კულტურისა და ძეგლთა დაცვის მინისტრის, მიხეილ გიორგაძეს მრჩეველი, ქეთევან დუმბაძე 14 ივლისს, ნოდარ დუმბაძის დაბადების დღეზე ივლიტას სახელობის ბიბლიოთეკას საჩუქრად წიგნებს გადასცემს.
_ 13-14-15 ივლისს, გურიაში (ოზურგეთში, ჩოხატაურში და ლანჩხუთში) ჩამოვდივართ და პროექტ "ცოცხალი წიგნების" ფარგლებში უამრავ მკითხველს შევხვდებით, ვისაც წიგნები უყვარს. 14 ივლისს კი ნოდარ დუმბაძის დაბადების დღეზე კულტურის სამინისტროსგან ივლიტას სახელობის ბიბლიოთეკას გადავცემთ წიგნებს. ასევე ნოდარ დუმბაძის ოჯახის წევრები ვაპირებთ, მამაჩემის გამოცემების გადაცემას საჩუქრად. ეს არის უდიდესი საქმე, რომელსაც სათავეში "გურია ნიუსი" უდგას". _ გვითხრა ქეთევან დუმბაძემ.
"ცოცხალი წიგნები" საქართველოს კულტურისა და ძეგლთა დაცვის სამინისტროს ლიტერატურულ-საგანმანათლებლო პროექტია და გულისხმობს საქართველოს სხვადასხვა რეგიონის სოფლებისა და ქალაქების საჯარო სკოლებში, ბიბლიოთეკებში, მუზეუმებში, კულტურის სახლებსა და სხვა საჯარო დაწესებულებებში თანამედროვე მწერლების სტუმრობას და მკითხველთან შეხვედრას. პროექტის ფარგლებში ეწყობა პოეზიის საღამოები და იმართება დისკუსიები ადგილობრივ მოსახლეობასთან მათთვის საინტერესო თემებზე.
მწერლები სტუმრობენ რეგიონის საპატიო, ხანდაზმულ, შეზღუდული შესაძლებლობის მქონე პირებს, ბაშვთა სახლებს, საჯარისო-სამხედრო ნაწილებს, სასჯელაღსრულებით დაწესებულებებს. შეხვედრები იმართება არაქართულენოვან მოსახლეობასთანაც. რეგიონებში ვიზიტისას, მწერლები ასევე ზრუნავენ ნიჭიერი ადგილობრივი შემოქმედების გამოვლენაზე.
პროექტში აქტიურად არის ჩართული საგამომცემლო სექტორიც. ეწყობა ლოკალური წიგნის ბაზრობები – მწერლები თავად გვევლინებიან გამავრცელებლების როლში. თავიანთ საავტორო წიგნებთან ერთად, ისინი პოპულარიზაციას უწევენ კოლეგების შემოქმედებასაც. რეგიონებში ვიზიტის პერიოდში, მწერლები აწარმოებენ დღიურებს და ჩანაწერებს, რომლის მიხედვითაც, პროექტის დასრულების შემდეგ გამოიცემა წიგნი "მწერლის დღიურები".
