“გოლეადორი” კარის დარაჯები

ხოსე ლუის ჩილავერტი (პარაგვაი) – 67 გოლი

პარაგვაელი მეკარე მეოცე საუკუნის საუკეთესო მეკარეების რეიტინგში მეექვსე ადგილზე გავიდა. კარიერის განმავლობაში ჩილავერტმა 620 მატჩში მიიღო მონაწილეობა და 67 გოლი გაიტანა. ეროვნული ნაკრების შემადგენლობაში ჩილავერტს 8 გოლი აქვს გატანილი. გარდა ამისა, ის უნიკალური რეკორდის ავტორია: ჩილავერტი ერთადერთი მეკარეა მსოფლიო ფეხბურთის ისტორიაში, რომელმაც ერთ მატჩში 3 გოლი გაიტანა.

რენე იგიტა (კოლუმბია) – 43 გოლი

ყველაზე შეშლილი კარის დარაჯი მსოფლიოში და ყველაზე საოცარი ილეთის გამომგონებელი, რომელიც ფეხბურთის ისტორიაში "მორიელის დარტყმით" შევიდა – კოლუმბიელი რენე იგიტა ფეხბურთის ყველაზე კოლორიტული და ექსტრავაგანტური პერსონაჟია, რომელმაც არასაფეხბურთო ამბებითაც გაითქვა სახელი. 1991 წელს მან პირადად მოინახულა თავისი მეგობარი, ნარკობარონი პაბლო ესკობარი ციხეში, რომელსაც ბრალად ედებოდა ადამიანის გატაცება და 2004 წელს კოკაინის მოხმარება. იგიტას ანგარიშზე 43 გოლია და მათი უმრავლესობა მან კარიდან გამოსვლისას, თამაშის დროს გაიტანა. იგიტა ნაკრებში 1999 წლიდან აღარ თამაშობდა, ხოლო საკლუბო დონეზე 44 წლის ასაკამდე ასპარეზობდა და კარიერა 2010 წელს დაასრულა.

ხორხე კამპოსი (მექსიკა) – 39 გოლი

ხორხე კამპოსი საფეხბურთო სამყაროს აკრობატული ნახტომებით, საჯარიმოს გარეთ თამაშით და ფერადი მაისურებით დაამახსოვრდა, რომელთა დიზაინიც თავად ეკუთვნოდა. მექსიკის ნაკრების ექსგოლკიპერი ბომბარდირის ნიჭითაც გამოირჩეოდა და რამდენიმე მატჩი საკუთარ კლუბებში თავდამსხმელის ადგილზე დაუწყია. კამპოსმა 130 მატჩი ჩაატარა მექსიკის ნაკრების შემადგენლობაში და კარიერა 2004 წელს დაასრულა.

ჰანს-იორგ ბუტი (გერმანია) – 33 გოლი

გერმანელმა მეკარემ ჰანს-იორგ ბუტმა ოფიციალურად კარიერა 2012 წელს დაასრულა. ის არის 2002 წლის მუნდიალის ვიცე-ჩემპიონი და 2010 წლის მუნდიალის მესამე ადგილის მფლობელი. კარიერის განმავლობაში ბუტს რამდენიმე ათეული გოლი აქვს გატანილი, უმეტესობა 11-მეტრიანი დარტყმით, მათ შორის კი უნიკალური რეკორდის ავტორიცაა. ბუტს სამი სხვადასხვა კლუბის შემადგენლობაში აქვს გატანილი გოლი  |"იუვენტუსის" კარში და სამივე გოლი  ჩემპიონთა ლიგის  გათამაშებისას გავიდა. საგულისხმოა, რომ მეკარე ბუტი 1999-2000 წლების სეზონში "ჰამბურგის" შემადგენლობაში ყველაზე შედეგიანი ფეხბურთელი იყო 9 გატანილი გოლით.

დრაგან პანტელიჩი (იუგოსლავია) – 26 გოლი

წარმოშობით სერბი დრაგან პანტელიჩი 80-იან წლებში ასპარეზობდა და სხვადასხვა კლუბის შემადგენლობაში, 26 გოლია მის ანგარიშზე, მათ შორის, ორი იუგოსლავიის ნაკრების შემადგენლობაში. პანტელიჩი კლუბ "რადნიჩკის" საშტატო პენალტისტი იყო და მას ასევე, ორჯერ მოუხდა პენალტის დარტყმა ფრანგულ „ბორდოში” თამაშისას. სათამაშო კარიერა პანტელიჩმა 34 წლის ასაკში, 1985 წელს, იუგოსლავიაში დაასრულა.