ქალაქ ოზურგეთის მუნიციპალიტეტის მერი ბეგლარ სიორიძე გურიის ოლიმპიურ კომიტეტის პრეზიდენტს ლაშა ლომაძეს უპირისპირდება.
"გურია ნიუსის" წყაროს ინფორმაციით, მერმა ოლიმპიური კომიტეტის პრეზიდენტის ლაშა ლომაძის წინააღმდეგ შსს გურიის სამხარეო მთავარ სამმართველოს განცხადებით მიმართა.
საქმე ეხება, ქალაქ ოზურგეთში, რუსთაველის ქუჩის # 28 მდებარე ოლიმპიურ კომპლექსს, რომლის მშენებლობაც ჯერ კიდევ 2012 წელს დაიწყო. სწორედ ამ შენობაში , მეორე სართულზე სურს ოზურგეთის მერიას საბილიარდოს განთავსება, რის წინააღმდეგიც არიან გურული სპორტსმენები.
"გურია ნიუსის" წყაროს ინფორმაციით, მოჭიდავეებსა და ადგილობრივი ხელისუფლების წარმომადგენლებს შორის ამ თემასთან დაკავშირებით, რამდენიმე თვის განმავლობაში მიმდინარეობდა საუბრები, იყო ხმამაღალი შელაპარაკებაც, თუმცა მათ შორის შეთანხმება დღემდე ვერ მოხერხდა. მეტიც, დაძაბულობამ პიკს მიაღწია და ქალაქ ოზურგეთის მერმა ევროპის ჩემპიონს ბერძნულ რომაულ ჭიდაობაში, ასევე მსოფლიო თასის მფლობელს და საქართველოს მრავალგზის ჩემპიონს, გურიის ოლიმპიური კომიტეტის პრეზიდენტს ლაშა ლომაძეს პოლიციაში უჩივლა, იმ მიზეზით, რომ ლომაძე არ თმობს ოლიმპიური კომპლექსის გასაღებს.
მსოფლიო თასის მფლობელი ლაშა ლომაძე აღნიშნული საქმის დეტალებზე საუბრობს:
" როგორც ეტყობა, შეცდომაშია შეყვანილი ბატონი ბეგი სიორიძე, ეს მისი პოზიცია და დამოკიდებულება ჩვენდამი არის დიდი შეცდომა.
ჩვენ კარგის მეტი ამ ქალაქისთვის არაფერი გაგვიკეთებია, არავისგან არ ვიმსახურებთ ასე აბუჩად აგდებას და ასე მოპყრობას. მეორე საკითხია გაუვა თუ არა ჩვენთან დაპირისპირება ადგილობრივ ხელისუფლებას, კონკრეტულად კი მერს. ალბათ ფიქრობენ, რომ პოლიციაში საჩივრის შეტანით, ჩვენზე ზეწოლას განახორციელებენ.
ჩვენ ადეკვატურ ზომებს მივიღებთ, დათმობას არ ვაპირებთ, იმიტომ, რომ ჩვენ არავის არ ვუვარდებით. პირიქით, ჩვენ ოჯახში გვივარდებიან, რასაც ნამდვილად არ დავთმობთ"– ამბობს ლომაძე და და ქალაქ ოზურგეთის მერთან დაპირისპირების მიზეზებს განმარტავს:
"დამირეკა გურიის სამხარეო მთავარი სამმართველოდან გამომძიებელმა და განმიმარტა, რომ ვარ დაბარებული პოლიციაში. ვკითხე რასთან დაკავშირებით მეთქი. მითხრეს, რომ სპორტულ კომპლექსთან დაკავშირებით მერიდან არის საჩივარი შეტანილი, ამიტომ უნდა მივიდე დაკითხვაზე. ოზურგეთში არ ვიმყოფებოდი, დღეს ჩამოვედი ამის გამო, რომ ხვალ დეტალურად გავეცნო სიტუაციას, რა ხდება. გამომძიებელმა მითხრა რომ , თურმე ჩვენ წაგვიღია გასაღები. მთავარი არის ის, რომ ჩვენ გასაღები არსად წაგვიღია. გასაღები შენობის აშენების დღიდან გვაქვს, თავიდანვე ჩვენი იყო, ჩვენი აშენებულია ეს სპორტული კომპლექსი, თითოეული ნიუანსი არის ჩვენი გაკეთებულ. აქ ჩვენი პირადი ფინანსური რესურსია ჩადებული. თანხები, რითაც ეს შენობა აშენდა, ჩვენი მოძიებულია, სპორტსმენების… ჩვენი ოფლით და წვალებით არის მიღწეული.
ოლიმპიურ კომიტეტს ეს შენობა ჩვენთვის არ გაგვიკეთებია. ეს ავაშენეთ ოზურგეთელებისთვის, ახალგაზრდებისთვის. ეს არის ჩვენი, სპორტსმენების ოჯახი! ხვალ ვიკრიბებით ამ კომპლექსში და ყველა დავაფიქსირებთ ჩვენს აზრს.
ამ შენობის აშენებისთვის ასობით სპორტსმენის ხელწერა გვაქვს მოგროვებული. ჩვენ ჩავუდექით ამ საქმეს სათავეში, დავიწყეთ ნულიდან და მივიყვანეთ ბოლომდე. თავდაპირველად გამოგვეყო 300 000 ლარი ერთხელ. შემდეგ, მეორე ეტაპზე კოტე შარაშენიძის დროს მეორე ტრანში წამოვიღეთ თბილისიდან, რომელიც დაახლოებით 364 000 ლარს შეადგენდა და ასე გავაკეთეთ. ამაში ოლიმპიური კომიტეტის პრეზიდენტი ლერი ხაბელოვი დაგვეხმარა. ასე დავასრულეთ ეს შენობა. პირადად ჩემი სახსრებით მოხდა ამ თანხების შეგროვება ოზურგეთში ოლიმპიური სახლისთვის.
საქმე ეხება კომპლექსში საბილიარდოს აშენებას. ჩვენ გვქონდა საუბრები მერთან, ქალაქ ოზურგეთის მერიას აქვს გათვლილი ოლიმპიურ კომპლექსში მეორე სართულზე გაკეთდეს საბილიარდო, როგორ შეიძლება ამის გაკეთება აქ, ამ შენობაში?
პირველ სართულზე უნდა იყოს კრივის დარბაზი, კარატეს დარბაზი, კიკბოქსინგის დარბაზი, ასევე ძალოსნობის. მეორე სართულზე გვინდოდა გაგვეკეთებინა სპორტული მუზეუმი, სადაც მთელი გურიის წარმატებული სპორტსმენების ისტორიის გაცნობა იქნებოდა შესაძლებელი.
შესაძლებელი იქნებოდა სკოლებიდან, ბაღებიდან მოსულიყვნენ ბავშვები და დაეთვალიერებინათ. ასეთი დონის მუზეუმის გაკეთება გვაქვს ჩვენ ჩაფიქრებული. ველოდებით სიტუაციას, რომ ეს განხორცილდეს და წარმოგიდგენიათ ამის მაგივრად საბილიარდოს გაკეთება?" _ ამბობს ოლიმპიური ჩემპიონი.
ლაშა ლომაძის თქმით, ოლიმპიურ კომპლექსში საბილიარდოს გაკეთების საშუალება არ არის:
"ახლა უნდათ, რომ გვერდით გაგვწიონ და ჩვენი გვერდით ავლით გააკეთონ საბილიარდო. მე არ ვიცი ეს ვისი ინტერესია და საიდან, ვის მოუვიდა აზრად საერთოდ ამ საბილიარდოს გაკეთება. ჩვენ სპორტსმენები ვართ და არცერთ სპორტის სახეობაზე არ გვაქვს გართულება, თუ რაიმე გაკეთდება მაგას რა ჯობია, მაგრამ ეს რის ხარჯზე კეთდება?
შენ გამოხვიდე და გვითხრა, ბიჭებო თქვენ რა შრომა გაწიეთ მე სულ არ მაინტერესებს. მე ქალაქის მერი ვარ და როგორც მინდა, ისე გადავწყვეტ, ასე ნამდვილად არ არის და ვერც იქნება. ქალაქის მერი არის ხალხის არჩეული და ხალხის აზრი ვიცი მე. კიდევ ვიმედოვნებ, რომ ბეგი სიორიძე, ქალაქის მერი არის შეცდომაში შეყვანილი ვიღაცეების მხრიდან, ალბათ ესეც გაირკვევა.
მე ვიცი ერთი რამ: ოლიმპიური კომპლექსი ავაშენეთ ჩვენ, სპორტსმენებმა! იქ ჩვენ გავაკეთეთ აუზი, საუნა, გვინდა გავხსნათ ბავშთა სექცია. ჩვენ არავის არ ვეომებით, არ ვეჭიდავებით, ოღონდ თავად დაგვანებონ თავი და ჩვენ ნუ დაგვიწყებენ ომს და ჭიდაობას. მე ვლაპარაკობ სპორტსმენების სახელით"
სამართლებრივად არ ვიცი, როგორ შეიძლება განვითარდეს მოვლენები. მართალი გითხრათ არ მეგონა, რომ როდესმე ვინმე მოვიდოდა ამ ქალაქში და ამ თემაზე მოგვიწევდა საუბარი. პირიქით, მადლობას ველოდებით იმისთვის, რაც გავაკეთეთ!
საჩივრის შესახებ არ ვიცოდი. გამომძიებლისგან გავიგე, რომ გასაღები წაგვიღია თურმე თვითნებურად. ჩვენთვის აპირებენ შენობის წართმევას… თუ ეს არის ბატონი ბეგის მოსაზრება, მაშინ მერიის ბალანსზეა თეატრი და მივიდეს, ააშენოს, გააკეთოს იქ საბილიარდო,. რატომ არ აკეთებს? გამოყაროს აბა იქედან მსახიობები, თუ ჩვენ სპორტსმენები გვნახა დაბალი ღობე? "-–განაცხადა ლაშა ლომაძემ.
ქალაქ ოზურგეთის მუნიციპალიტეტის მერი ბეგლარ სიორიძე "გურია ნიუსთან" პოლიციაში გურიის ოლიმპიური კომიტეტის წინააღმდეგ საჩივრის შეტანას უარყოფს:
"არანაირი საჩივარი არ მაქვს შეტანილი გურიის ოლიმპიური კომიტეტის წინააღმდეგ. ოლიმპიური კომიტეტი აქ არაფერ შუაშია"_ ამბობს სიორიძე.
ჩვენს კითხვაზე, იცნობს თუ არა გურიის ოლიმპიური კომიტეტის პრეზიდენტს ლაშა ლომაძეს და რა პრეტენზიები გააჩნია მის მიმართ, სიორიძე გვპასუხობს;
"კი ბატონო პოლიციას მივმართე, ეს შენობა არის ქალაქის მუნიციპალიტეტის საკუთრება იქ დასასრულებელი გვაქვს გარკვეული სახის სამუშაოები და არ შეიძლება გასაღები წაიღოს ვინმემ და ხელი შეგვშალოს ამ სამუშაოების ჩატარებაში"– გვითხრა ქალაქის მერმა.
შსს პრესსამსახურში აცხადებენ, რომ ქალაქ ოზურგეთის მერის მიერ გურიის სამხარეო მთავარ სამმართველოში შეტანილ განცხადებასთან დაკავშირებით, მიმდინარეობს წინასაგამოძიებო მოქმედებები.
"აღნიშნულ ფაქტთან დაკავშირებით მიმდინარეობს წინასაგამოძიებო მოქმედებები, რომ გამოიკვეთოს რა სახის დანაშაულია, რომ შემდეგ ჩამოყალიბდნენ რა მუხლით აღიძრას საქმე"– აცხადებენ პრესსამსახურში.
