ამჯერადაც, ჩვენი დიდი სურვილია, ხელისუფლება მხოლოდ რიტორიკით არ შემოიფარგლოს და რეალურად იზრუნოს საარჩევნო გარემოს გასაუმჯობესებლად, რაც ქვეყნისთვის, თითოეული მოქალაქისთვის სასიცოცხლოდ მნიშვნელოვანია; თუმცა, სამწუხაროდ, პროცესები საპირისპიროდ ვითარდება და მედიისთვის, რომელიც სამართლიანი და ინფორმირებული ველის შესაქმნელად უალტერნეტივო ინსტრუმენტია, სამუშაო არე კიდევ უფრო გაუსაძლისი ხდება.
მიუხედავად იმისა, რომ საქმე ჩვეულებრივ და ბუნებრივ ქმედებას _ სარეკლამო სახსრების მოზიდვას ეხებოდა, სახელისუფლებო არხებმა, ხელისუფლების დაკვეთით, აწარმოეს არაეთიკური და ცილისმწამებლური პროპაგანდისტული კამპანია და შეეცადნენ, შეერყიათ ჩვენი გამოცემის რეპუტაცია; IRI-ს კვლევებითაც კი, რომლითაც მანიპულირება ძალიან უყვარს ჩვენს ხელისუფლებას, “გურია ნიუსი”, სანდოობის მიხედვით, ქვეყნის მასშტაბით მედიასაშუალებათა პირველ ოთხეულშია. ადგილობრივი ხელისუფლება, თავდაუზოგავად ცდილობს, “ოპოზიციურობის” იარლიყი მოგვაწებოს და შემდეგ, ამის საფუძველზე, მკითხველები დააშინოს.
არსებობს არაერთი დამადასტურებელი ფაქტი, რომ სოფლების რწმუნებულების, საჯარო სამსახურების ხელმძღვანელების მეშვეობით, ხელისუფლება ცდილობს, ზემოქმედება მოახდინოს დისრიბუტორებზე, ხელმომწერებზე. ძალიან ბევრი ერიდება ვინაობის გამჟღავნებას, ამგვარი ფაქტების ღიად დადასტურებას, თუმცა, არსებობენ გაბედული ადამიანები, რომლებიც დაუფარავად ადასტურებენ, თუ რა სახის დირექტივებს იძლევიან მმართველი პირები თათბირებსა და შეხვედრებზე, რომელი გაზეთი უნდა გამოიწერონ და რომელი _ არა ხელქვეითებმა; რა სახის მუქარას ან შეთავაზებას იღებენ “გურია ნიუსის” გავრცელების ქსელში ჩართული ადამიანები… ჩვენს წყაროებს შორის, ადგილობრივი თვითმმართველობის წარმომადგენელი, საჯარო სამსახურებში დასაქმებული ბევრი პირია, რომლებიც საღად აფასებენ ამგვარი “დემოკრატიის” სიმახინჯეს და ცდილობენ წინააღმდეგობა გაუწიონ მედიის მიმართ მიუღებელი მეთოდების გამოყენებას.
“გურია ნიუსი”, რომელიც მხოლოდ საკუთარი შემოსავლებითა და საერთაშორისო ორგანიზაციების მხარდაჭერით ახერხებს არსებობას, ცდილობს, მკითხველს ობიექტური, შეულამაზებელი და სანდო ინფორმაცია მიაწოდოს, მაგრამ ბიზნესგარემოს გაუარესების პარალელურად, ჟურნალისტებისთვის დღითიდღე ძნელდება სრულყოფილი პროდუქტის შექმნა, რადგან თანამდებობის პირები უარს ამბობენ, აბრკოლებენ ან აჭიანურებენ საჯარო ინფორმაციის გაცემას; სრულიად უფუნქციო სამსახურებში დასაქმებას ჰპირდებიან ჟურნალისტებს გადაბირების მიზნით; ხელქვეითებს მკაცრად უკრძალავენ გასცენ პასუხები ჟურნალისტების მიერ დასმულ შეკითხვებს, გააკეთონ კომენტარები საზოგადოებრივი ინტერესის შესაბამისად. რთულია მუშაობა, როცა ხელისუფლება ღიად ცდილობს საინფორმაციო იზოლაციაში მოგვაქციოს _ მხოლოდ ლოიალურად განწყობილ მედიასაშუალებებს აქვთ შესაძლებლობა მიიღონ ინფორმაცია დაგეგმილი აქტივობების, ოფიციალური შეხვედრების და სტუმრების ჩამოსვლის შესახებ; როგორც ჩანს, ხელისუფლებას ეშინია არაკონტროლირებადი ჟურნალისტები დაესწრონ და ობიექტურად გააშუქონ საჯარო, ოფიციალური შეხვედრები და იქვე, შეხვედრებზევე დასვან საზოგადოებისთვის საინტერესო, თუნდაც უსიამოვნო შეკითხვები.
“გურია ნიუსის” რედაქცია მოითხოვს, შეწყდეს ღია თუ ფარული ზემოქმედება გაზეთის გამავრცელებლებზე, მკითხველებზე და ჟურნალისტებს მიეცეთ შესაძლებლობა, დაუბრკოლებლად შეასრულონ პროფესიული მოვალეობა _ დაიცვან საზოგადოების, და არა რომელიმე პოლიტიკური ძალის კანონიერ საფუძველს მოკლებული ინტერესები!
