ოზურგეთის მუნიციპალიტეტის სოფელ სილაურის ე.წ. "ძეგორის" დასახლების საავტომობილო გზა ოზურგეთთან დამაკავშირებელ ცენტრალურ გზას ფაქტიურად მოწყვეტილია. აღნიშნული გზა წლების განმავლობაში დაზიანებულია. აქ მცხოვრებლები ადგილობრივ ხელისუფლებას არაერთხელ მიმართავდნენ დახმარებისთვის, თუმცა აღნიშნული პრობლემა დღემდე მოუგვარებელია.
2 კმ. გზის ნაწილი წვიმამ და ღვარცოფმა ისე დააზიანა, რომ ადგილობრივები სამანქანო გზით ვეღარ სარგებლობენ.
ამ უბანში ძირითადად 35 ოჯახი ცხოვრობს, ამათგან 15 ოჯახი დახმარებას ადგილობრივ ხელისუფლებას სთხოვს.
სოფელ სილაურის მცხოვრებლები "გურია ნიუსს" დაუკავშირდნენ. ადგილზე მისულებს კი ასეთი სურათი დაგვხვდა: ადგილობრივები თავიანთი სახსრებითა და შრომით ცდილობდნენ გზის შეკეთებას.
"ყველაზე მთავარი იცით რაა? მომაკვდავი გვყავდა და სასწრაფო სამედიცინო დახმარების მანქანა ვერ მოდიოდა. აქ ყველაზე მეტი მოხუცები ცხოვრობენ. ავად რომ გავხდეთ, სასწრაფო მანქანას ვერ გამოიძახებ. კაცი არ გვყავს პატრონი, გამკითხავი, არც დეპუტატია ჩვენთვის, საერთოდ არ აინტერესებს ჩვენი გასაჭირი. არც ამბავი უკითხავს. ამოვიდეს ერთი ნახოს, რა მდგომარეობაა მის სოფელში, არ უნდა იცოდეს? ან სოფლის პროგრამით გამოყოფილი თანხებს როგორ ანაწილებენ? გვაქვს ინფორმაცია, რომ აკეთებენ რამდენიმე მეტრზე მხოლოდ და ისიც დასაწყისში. მოვიდეს დეპუტატი და დაგველაპარაკოს, რა ნიშნით შეარჩია უბნის დასაწყისი და არა ზედა მხარე? რატომ დაგვჩაგრეს? ჩვენ არ ვართ ადამიანები?"_ ამბობდნენ "გურია ნიუსთან" შეკრებილები.
სოფელ სილაურში მცხოვრები გულო როყვა ამბობს, რომ ე.წ. "ძეგორის" უბანში არსებული პრობლემების შესახებ სოფელ სილაურის დეპუტატი გოჩა კილაძე საქმის კურსში იყო, მას არაერთხელ მიმართეს კიდეც დახმარებისთვის, რაზეც დეპუტატმა უარი თქვა.
"არა მარტო გზა, მთელი ზაფხული წყალი არ გვქონია, გაწვიმდება და შუქი მაშინვე ქრება. აი ნახეთ, ჩვენი ხელით გავიყვანეთ აკაციის ბოძებზე დენი. რომელი საუკუნეა, რომ საერთო გამრიცხველიანებაზე ვართ? მიგვიტანეთ ხელისუფლებამდე ამბავი, გვაინტერესებს, რაიმე დანაშაული ხომ არ გვაქვს ? მოვიხდით ბოდიშს და მოგვცენ ეს გზა კაცო, აღარ შეგვიძლია!
ან ეს დეპუტატი რას აკეთებს? ამის მეტად ხელისუფლების წინაშე ამ უბნის გაჭირვების საკითხი არ უნდა დააყენოს? ამიტომ ავირჩიეთ? მოვიდეს ერთი და ნახოს რა მდგომარეობაა, აღარც წყალი გვაქვს, აღარც შუქი და არც გზა. მეზობელი გვყავდა გარდაცვლილი, რამდენიმე დღეა, რაც დავასაფლავეთ, გასვენებაში ხალხი ვერ ამოვიდა. დავურეკეთ ჩვენი სოფლის დეპუტატს გოჩა კილაძეს და ვუთხარით, მოგვეხმარეთ რამე, გზა იქნებ დროებით მაინც შეაკეთოთ თქო, შემდეგ ავუხსენით – მთელი კუთხე ვიკრიბებით და ცენტრალური გზის გასადასახვევზე დავჯდებით, გზას გადავკეტავთ და მერე არ თქვათ, რომ ჩვენ საქმის კურსში არ ვიყავიო,.ასე მიპასუხა, რა აზრი აქვს გულო დეიდა მაგას, ხართ პროექტში შეყვანილი და გაკეთდებაო"– ამბობს გულო როყვა.
ეთერ ბლაგიძე: "21 საუკენეში დენის ბოძებზე უნდა ვისაუბროთ? ასე უყურადღებოდ რომელიმე სოფელი თუ იქნება, საინტერესოა? კაცი არ გვყავს მომკითხავი. ყველა ადამიანები ვართ, მოხუცები ცხოვრობენ აქ, სასწრაფო რომ დაგვჭირდეს აქ არ ამოვა, ტაქსი აქ ვერ ამოდის, არა წყალი, არა შუქი, გზას ჯვარი წერია… ერთხელ მაინც ეკითხა სოფლის წარმომადგენელს ამბავი. როცა მოვა შუქის გადახდის დრო, მეზობლებში იწყება დაპირისპირება, ზოგი ვერ იხდის, ზოგი ამბობს, რომ მე ამდენი არ დამიხარჯავს და რატომ უნდა გადავიხადოო და ვართ ასე! გვითხრან, სადამდე უნდა გაგრძელდეს ასე?"
"ზურგით ვათრევთ 2 კილომეტრზე ტვირთს, ესაა საქმე? მერე იტყვიან რატომ გარბიან სოფლებიდანო? აი ამიტომ! არცერთი ახალგაზრდა არ ჩერდება ამის გამო სოფელში. ძალიან გთხოვთ, დაგვეხმარეთ!"– მოითხოვენ სილაურის მცხოვრებლები.
ოზურგეთის მუნიციპალიტეტის სოფელ სილაურის დეპუტატი გოჩა კილაძე ამბობს, რომ ე.წ. "ძეგორის" უბანში გზის სარემონტო სამუშაოები მალე დაიწყება.
"ტენდერში გამარჯვებულია კომპანია, რომელიც გზის სარემონტო სამუშაოებს დაიწყებს და 150 მეტრზე ბეტონის გზის საფარი დაიგება"– ამბობს კილაძე.
ჩვენს კითხვაზე, 2 კმ გზიდან რატომ იგება გზა მხოლოდ 150 მეტრზე, კილაძე გვპასუხობს, რომ აღნიშნული უბნის მხოლოდ ერთი მონაკვეთის გაკეთებაა დაგეგმილი.
–ბატონო გოჩა, იყავით თუ არა საქმის კურსში ე.წ "ძეგორის" უბანში არსებული პრობლემების შესახებ და თუ დააყენეთ გზის საკითხი ხელისუფლების წინაშე? მოსახლეობა ამბობს, რომ დეპუტატი მათ ყურადღებას არ აქცევს…
–მე ყურადღების მიქცევა მაკლია მაგ ხალხისთვის?
_ რაში გამოიხატება ბატონო გოჩა?
– მე არ ვიცი ვინ რა გითხრათ, მაგრამ გასვენება რომ იყო, ტრაქტორით ხრეში გავაგზავნე რომ გზაზე დაეყარათ. იქნება ერთმა და ორმა კი გითხრათ არ მაქცევს ყურადღებასო, რა ვქნა ახლა, ასე როგორ აგიხსნა? როცა გნახავ, გაგარკვევ ყველაფერში."
