როგორც წინასწარ დაანონსებული იყო, რვა სექტემბერს სუფსის თემის მოსახლეობამ, სოფელ ახალსოფელში, იქ სადაც ავტობანის მშენებელი ჩინური კომპანია "china railway 23rd" – ის ოფისი მდებარეობს, საპროტესტო აქცია დაიწყო. უკვე რამდენიმე დღეა ამ კომპანიის პარალიზების გამო სამუშაოები შეჩერებულია. ამ ყველაფრის მიზეზი ჩვენი მკითხველისთვის ნაცნობია. ამ აქციაზე რამდენიმე ახალი და კონკრეტული მოთხოვნა წამოაყენეს მოპიკეტეებმა და სანამ ყველა არ შესრულდება, არ აპირებენ გზის გახსნას.
პიკეტირების დაწყების დროს სუფსის მოსახლეობას ერთი კონკრეტული მოთხოვნა გააჩნდა – ადგილზე ჩამოსულიყო ინფრასტრუქტურისა და რეგიონული განვითარების მინისტრი ნოდარ ჯავახიშვილი. მხოლოდ მასთან შეხვედრაზე იყვნენ ისინი თანახმა და აცხადებდნენ, რომ სხვას არ ენდობოდნენ. როგორც აქციის ერთ-ერთმა ორგანიზატორმა ალეკო ევგენიძემ გაგვიცხადა, აქციის დაწყებიდან რამდენიმე დღეში, ამ მოთხოვნას კიდევ რამდენიმე შეემატა.
"მართალია თავიდან მხოლოდ ნოდარ ჯავახიშვილის ჩამოსვლას მოვითხოვდით, მაგრამ მოსახლეობამ რამდენიმე მოთხოვნა დაამატა. კერძოდ, გაუქმდეს 2012 წლის მონაცემებით შედგენილი მიწის შეფასების აუდიტორული დასკვნა და ასევე შეჩერდეს რამდენიმე ადამიანის მიწის ნაკვეთის ექსპროპრიაცია. ასევე, მოხდეს უშუალოდ ჩინური კომპანიის მიერ მიყენებული ზარალის აღმოფხვრა" -განაცხადა ევგენიძემ.
როგორც ირკვევა, ეთერ და ალექსანდრე იმედაიშვილების, ლაშა ტუღუშისა და ზვიად სარალიძის კერძო საკუთრების ექსპროპრიაციით, საავტომობილო გზების დეპარტამენტმა ხალხის პროტესტის ჩახშობის მცდელობა მოინდომა, თუმცა, ამან შედეგი ვერ გამოიღო. მას დაემატა ისიც, რომ ჩინურმა კომპანიამ რამდენიმე გამოუსყიდავ ფართობში მაღალი ძაბვის გადამცემების საყრდენები დაამონტაჟა, რამაც გამოიწვია კერძო საკუთრების დაზიანება. განსაკუთრებულით ამახვილებენ აქცენტს, მარინა გუჯაბიძის ზარალის ანაზღაურებაზე.
მოსახლეობა ასევე ითხოვს, აღნიშნული მაღალი ძაბვის გადამცემების დემონტაჟსა და ფართობებიდან გამოტანას. სხვათა შორის, ლანჩხუთში შეხვედრისას გზების დეპარტამენტის თავმჯდომარის მოადგილემ ირაკლი ლითანიშვილმა აღიარა, რომ ჩინურ კომპანიას, მანამ, სანამ არ მოხდებოდა ფართობების გამოსყიდვა, არ ქონდა უფლება სამუშაოები ეწარმოებინა. მან მოსახლეობას აღუთქვა კიდეც, აუცილებლად მოიკითხავდა ამ საკითხს და კომპანიას პასუხსაც მოსთხოვდა. მაგრამ აქციის მონაწილეები ამტკიცებენ, რომ მაღალჩინოსანმა დანაპირები არ შეასრულა.
ხსენებული კომპანიის მიმართ სხვა ბრალდებებიც გაჟღერდა. კერძოდ, მის მიერ ახალსოფლის საყანე ფართობის 60-70 მეტრი დაზიანებული ღობის აღდგენას და სოფლის დახმარების პროგრამით გაკეთებულ სადრენაჟე არხის გაწმენდას ითხოვენ ადგილობრივები. აღმოჩნდა, რომ კომპანიას ერთ ადგილზე არხი ამოუვსია და ღობეც დაურღვევია, რის გამოც სოფლის ნახირი საყანე ფართობებს შესევია და მოსავლის ნაწილიც გაუნადგურებია.
პიკეტირებაში მონაწილეობას სუფსის მოსახლეობის გარდა, მუნიციპალიტეტის სხვა ადმინისტრაციული ერთეულების მაცხოვრებლებიც აპირებენ.
"აქციის დაწყების დღეს ადგილზე საავტომობილო გზების დეპარტამენტის წარმომადგენლები გამოცხადდნენ, სიტუაციაში გაერკვნენ და აქაურობა მალევე დატოვეს. ამის შემდეგ მოსახლეობასთან არავინ მოსულა. ჩვენ აქციას მაინც ვაგრძელებთ, 13 სექტემბრამდე სუფსის მოსახლეობა მოახდენს პიკეტირებას, რომლებსაც ნიგოითის თემის მაცხოვრებლები ჩაენაცვლებიან, ორშაბათიდან ლესელები და სხვა თემის წარმომადგენლები გააგრძელებენ, მანამ სანამ არ შეწყდება გურული გლეხების დაყაჩაღება", – დასძინა ევგენიძემ.
მართალია რეგიონალური განვითარებისა და ინფრასტრუქტურის მინისტრი უშუალოდ ლანჩხუთში არ ჩამოსულა და ადგილობრივ მოსახლეობას არ შეხვედრია, თუმცა იმ მიწის მეპატრონეებს, რომელზეც ავტობანმა უნდა გაიაროს, ნოდარ ჯავახიშვილმა პასუხი გადაცემა "ბიზნესკურიერის" საშუალებით გასცა, სადაც განაცხადა, რომ გურულებისთვის შეთავაზებული თანხა ადეკვატურია.
"მათ მინისტრთან შეხვედრა კი არ უნდათ, არამედ უნდათ დიდი ფულის გადახდა იმაში, რაც არ ღირს ამდენი. რა ჰგონიათ, გურულებს, სვანებს, კახელებს – საიდან უხდის ამ ფულს სახელმწიფო. ბიუჯეტიდან იხდის." – ამბობს ჯავახიშვილი და სიტუაციის გართულების შემთხვევაში, მიწის ექსპროპრიაციასაც არ გამორიცხავს.
მინისტრის განცხადებით, თანხა დგინდება იმის მიხედვით, თუ რამდენადაა გაყიდული მიმდებარე ტერიტორიაზე მიწები. მისი თქმით, საშუალოდ, გურიაში 30-50 თეთრს იხდიან კვადრატულ მეტრზე.
მინისტრისვე განცხადებით , სამი ლარი წარმოადგენს ცარიელი მიწის ფასს და ნარგავები, ღობეები, ნაგებობები, ცალკე იანგარიშება.
