ოზურგეთის მუნიციპალიტეტის სოფელ შემოქმედში მცხოვრებმა რეზო ყაზაიშვილმა "გურია ნიუსის" რედაქციას ოფიციალური განცხადებით მიმართა და კონკრეტულ საკითხის გაშუქება თხოვა:
"მოგახსენებთ, რომ ჩემი ოჯახის წევრებთან ერთად ვცხოვრობ სოფელ შემოქმედის თემში შემავალი კურორტ გომისმთის მიმდებარე ტერიტორიაზე. იქ მცხოვრები მოსახლეობა 1980 – 90 – იან წლებში განიცდიდა სასმელი წყლის უკმარისობას, ამიტომ ჩემი ინიციატივით და სახსრებით შევიძინეთ წყლის 5 -ტონიანი რეზერვუარი და 1 კმ. სიგრძის პლასტმასის მილები და სასმელი წყლით უზრუნველვყავით მოსახლეობა. აღნიშნული საქმის მოგვარებაში დახმარება გაგვიწია მაშინდელმა სოფლის საბჭოს თავმჯდომარემ მიხეილ ჟღენტმა.
2009 წლამდე წყალი ყველა ოჯახს მიეწოდებოდა, მაგრამ შემდეგ იქ მაცხოვრები მოსახლეობის ძირითადი ნაწილი წყლის მიწოდების გარეშე დარჩა, იმიტომ რომ წყლის რეზერვუარი და მილები მოიპარეს. როგორც დავადგინეთ, ეს კანონსაწინააღმდეგო ქმედება ჩაიდინა მეზობელი სოფლიდან მოსულმა რ. ე. –მ, რომელიც იქ მეცხოველეობას ეწეოდა.
მისი განმარტებით , წყლის მილები იყიდა ხელისუფლების წარმომადგენლებისგან, თუ ვისგან ვერ დაასახელა, ან როგორ დაასახელებდა, მაშინ როცა ეს მილები ჩემს მიერ იყო შეძენილი. საქმის კურსში ჩავაყენე მაშინდელი რაიონის ხელმძღვანელობა, შსს ოზურგეთის რაიონული სამმართველო, მივმართე საქართველოს მაშინდელ პრეზიდენტსაც, მაგრამ რეაგირება არ მომხდარა.
პოლიციის თანამშრომლების დახმარებით წყლის მილები მომიტანეს, მაგრამ რეზერვუარი დღემდე არ არის ნაპოვნი.
მე ხანდაზმული ადამიანი, დღემდე ველოდები სამართლიანობის აღდგენას, მაგრამ ამაოდ. ბოლო წლებში მივმართე ხელისუფლების ორგანოებსაც, რომლებმაც დაავალეს ადგილობრივი ხელისუფლების წარმომადგენლებს აღნიშნული საკითხის მოგვარება და გამოძიების ჩატარება, მაგრამ დღემდე უყურადღებოდ რჩება ჩემი მოთხოვნა.
ბოლოს მივმართე მუნიციპალიტეტის გამგებელს მერაბ ჭანუყვაძეს, რომელმაც ჩემს თხოვნაზე მიპასუხა, რომ ამ საკითხის მოგვარება არ არის მისი საქმე და ეს ეხება საგამოძიებო ორგანოებს. ასევე მინდა გითხრათ, რომ როცა პრემიერ-მინისტრი ირაკლი ღარიბაშვილი იყო ჩამოსული ოზურგეთში, მინდოდა მასთან შეხვედრა, მაგრამ მოტყუებით, მერაბ ჭანუყვაძის დავალებით ჩამომიყვანეს პოლიციის განყოფილებაში, სადაც გამაჩერეს დაახლოებით 4 საათი, როცა პრემიერ -მინისტრი წავიდა რაიონიდან, საღამო საათებში გამომიშვეს პოლიციიდან.
"გურია ნიუსს" ვთხოვ, ჩაატაროს ჟურნალისტური გამოძიება და დაადგინოს ჩემი საქმესთან დაკავშირებული გარემოებები და ამხილოთ ადგილობრივი ხელისუფლებისა და შესაბამისი ორგანოების თანამშრომლები, რომლებმაც ჩემი პიროვნული ღირსება შელახეს, გამოაშკარავდნენ და პასუხი აგონ კანონის შესაბამისად" – წერს ოფიციალური განცხადებაში რეზო ყაზაიშვილი.
როგორც ადგილობრივები ამბობენ, პირი რომელსაც რეზო ყაზაიშვილი ქურდობას აბრალებს, გარდაცვლილია.
"გურია ნიუსი" აღნიშნულ საკითხთან დაკავშირებით ოზურგეთის მუნიციპალიტეტს გამგებელს მერაბ ჭანუყვაძეს ესაუბრა:
"ამ კონკრეტულ საქმესთან დაკავშირებით, გეტყვით, რომ მე ნამდვილად მქონდა ბატონ რეზოსთან შეხვედრა. რასაც თვითონ ითხოვს, ეს არ განეკუთვნება მუნიციპალიტეტის კომპეტენციას. თუ მას აქვს საფუძვლიანი ეჭვი და რაიმე მტკიცებულებები, რომ მოპარეს ნივთი გომისმთაზე, უნდა მიმართოს შესაბამის ორგაონებს. მე გავესაუბრე მას, ავუხსენი და ვურჩიე, რომ ეს არ არის მუნიციპალიტეტის საქმე და უნდა მიმართოს საგამოძიებო ორგანობეს"– ამბობს ჭანუყვაძე.
ჭანუყვაძე აცხადებს, რომ რეზო ყაზაიშვილის პოლიციაში დაყოვნების ფაქტი არ მომხდარა.
"აღნიშნული ინფორმაცია არის აბსურდი, ტყუილი. მე პირიქით, ბატონ რეზოს არაერთი შეხვედრის დროს რჩევა მივეცი, ის თუ პოლიციაში აღნიშნულ საკითხთან დაკავშირებით დააყოვნეს, მე ამასთან დაკავშირებით კომენტარს ვერ გავაკეთებ, არანაირი კავშირი ამ საქმესთან არ მაქვს" – განაცხადა ჭანუყვაძემ.
შსს პრესსამსახურის ინფორმაციით, აღნიშნულ საქმესთან დაკავშირებით გამოძიება 2011 წელს დაიწყო და მიმდინარეობს სსკ 177 მუხლით. როგორც პრესსამსახურში გვეუბნებიან, მიუხედავად იმისა, რომ საქმე არის ხანდაზმული, საგამოძიებო ღონისძიებები აქტიურად მიმდინარეობს.
რაც შეეხება, იმას რომ პრემიერ-მინისტრის ვიზიტის დროს რეზო ყაზაიშვილი უკანონოდ ჰყავდათ პოლიციაში 4 საათის განმავლობაში დაკავებული, შსს პრესსამსახურში მსგავსს ფაქტს არ ადასტურებენ.
