საქართველოს ეროვნული ბანკის პრეზიდენტი, გიორგი ქადაგიძე მიიჩნევს, რომ ქვეყანას უფრო დიდი და მდიდარი სახელმწიფო აპარატი და ბიუროკრატია აქვს, ვიდრე ეკონომიკას შეუძლია აიტანოს.
ამის შესახებ ქადაგიძემ დღეს ჟურნალისტებთან განაცხადა და ხელისუფლებას მოუწოდა ბიუროკრატიული ხარჯები შეამციროს.
განცხადების გაკეთების შემდეგ, ყურადღების ცენტრში გიორგი ქადაგიძის შემოსავლები მოექცა.
პარლამენტის საფინანსო-საბიუჯეტო კომიტეტის თავმჯდომარემ, თამაზ მეჭიაურიმა განაცხადა, რომ ეროვნული ბანკის პრეზიდენტისგან შენიშვნებს არ იღებს, რადგან დეპუტატისთვის გიორგი ქადაგიძის წლიური შემოსავალი და წინა ხელისუფლებასთან ახლო ურთიერთობა მიუღებელია.
მეჭიაური ამბობს, რომ პირისგან, რომელსაც წლიურ შემოსავალი, ხელფასის სახით, 150 ათასი ლარი აქვს, სახელმწიფო აპარატის სიდიდესა და ბიუროკრატიაზე საუბარი მიუღებელია.
"იმ პირისგან, რომელმაც ასეთი მაღალი სახელფასო შემოსავლის პარალელურად ყოფილი პრეზიდენტისგან თანამდებობიდან წასვლამდე 75 ათასი ლარის პრემია მიიღო შენიშვნები მიუღებელია", _ ამბობს მეჭიაური.
ეროვნული ბანკის პრეზიდენტს კი, 2015 წლის კორექტირებულ ბიუჯეტთან დაკავშირებით შენიშვნები თავად აქვს. როგორც ზემოთ აღვნიშნეთ, გიორგი ქადაგიძე მიიჩნევს, რომ ქვეყანას უფრო დიდი და მდიდარი სახელმწიფო აპარატი და ბიუროკრატია აქვს, ვიდრე მის ეკონომიკას შეუძლია აიტანოს.
სებ-ის პრეზიდენტმა 2015 წლის კორექტირებულ ბიუჯეტთან დაკავშირებით ეროვნული ბანკის დასკვნა კიდევ ერთხელ განმარტა.
"ბიუჯეტთან დაკავშირებით ჩვენი პოზიცია შემდეგია – ზოგადად, ჩვენ მივესალმებით ბიუჯეტის კორექტირებას, ამაზე ჩვენ ჯერ კიდევ იანვარში ვსაუბრობდით რომ საჭიროა ბიუჯეტის კორექტირება, წარმოდგენილი ცვლილებები, ჩვენი აზრით, საკმარისი არ არის. ის არ ასახავს იმ გამოწვევებსა და რეალობას, რაც ქვეყანაშია. ჩვენი რეკომენდაცია არის მიმდინარე და ბიუროკრატიის ხარჯების უფრო მეტად შემცირება, რაც დაეხმარება როგორც ზოგადად, ეკონომიკურ ზრდას, ასევე, რა თქმა უნდა, ლარის გაცვლით კურსს. უფრო მარტივ ენაზე რომ ვთქვათ, დღეს ჩვენ გვაქვს უფრო დიდი და მდიდარი სახელმწიფო აპარატი და ბიუროკრატია, ვიდრე ჩვენს ეკონომიკას შეუძლია ეს აიტანოს და ეს, რა თქმა უნდა, აისახება ყველა პარამეტრზე, ამიტომ ჩვენი მთავარი რჩევა, რომელიც ბიუჯეტთან დაკავშირებით ეროვნული ბანკის დასკვნაშია, არის ის, რომ შემცირდეს მიმდინარე და ბიუროკრატიის აპარატის შენახვის ხარჯები", _ განაცხადა ქადაგიძემ.
"გურია ნიუსი" დაინტერესდა, მაშინ, როდესაც სებ-ის პრეზიდენტი მიმდინარე და ბიუროკრატიის აპარატის შენახვის ხარჯებზე საუბრობს, შემცირდა თუ არა თავად მისი შემოსავლები. ამიტომ, გთავაზობთ ქადაგიძის ქონებრივ დეკლარაციას, რომელიც მან 2015 წლის 7 მაისს შეავსო.
ქადაგიძის 2015 წლის დეკლარაცია, 2014 წლის დეკლარაციასთან შედარებით დიდად არ შეცვლილა, თუ არ ჩავთვლით ფინანსურ შემოსავლებს, რომელიც მან ბოლო ერთი წლის განმავლობაში მიიღო (არ შეცვლილა მისი უძრავი ქონების მდგომარეობა, ავტ.).
წინა წლის დეკლარაციის მიხედვით, მისი ყოველთვიური შემოსავალი დაახლოებით 15 ათასი ლარი იყო, რომელსაც ის საქართველოს ეროვნული ბანკის პრეზიდენტისა და საბჭოს წევრის თანამდებობებიდან იღებდა. მთელი წლის განმავლობაში კი მან ჯამში 195 000 ლარი მიიღო.
რაც შეეხება 2015 წლის დეკლარაციას, მან შემოსავლის სახით, საქართველოს ეროვნული ბანკის პრეზიდენტისა და საბჭოს წევრის თანამდებობებიდან 228 000 ლარი მიიღო, რაც თვეებზე გადანაწილებით, ყოველთვიურად, 19 ათასი ლარია.
გარდა ამისა, დეკლარაციის მიხედვით, გიორგი ქადაგიძემ ილიას სახელმწიფო უნივერსიტეტიდან, სადაც ის ლექციებს კითხულობს, 984 ლარი აქვს მიღებული.
რაც შეეხება მისი მეუღლის შემოსავალს, დეკლარაციაში აღნიშნულია, რომ თამარ ჟორჟოლიანმა რეფერალური დახმარების ცენტრიდან (სასწავლო ცენტრის ხელმძღვანელი) 8662.20 ლარის შემოსავალი მიიღო.
2015 წლის დეკლარაციაში არ არის შეცვლილი ქადაგიძის უძრავი ქონების მდგომარეობა. მისი უძრავი ქონება მხოლოდ 3720.00 კვ.მ -ის ფართობის მიწის ნაკვეთია, რომელიც ბორჯომის რაიონის დაბა ბაკურიანში – "დიდველი", მდებარეობს.
ქადაგიძის მეუღლე თამარ ჟორჟოლიანი ფლობს მსუბუქ ავტომანქანას NISSAN X-TRAIL-ს (გამოშვების წელი – 2001).
რაც შეეხება ოჯახის ფინანსურ მდგომარეობას, დეკლარაციის შევსების მომენტში, გიორგი ქადაგიძის სმარტივის ანგარიშზე ლიბერთი ბანკში 227.00 ლარი, ამავე ბანკის შემნახველ ანგარიშზე 64809.99 ლარი, საკრედიტო ანგარიშზე კი, 0.71 დოლარი ჰქონდა.
მსოფლიო ბანკის საკრედიტო კავშირის შემნახველ ანგარიშზე კი 20000.00 დოლარი ერიცხებოდა.
რაც შეეხება მის მეუღლეს, თამარ ჟორჟოლიანს საქართველოს ბანკი საკრედიტო ანგარიშზე 1265.00 ლარი ჰქონდა.
დეკლარაციაში ასევე აღნიშნულია, რომ ქადაგიძემ 2014 წლის 12 მარტს ნასყიდობის ხელშეკრულება გააფორმა და მან საგურამოში (მცხეთის რაიონი) სასოფლო-სამეურნეო 1175 კვ.მ.-ის ფართობის მიწა 25850.00 დოლარად გაასხვისა.
რაც შეეხება ოჯახის გასავლის ხარჯებს, ერთი წლის განმავლობაში ქადაგიძემ 43 000 დოლარი და 8285 ლარი გასცა. კერძოდ, Harvard Business School-ში სწავლისთვის მან 43 000.00 გადაიხადა, ხოლო შვილების სწავლისთვის, ნიუტონის სკოლაში 3304.00 და 4981.00 ლარი.
ამავე თემაზე:
თვეში 15 ათასიანი შემოსავალი ფასიანი ქაღალდების და უძრავი ქონების გარეშე – ქადაგიძის დეკლარაცია
