დღეს გურიის ფეხბურთის ფედერაციის ოფისთან მერაბ ჟორდანიას მხარდამჭერები, ვეტერანი ფეხბურთელების მცირედი ნაწილი და ნათესავები მასმედიასთან ერთად 17 საათზე შეიკრიბნენ. ამ დროისთვის დაანონსებული იყო გრფფ – ს გამგეობის სხდომის ჩატარება, რომელიც ოთხშაბათსაც იგეგმებოდა, მაგრამ არ ჩატარდა. ახლაც იგივე განმეორდა, ოღონდ ერთი განსხვავებით – თუ მაშინ გამგეობის ოთხი წევრი მაინც გამოცხადდა, ახლა ადგილზე არავინ მისულა. როგორც ირკვევა, გამგეობის წევრები ბენია თავბერიძე, იური ჩხაიძე და მერაბ ვანიძე მართლაც აპირებდნენ ჩამოსვლას, მაგრამ გზაში გადაიფიქრეს და უკან დაბრუნდნენ. ამის მიზეზად გრფფ – ს ვიცეპრეზიდენტმა ბენია თავბერიძემ ლანჩხუთში შესაძლო უმართავი სიტუაცია დაასახელა.
"გზაში ვიყავით, როცა დაგვირეკეს და გვირჩიეს არ ჩავსულიყავით ლანჩხუთში, იქ უმართავი სიტუაციაა და ჯობს საერთოდ არ ჩამოხვიდეთო"– გვითხრა თავბერიძემ სატელეფონო საუბრისას.
კითხვაზე, თუ ვინ დარეკა და რა უმართავ სიტუაციაზე იყო საუბარი, მან კომენტარი არ გააკეთა.
"არ მინდა რა, დავიღალეთ ყველა, მეტს ვერაფერს გეტყვით" – დასძინა გრფფ – ს ვიცეპრეზიდენტმა.
არადა, ადგილზე უმართავი სიტუაცია აშკარად არ შეიმჩნეოდა. უბრალოდ მერაბ ჟორდანიას რამდენიმე მხარდამჭერი ღიად აფიქსირებდა, რომ დღეს გამგეობის სხდომა აუცილებლად უნდა გაიმართოს და მისმა წევრებმა შეცვალოს გრფფ – ს პრეზიდენტის ის ერთპიროვნული და მათთვის მიუღებელი უკანონო გადაწყვეტილება, სადაც საქართველოს ფეხბურთის ფედერაციის პრეზიდენტობის არჩევნებზე რევაზ არველაძე, ხოლო ხმის უფლებით გოჩა ტყებუჩავა იქნენ წარდგენილნი.
სხვათა შორის, ამ შეკრებაზე მერაბ ჟორდანიას მხარდამჭერებთან ერთად ლევან კობიაშვილის მხარდამჭერებიც შეინიშნებოდნენ და ჩვენი ინფორმაციით, მათთვის მთავარი იყო სხდომა ჩატარებულიყო და კახა ებრალიძის ზემოთ ნახსენები გადაწყვეტილება გაუქმებულიყო.
თავად ებრალიძე კვლავაც არ გამოჩენილა ლანჩხუთში. ის თბილისში იმყოფება, სხვა რეგიონების ფედერაციების ხელმძღვანელებთან ერთად გუშინ ლევან კობიაშვილის პროგრამას ისმენდა, ხვალ კი საქართველოს ნაკრების მატჩზე დასწრებას აპირებს.
სხვათა შორის, მერაბ ჟორდანიას მომხრეებმა გაიგეს რა ებრალიძე არ იქნებოდა, ისევ ალაპარაკდნენ ფედერაციის მხრიდან შესაძლო ზეწოლაზე, ხოლო გამგეობის წევრების არჩამოსვლის შემდგომ – უკვე ხელისუფლების მხრიდან ზეწოლაზე. იგივე აზრზე იყო მერაბ ჟორდანიას და ხათუნა ჟორდანიაც, რომელმაც ჩვენთან საუბარში დაადასტურა კიდეც ეს.
–როცა გამგეობის წევრები მოდიოდნენ და არ ჩამოვიდნენ ეს ზეწოლაა, აბა რა.
– ვისგან?
– საქმის კურსში ვარ, რომ ფეხბურთის ფედერაციამ განახორციელა ზეწოლა რეგიონულ ფედერაციაზე და არაკანონიერად, ერთპიროვნულად მიიღეს გადაწყვეტილება წარედგინათ რეზო არველაძე, ხოლო დელეგატად დაენიშნად ისეთი ადამიანი, რომელიც არველაძეს მისცემდა ხმას. მე დამიკავშირდნენ ადამიანები, რომლებიც თვლიდნენ, რომ ამ კანონდარღვევას აქვს ადგილი და უნდათ, რომ ჩაატარონ გამგეობის სხდომა. ებრალიძე კვლავაც არ ჩანს, მაგრამ არც სხვები ჩანან რატომღაც, რომლებსაც სურდათ მერაბ ჟორდანიას წარდგენა.
– და როგორ ფიქრობთ, რატომ არ ჩანან ისინი?
– მე საფუძვლიანი ეჭვი მაქვს, რომ ერთის მხრივ ადგილი აქვს ზეწოლას ფედერაციის მხრიდან. დღეს კი უკვე შეგნებულად ჩაშალეს ეს სხდომა, უკვე სახელისუფლებო ძალების ჩარევის შედეგად. ამჯერად ზეწოლა გამგეობის წევრებზე განხორციელდა. მაქვს ინფორმაცია, მთელი ლანჩხუთი აპროტესტებს იმ ფაქტს, რომ ერთი ძალა კბილებით იცავს არველაძის კანდიდატურას, მეორე მხარე კი ძალაუფლებით ცდილობს სახელისუფლებო კანდიდატის, კობიაშვილის გაყვანას.
– კი მაგრამ კობიაშვილის მხარდაჭერა ღიად დააფიქსირა თავად საფეხბურთო კლუბმა "გურიამ" და ლანჩხუთში ბევრს მიაჩნია, რომ ვის თუ არა "გურიას" უნდა დაეფიქსირებინა, წესით და რიგით, მერაბ ჟორდანიას მხარდაჭერა.
– ეს როდის დაფიქსირდა და ვინ დააფიქსირა?
– ეს ოფიციალურად დაგვიდასტურეს სამშაბათს.
– ჩემი ინფორმაციით, ეს განცხადება გააკეთა ადამიანმა, ვისაც არაფერი ეკითხება საერთოდ.
– კი მაგრამ ეს ადამიანი კლუბის პრეზიდენტი და ამავდროულად გამგებელი, ზაზა ურუშაძე იყო.
– ჰოდა ამ ადამიანს რამე შეხება აქვს ფეხბურთთან? ერკვევა კი ფეხბურთში საერთოდ? მერაბ ჟორდანიას პროგრამას თუ გაეცნო, რომ აცხადებს კობიაშვილის პროგრამა მომეწონაო? წერა – კითხვა იცის საერთოდ?
ხათუნა ჟორდანიას ამ გამონათქვამზე კომენტარის გაკეთება არ ისურვა ზაზა ურუშაძემ, რომელმაც განაცხადა, რომ არ იცნობს ამ ადამიანს და არ აინტერესებს რას იტყვის საერთოდ.
"არ ვიცნობ ამ ადამიანს. კლუბმა დააფიქსირა საკუთარი პოზიცია და არ მაინტერესებს ვინ რას იტყვის. მე მერაბ ჟორდანიას აზრი მაინტერესებს, მისი დის კი არა" – განაცხადა ურუშაძემ.
მოკლედ კიდევ ერთი სხდომა არ შედგა, ორშაბათს იწურება კანდიდატის წაყენების ოფიციალური ვადა და საქმე იქითკენ მიდის, ცაიტნოტში ჩავარდნილი გრფფ – ს გამგეობის წევრებს, რაიმეს შესაცვლელად დრო ფაქტობრივად აღარ რჩებათ.
"ჩემთვის არავის დაურეკავს, რომ გამგეობის სხდომა თუ იყო მოწვეული. არადა, გამგეობის წევრებთან კომუნიკაცია მაქვს. არცერთხელ გამგეობის არცერთი წევრი არ მისულა ფედერაციაში დათქმულ დროს და არ მესმის, თუ გამგეობის სხდომას იწვევენ უჩემოდ, თავად რატომ არ მოდიან?
აშკარად ზეწოლას განიცდიან. მირეკავენ, რომ შეხვედრა უნდათ ჩემთან, დავთქვამთ დროს და მერე არ მოდიან. ეტყობა, ისეთ დღეებს არჩევენ, ადგილზე რომ არ ვარ.
მესმის მათი, მათ ჯერ კიდევ ჰყოფნით ადამიანობა, რომ ჩემთან შეხვედრის უხერხულობა აქვთ. მესმის მათი ყველანაირად, მაგრამ მეც მყავს ოჯახი, რომელიც ეს დღეებია სტრესშია, თუმცა, ვერ დავკარგავ ადამიანობას.
მინდა იმ ხალხს მივმართო, ვისაც ჩემს წინააღმდეგ ავალებენ ასეთ რაღაცებს _ საკუთარ თავთან მარტო რომ დარჩებით, დაფიქრდით თქვენს საქციელზე. მე არავისგან არაფერს ვითხოვ. მზად ვარ, არჩევნების შემდეგ, ნებისმიერ შემთხვევაში დავტოვო თანამდებობა, რაც არაერთხელ გავაკეთე და დავამტკიცე, რომ არ ვარ სკამს ჩაბღაუჭებული, მაგრამ პატარა ადამიანები ამას მაინც ვერ იგებენ _ ჩემგან ღალატი გამორიცხულია, მოღალატეებს კი არაერთხელ მივუტევე და მივუტევებ!“- აცხადებს ებრალიძე.
