ჩოხატაურის მუნიციპალიტეტის საკრებულომ 8 დეკემბერს გამართულ მორიგ სხდომაზე, დღის წესრიგით გათვალისწინებული 19 საკითხი განიხილა.
“ჩოხატაურის მუნიციპალიტეტის გამგეობის დებულების დამტკიცების შესახებ” ჩოხატაურის მუნიციპალიტეტის საკრებულოს დადგენილების გამოსაცემად ადმინისტრაციული წარმოება დაიწყო, ასევე ადმინისტრაციული წარმოება დაიწყო “ჩოხატაურის მუნიციპალიტეტის გამგეობის საჯარო მოსამსახურეთა თანამდებობების დასახელების და თანამდებობრივი სარგოს განაკვეთების დამტკიცების შესახებ”, ისევე როგორც “გამგეობის ადმინისტრაციული სამსახურის დებულების დამტკიცების შესახებ”; ადმინისტრაციული წარმოება დაიწყო გამგეობაში არსებული სამსახურების დადგენილების გამოსაცემადაც.
“ჩოხატაურის მუნიციპალიტეტის საკრებულოს 2007 წლის 30 მარტის #40 დადგენილებაში _ “სათამაშო ბიზნესის მოსაკრებლის შემოღების შესახებ,” ცვლილებების შეტანის თაობაზე იმსჯელეს. ცვლილებების მიხედვით, მოსაკრებელი საგრძნობლად გაიზარდა.
ჩოხატაურის მუნიციპალიტეტის საკრებულოს თითოეული წევრის მიერ ცალკეული დავალებების შესრულებასთან დაკავშირებული ხარჯების ანაზღაურების ზღვრული მოცულობა თვეში 200 ლარით განისაზღვრა.
როგორც საკრებულოს სხდომაზე აღნიშნეს, ხარჯების განსაზღვრა ზღვრული ოდენობის მოცულობიდან შემდეგი პირობების დაცვით მოხდა _
საკრებულოს წევრს კომისიის სხდომებზე დასწრების, განსახილველ საკითხებში მონაწილეობისა და ცალკეული დავალებების შესრულებისთვის ყოველთვიურად აუნაზღაურდება შრომა.
“ჩოხატაურის მუნიციპალიტეტის 2011 წლის ბიუჯეტიდან სოციალური დახმარებების გაცემის და მიღების წესების შესახებ” დადგენილების გამოსაცემად, ადმინისტრაციული წარმოება დაიწყო. დადგენილების პროექტში დეტალურად არის გაწერილი სოციალური დახმარების პაკეტით გათვალისწინებული შეღავათები და მის მისაღებად გასავლელი აუცილებელი პროცედურები.
მეცხრამეტე საკითხი განახლების თემის ტერიტორიული ორგანოსთვის სახელწოდების გადარქმევა იყო _ საქართველოს პრეზიდენტის 2010 წლის 16 ნომებრის #925 ბრძანებულების თანახმად, სოფელ განახლებას სახელი გადაერქვა და ამაღლება ეწოდა.
ჩოხატაურის მუნიციპალიტეტის საკრებულოს თავმჯდომარემ ანტონ ხუნდაძემ სხდომის დასასრულს, საკრებულოს წევრებს მიმართა: _ ბევრი სამუშაო გექნებათ კომისიებში, ინტენსიური მუშაობის შედეგად დაწყებული ყველა ადმინისტრაციული წარმოება უნდა დასრულდეს. 14 დეკემბერს 2011 წლის ბიუჯეტის პროექტის საჯარო განხილვა მოეწყობა და უთხარით ამის შესახებ ამომრჩევლებს, რათა ჩაერთონ ბიუჯეტის საჯარო განხილვაში. თუმცა, ეს იმას არ ნიშნავს, რომ მოქალაქეებს არ ექნებათ საშუალება, წერილობით მოგვმართონ სხვა დღეებში. 15 დეკემბერს კი ჩვენ აიპ-ების ხელმძღვანელებს შევხვდებით, დეტალურად გავივლით თითოეულის მიერ წარმოდგენილ საბიუჯეტო განაცხადებს. მეორე დღეს კი გამგეობის სამსახურების ხელმძღვანელებთან გავივლით პროექტს. ამის შემდეგ კი უკვე 22 დეკემბერს ვგეგმავთ, აღნიშნული პროექტი საკრებულოს მორიგ სხდომაზე განვიხილოთ. ამ ნაბიჯების მიზანია, მაქსიმალურად იქნეს გათვალისწინებული სხვადასხვა დაწესებულებების, სამსახურების და მოსახლეობის ინტერესები ბიუჯეტთან მიმართებაში, _ თქვა ანტონ ხუნდაძემ.
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები დემოკრატიისთვის” ფარგლებში.
