ბრაზილიის ქალაქ სალვადორ დე ბაიაში დასრულდა მსოფლიოს ჩემპიონატი ბერძნულ – რომაულ ჭიდაობაში, სადაც მართლაც საოცარ შედეგს მიაღწიეს ქართველმა ახალგაზრდებმა. ზაზა სილაგაძის გაწვრთნილმა ნაკრებმა 4 ოქროსა და ერთი ვერცხლით დაასრულა ამ ასაკის უმთავრესი საჭიდაო ფორუმი.
ჩემპიონატის პირველ დღეს სულ ოთხ წონით კატეგორიაში გამოვლინდნენ გამარჯვებულები და სამის ფინალში ქართველებმა იჭიდავეს. 74 კგ წონაში გელა ბოლქვაძემ შანსი არავის არ დაუტოვა, გადამწყვეტ ორთაბრძოლაში არც თურქ აკბუდაკ ბურჰანს შეეპუა და დაძაბულ ბრძოლაში 4:3 აჯობა.
ასევე დაძაბული გამოდგა ნიკოლოზ კახელიშვილის ფინალიც ირანელ ჰოსეიმი ამირჰუსეინთან, რომელიც ჩვენებურის მინიმალური ანგარიშით 1:0 გამარჯვებით დასრულდა და მეორე ოქროს მედალიც შეემატა ქართულ ყულაბას.
რაც შეეხება უმსუბუქესი წონის მოჭიდავეს, ნუგზარ წურწუმიას, მან ფინალამდე ყველა ბრძოლა მოიგო, მაგრამ ირანელ რიზა ხედრისთან ვერაფერს გახდა და ვერცხლის მედალს დასჯერდა. ხელი მოეცარა ამ ასაკის ევროპის ჩემპიონს, ლევან ქავჟარაძეს, რომელმაც სამეულში შესვლა ვერ მოახერხა.
მეორე დღეს კიდევ ოთხმა ქართველმა იჭიდავა და ორმა მსოფლიო ჩემპიონობას გამოკრა ხელი. 66 კგ წონაში რამაზ ზოიძემ ფინალამდე ოთხი ორთაბრძოლა დამაჯერებლად მოიგო. იქ კი რუს ახმედ კაიცუკოვს სულ თავ – ბედი აწყევლინა და 11 : 2 გაანადგურა.
მძიმეწონოსანი ზვიად პატარიძე ევროპის კონტინენტზე დაუმარცხებელი იყო და ბრაზილიაში დაამტკიცა, რომ ამ წონის თანატოლებში ამ დუნიაზე ბადალი არ ყავს. მან ერთი ამოსუნთქვით განვლო გზა ფინალამდე, სადაც ისევ რუს ფალავანს, სერგეი სემანოვს დაეჭიდა და ოდნავ მოკრძალებულად, მაგრამ 3 : 1 აჯობა.
კიდევ ერთმა მოქმედმა ევროპის ჩემპიონმა ირაკლი შავაძემ (55 კგ) და გიორგი მელიამ (84 კგ), ვერ მოახერხეს მედლების მოპოვება. შავაძემ შანსი მერვედფინალსი დაკარგა, ხოლო მელიამ – ნახევარინალში.
