლქში არსებულ ქალაქ კახოვკასთან. ახლახან შეიქმნა ახალი ფირმა, რომელიც უკრაინაში დამზადებულ სასოფლო-სამეურნეო ტექნიკას შემოიტანს ჩვენთან. ასევე, ნორვეგიის მთავრობის დახმარებით, ვახორციელებთ რეგიონულ პროექტს, რომელიც ჩაის დამზადება-გადამუშავებას ითვალისწინებს. ნორვეგიელებმა გადმოგვცეს ჩაის გადამამუშავებელი მცირე ზომის დანადგარი. გადაწყვეტილი გვაქვს ჩიბათში ადმინისტრაციული შენობის გარემონტება და ჩაის საწარმოს გახსნა.

_ ნედლეულს საიდან მიიღებთ?

_ ადგილობრივი მოსახლეობა დღემდე კრეფს ჩაის. შარშან ჩვენი ძალისხმევით მომზადდა 10 ჰექტარი ჩაის პლანტაცია. სპეციალისტები ფიქრობენ, რომ წელს უნდა მივიღოთ მოსავალი.

_ კიდევ ერთ მტკივნეულ საკითხზე მინდა თქვენი ყურადღება შევაჩერო _ სხვადასხვა შენობების აღდგენა-რეაბილიტაციაზე მნიშვნელოვანი სახსრები იხარჯება, მაგრამ გარემონტების შემდეგ, ბევრი მათგანი უფუნქციოდაა დარჩენილი. მაგალითად, შუხუთის ცენტრში არსებულ შენობაში დღემდე არ გახსნილა “ფერმერის სახლი”, გვიმბალურის ადმინისტრაციული შენობის მეორე სართული ორი წლის წინ საფუძვლიანად გარემონტდა, მაგრამ არც იქ გახსნილა საბავშვო ბაღი. რა არის ამის მიზეზი?

_ შუხუთში არსებული შენობის აღდგენა-გარემონტება არ მომხდარა სახელმწიფო სახსრებით, აქ კერძო ინვესტიცია ჩაიდო და ინვესტორი აპირებდა “ფერმერის სახლის” გახსნას. მაქვს ინფორმაცია, რომ ეს ძალიან მალე უნდა მოხდეს. აქ იქნება საინფორმაციო ცენტრი, სადაც სპეციალისტები დაეხმარებიან გლეხებს, შეასწავლიან მათ ახალ მეთოდებს და ტექნოლოგიებს. რაც შეეხება გვიმბალაურში არსებულ შენობას, იქ მართლაც უნდა გახსნილიყო საბავშვო ბაღი, მაგრამ არ მოგროვდნენ საჭირო რაოდენობის ბავშვები. ამიტომ ჩვენ შევთავაზეთ გვიმბალაურის ტერიტორიული ერთეულის რწმუნებულს ამ ფართის დაკავება. ასე რომ, სახელმწიფო სახსრების ტყუილად ხარჯვა არ მომხდარა.

_ ბატონო გიორგი, ორი წლის წინ, პრესა აჭრელებული იყო სუფსის პორტის მშენებლობასთან დაკავშირებული მასალებით. ლანჩხუთელებშიც გაჩნდა იმედი, რომ სუფსის განვითარების შედეგად მდგომარეობა გამოსწორდებოდა ჩვენთანაც. მაგრამ მას შემდეგ არაფერი შეცვლილა. თვლით თუ არა სუფსის პორტს მთავრობის ჩავარდნილ პროექტად?

_ სუფსის პორტის მშენებლობა ახლო მომავალში უნდა დაიწყოს. უბრალოდ, საკანონმდებლო დეტალებია მოსაგვარებელი. 180 ჰექტარი ფართობი შეძენილი აქვს კერძო კომპანიას, რომელმაც უნდა ააშენოს პორტი. ეს კომპანია მიწის გადასახადსაც იხდის სახელმწიფო ბიუჯეტში.

_ გადაწყვეტილებებს მარტო იღებთ თუ გუნდური მუშაობის პრინციპებს აღიარებთ?

_ ჩემი ხელისუფლებაში მოსვლის დღიდან გუნდური მმართველობის ერთგული ვარ. ჩემს გუნდთან ერთად ვიღებ გადაწყვეტილებებს და ვახორციელებ პრაქტიკაში.

_ საზოგადოებაში ფართოდ არის გავრცელებული აზრი, რომ თქვენთან შეუთანხმებლად ვერც ერთი ადამიანი ვერ დაიწყებს მუშაობას სახელმწიფო დაწესებულებაში ყველაზე დაბალ იერარქიულ საფეხურზეც კი.

_ რა თქმა უნდა, ეს ჭორებია. ერთპიროვნულად არსად არავის ვნიშნავ. ყველა სამსახურს ჰყავს დირექტორი და ის უფლებამოსილია, საკუთარი შეხედულებისამებრ მიიღოს თანამშრომელი. სხვების საკადრო პოლიტიკაში არ ვერევი.

_ როგორი დამოკიდებულება გაქვთ მედიასთან? მიიჩნევთ თუ არა განსხვავებულ აზრს შეუწყნარებლად, ხოლო ასეთი აზრის მატარებელ ადამიანს მტრად?

_ განსხვავებულ აზრს პატივს ვცემ და არც არავის ვდევნი ამის გამო. მაგრამ ურთიერთობაში აუცილებელია კორექტულობა. ჯანსაღი კრიტიკა არასოდეს მაღიზიანებს, პირიქით, უკეთესად მუშაობის სტიმულს მაძლევს. რაც შეეხება პრესას, მართალი და გადამოწმებული ინფორმაცია მეტ სანდოობას სძენს მას და ყოველთვის თანამშრომლობის მომხრე ვარ. ასე რომ, ვერ ვერც გაზეთმოძულეობას დამაბრალებს ვინმე.