ქალაქ ოზურგეთის მუნიციპალიტეტის საკრებულოს ფრაქცია "ოზურგეთის მომავლისათვის"თავმჯდომარემ თამარ ნადირიძემ და წევრებმა ლევან მგელაძემ და ნათია შარაშენიძემ ოზურგეთის დემოკრატიული ჩართულობის ცენტრში პრესკონფერენცია გამართეს, რომელიც ქალაქ ოზურგეთის მერიის პრესსამსახურის მიერ საკრებულოს სხდომასთან დაკავშირებით მომზადებულ ვიდეო – მასალას ეხებოდა:
"ბეგლარ სიორიძე მისთვის არასასურველი ადამიანების დისკრედიტაციას და ყალბი ინფორმაციის გავრცელებას ხალხის ფულის გამოყენებით ახდენს.
2015 წელს 3 სექტემბერს მედიასაშუალება "გურია news"-ის ვებ-პორტალზე გამოაქვეყნდა სტატია "ოზურგეთის მერის პასუხი ოპოზიციონერ დეპუტატს." სტატიას თან ერთვის ვიდეო მასალა და აქვე დადებული აქვს ნიშანი "R" იმის მაჩვენებლად, რომ სტატია დაფინანსებულია.
ვიდეომასალის დამზადებისას გამოყენებულია სპეციალური სამონტაჟო ტექნიკური საშუალებები და ასევე სპეციალური ცოდნის ადამიანების მომსახურება. ვიდეომასალას დადებული აქვს მერიის პრესამსახურის თანამშრომლის საინფორმაციო ხასიათის ტექსტი, ამასთანავე შეიცავს კადრებს ოზურგეთის საკრებულოს ამავე დღის სხდომიდან და სიუჟეტში ჩართულია ოზურგეთის მერის, საკრებულოს თავმჯდომარის, საკრებულოს თავმჯდომარის მოადგილის და საკრებულოს სამანდატო,საპროცედურო, იურიდიულ საკითხთა და ეთიკის კომისიის თავმჯდომარის ინტერვიუები. მერიას ვიდეომასალის დახმარებაში ტექნიკური და ინტელექტუალური დახმარება გაუწია გურიის სამხარეო ადმინისტრაციამ.
ვიდეომასალა ასახავს ბეგლარ სიორიძის, საკრებულოს თავმჯდომარის გელა კობალაძის, საკრებულოს თავმჯდომარის მოადგილის და საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარის ინტერვიუებს. ვიდეომასალის დამზადება პასუხად მოყვა თამარ ნადირიძის სოციალურ ქსელში გავრცელებულ საჯარო შეკითვას – აპირებდა თუ არა მერია ოზურგეთის ძველი პოლიციის წინ მდებარე პარკის გასხვისებას.
ოზურგეთის მუნიციპალიტეტის მიერ გავრცელებულ ინფორმაცია შეიცავს ჩვენი ფრაქციის წევრების დისკრედიტაციის მცდელობას, რადგანაც მასში მოხსენებული ვართ, როგორც პროვოკატორები და არასწორი ინფორმაციის გამავრცელებლები. ამასთანავე დაგმობილია ჩვენი მხრიდან საკრებულოს სხდომის დატოვება.
მიგვაჩნია, რომ მოცემულ შემთხვევაში ადგილი ჰქონდა აშკარად გაყალბებული მედია – პროდუქტის მომზადებას ადმინისტრაციული ორგანოს ტექნიკური და ადამიანური რესურსის გამოყენებით. გარდა იმისა, რომ მედიაპროდუქტი შეიცავდა ჩვენი დისკრედიტაციის და რეპუტაციის შემლახველ ინფორმაციას, ამასთანავე ამ ყველაფრის გავრცელებისათვის მედიასაშუალებისათვის გამოყენებული იქნა საბიუჯეტო სახსრები. ხსენებულიდან გამომდინარე ოზურგეთის მერმა კვლავ დაადასტურა, რომ ხალხის მიერ მისთვის მინდობილ ფულს რაშიც უნდა იმაში გამოიყენებს, მათ შორის განსხვავებული აზრის ოპოზიციონერი დეპუტატების დისკრედიტაციისათვისაც რაც დაუშვებელია.
მიგვაჩნია, რომ ასეთი ფორმით მისთვის არასასურველი ადამიანების წინააღმდეგ ბრძოლა უფრო მეტ საზოგადოებრივ ყურადღებას იმსახურებს.
საჯაროდ მივმართავთ გურიის გუბერნატორს გია სალუქვაძეს, ოზურგეთის მერს ბეგლარ სიორიძეს და ოზურგეთის მუნიციპალიტეტის საკრებულოს თავმჯდოამრეს გელა კობალაძეს შემდეგი მოთხოვნით:
ქალაქ ოზურგეთის მუნიციპალიტეტის საკრებულოს ფრაქციას გამოუყონ -მატერიალ ტექნიკური საშუალებები, ტექნიკური პერსონალი და სახსრები იგივე სახისა და ფორმატის ვიდეომასალის დასამზადებლად და გასავრცელებლად, რაც დააბალანსებს ზოგადად თემას და უზრუნველყოფს ჩვენი საზოგადოებისათვის დასკვნების გამოტანისათვის საჭირო საინფორმაციო ველს"_ განაცხადა პრესკონფერენციაზე ფრაქცია "ოზურგეთის მომავლისათვის" თავმჯდომარემ.
"გურია ნიუსმა" აღნიშნულთან დაკავშირებით ქალაქ ოზურგეთის მერიის პრესსამსახურს მიმართა, სადაც გვითხრეს, რომ ქალაქ ოზურგეთის მერი ბეგლარ სიორიძე ამ თემასთან დაკავშირებით კომენტარს არ გააკეთებდა.
გურიის გუბერნატორი გია სალუქვაძე კი თამარ ნადირიძეს პასუხობს:
"ქალბატონი თამარი არ არის შეზღუდული მედიასაშუალებების კომუნიკაციით. თუ მას სჭირდება რაიმე სახის მატერიალურ-ტექნიკური საშუალებები, მიმართოს შესაბამის სამსახურს. რაც შეეხება, გუბერნიის ბალანსზე არსებულ ვიდეო-კამერას, ის არის მუდმივად გამოყენებული ოთხივე მუნიციპალიტეტის თხოვნის შემთხვევაში და გუბერნია მზად არის ასევე დაუთმოს ვიდეო-კამერა ნებისმიერ სუბიექტს თხოვნის შემთხვევაში სხვა დროსაც" – აღნიშნავს სალუქვაძე.
