20 თებერვალს, გაზეთ “გურია ნიუსში” გამოქვეყნდა შორენა ღლონტის სტატია სახელწოდებით _ “ნაციონალური მოძრაობის” “მზრუნველობა” ბიუჯეტის ხარჯზე!”
“ერთიანი ნაციონალური მოძრაობა” უფასო სასადილო მზრუნველობა მოკლებულთათვის” _ ეს წარწერა უმწეოთა სასადილოს, დაახლოებით 2012 წლის 17 თებერვლის 15 საათსა და 10 წუთამდე “ამშვენებდა”. აღნიშნულ ობიექტს ბიუჯეტი, მხოლოდ მიმდინარე წელს, 75 000 ლარით აფინანსებს.
მას შემდეგ, რაც “გურია ნიუსი” ამ აბრით დაინტერესდა და კომენტარისთვის ოზურგეთის გამგეობისა და საკრებულოს პრესსამსახურებს მიმართა, მოულოდნელად, აბრა თვალსა და ხელს შუა გაქრა.
ჟურნალისტის კითხვას საკრებულოს საზოგადოებასთან ურთიერთობის განყოფილებამ ასეთი პასუხი გასცა: “როგორც გვაცნობეს, მზრუნველობამოკლებულთა სასადილოს ამჟამად, მსგავსი წარწერით აბრა არ აქვს. რაც შეეხება ნაციონალურ მოძრაობასთან სასადილოს კავშირს, შეგახსენებთ, რომ უფასო სასადილო მზრუნველობამოკლებულთათვის, თავის დროზე, ერთიანი ნაციონალური მოძრაობის ინიციატივით დაწყებული პროექტია”.
რატომ დასჭირდა ადგილობრივ ხელისუფლებას მსგავსი ქმედების ჩადენა, ამის მიხვედრა არც ისე რთულია. მაგრამ ამ “ისტორიული” აბრის ჩამომსხნელებს და ბრძანების გამცემ პირს ერთი პატარა დეტალი გამორჩათ “მხედველობიდან” _ ჩვენს მიერ გადაღებულია ფოტომასალა, რომელზეც დაფიქსირებულია გადაღების დღე, რიცხვი, წელი და საათი. აღარაფერს ვამბობთ რიგით მოქალაქეებზე, რომლებმაც ამ აბრიან სასადილოს ბოლოს 17 თებერვლის სამ საათამდე ჩაუარეს და აბრის არსებობაც მშვენივრად ახსოვთ.
საქმე იმაშია, რომ სისხლის სამართლის კოდექსში, საარჩევნო კოდექსსა და “მოქალაქეთა პოლიტიკური გაერთიანებების” შესახებ ორგანულ კანონში ცვლილება, 2011 წლის დეკემბერში შევიდა _ აღნიშნული ცვლილებების მიხედვით, პოლიტიკური სუბიექტის მიერ ნებისმიერი სახის ქველმოქმედება დასჯადია.
აღნიშნულ ფაქტთან დაკავშირებით კომენტარები გააკეთეს არასამთავრობო ორგანიზაციების წარმომადგენლებმა და დიდი გამოხმაურება ჰპოვა სოციალურ ქსელებში.
“ქართული ოცნების” საინიციატივო ჯგუფის წევრმა, ადვოკატმა მანანა კობახიძემ “ფეისბუქის” საშუალებით გაავრცელა შემდეგი სახის განცხადება: “კონტროლის პალატას მოვუწოდებ, მიიღოს კანონით გათვალისწინებული სანქციები “ნაცმოძრაობის” წინააღმდეგ _ ამომრჩევლის მოსყიდვა სახეზეა!!! 2012 წლის 17 თებერვალს აი, ასეთი აბრა იყო გაკრული ოზურგეთში უმწეოთა სასადილოზე, რაც ჟურნალისტის მხრიდან რეაგირების შემდეგ სასწრაფოდ ჩამოხსნეს, თუმცა, დანაშაულის კვალი, იქვე შენობაში, კარადის უკან დამალეს! ახალი, რეპრესიული კანონი მხოლოდ “ქართული ოცნების” წინააღმდეგ რომ აამოქმედეს, თავის დანაშაულებს მიხედონ!
ამ საკითხთან დაკავშირებით “გურია ნიუსმა” კომენტარის გაკეთება სთხოვა რეგიონული პოლიტიკის, თვითმმართველობისა და მაღალმთიანი რეგიონების კომიტეტის თავმჯდომარეს, ვახტანგ ბალავაძეს (ინტერვიუს გთავაზობთ სტილის დაცვით):
_ ბატონო ვახტანგ, “გურია ნიუსში” გამოქვეყნდა სტატია, რომელზეც საუბარია იმის შესახებ, რომ ოზურგეთში “უმწეოთა სასადილოს” 2012 წლის 17 თებერვლის ჩათვლით “ამშვენებდა” აბრა წარწერით _ “ერთიანი ნაციონალური მოძრაობა უფასო სასადილო მზრუნველობა მოკლებულთათვის”. ნიშნავს თუ არა ეს იმას, რომ ნაციონალური მოძრაობის მხრიდან ადგილი აქვს, მოქალაქეთა პოლიტიკური გაერთიანებების შესახებ” ორგანული კანონის დარღვევას, რაც გამოიხატება ქველმოქმედების გზით მოსახლეობის მოსყიდვაში.
_ დავიწყოთ იქედან, რასაც გულისხმობდა ეს პროექტი “უფასო სასადილოები” და პირდაპირ გეტყვით, რომ მოსყიდვად არ ითვლება. იმიტომ, რომ ეს არის ის ფუნქცია, რასაც თვითმმართველობა აკეთებდა. სია არის კონკრეტულად, ვინ არის უმწეო ადამიანები და ისე არ არის, რომ ვინც არის ჩვენი მხარდამჭერი, მარტო იმას ჰქონდეს შესვლის უფლება და ვინც არ არის, იმას _ არა. ასე რომ იყოს, მაშინ შეიძლება ითქვას… რაც შეეხება იმ კანონს, რომელიც ჩვენ მივიღეთ, ამ კანონში მაგ კუთხით არაფერი სიახლე არ არის.
_ რომელი კუთხით, ბატონო ვახტანგ?
_ მოსყიდვასთან დაკავშირებით. მაშინაც არ შეიძლებოდა და ახლაც არ შეიძლება. უბრალოდ, გაიწერა დეფინიცია. ამ კანონს რომ უკავშირებთ, ამიტომ გეუბნებით. კანონის მთავარი მიზანი ის არის, რომ გამჭვირვალე იყოს პროცესი, რომ არავის არ შეეძლოს, ხელისუფლება იქნება თუ ოპოზიცია, მნიშვნელობა არ აქვს, რომ მოისყიდოს მოსახლეობა. მნიშვნელოვანია, ასევე, ის, რა ფულით ხდება საარჩევნო კამპანიის დაფინანსება, ვისგან ფინანსდება, როგორ ფინანსდება და რაში ხარჯავს ამ ფულს. ამავდროულად, ყველას აქვს უფლება, შესაბამისი რეაგირება მოახდინოს, თუ თვლის რომ დაირღვა კანონი. ფინანსურ მხარესთან დაკავშირებით შეგიძლიათ მიმართოთ კონტროლის პალატას. თქვენს გაზეთში გამოქვეყნებულ კონკრეტულ შემთხვევაზე მიჭირს პასუხის გაცემა, რადგან ნამდვილად არ ვიცი, რა არის და ვისი დაფინასებით არის.
_ შემიძლია გითხრათ კონკრეტულად და დაზუსტებით, რომ ამ სასადილოს აფინანსებს ოზურგეთის მუნიციპალიტეტი, ამ წელს 75 000 ლარით.
_ და როგორ უნდა მოისყიდო. მოსყიდვა რა შუაშია?
_ ბატონო ვახტანგ, როდესაც სასადილოს აბრას აწერია “ერთიანი ნაციონალური მოძრაობა მზრუნველობა მოკლებულთათვის”, ეს იმას არ ნიშნავს, რომ ნაციონალური მოძრაობა პირდაპირ თუ არაპირდაპირ აღნიშნულ ობიექტს სააგიტაციოდ იყენებს?
_ არა, რა თქმა უნდა.
_ მაშინ, ამიხსენით რატომ?
_ იმიტომ, რომ ეს იყო პროექტი, რომელსაც ერქვა “უფასო სასადილოები _ ერთიანი ნაციონალური მოძრაობა.” შესაბამისად, მუნიციპალური პროექტია, მუნიციპალიტეტი აფინანსებს, ადგილობრივი ბიუჯეტის ფულია, არა პარტიის და ემსახურება მუნიციპალიტეტს.
_ რა შუაშია აქ “ერთიანი ნაციონალური მოძრაობა”? პროექტი, რომელზეც თქვენ საუბრობთ, არსებობდა ადრე, მაგრამ “მოქალაქეთა პოლიტიკური გაერთიანებების შესახებ” ორგანულ კანონში შესული ცვლილებების თანახმად, მსგავსი ქმედება ითვლება აგიტაციად და აკრძალულია.
_ რაც შეეხება იმას, რომ ეს არის აგიტაცია, ადრე სააგიტაციო პერიოდად ითვლებოდა რაღაც პერიოდი. მაგალითისთვის გეტყვით, რომ იყო საარჩევნო კამპანიის ბიუჯეტი და პარტიის ბიუჯეტი. ეხლა არის ერთიანი ფონდი. რასაც თქვენ ამბობთ, რომ ეს არის გარკვეული აგიტაციის საშუალება და ასე თვლის ვინმე, არასაარჩევნო პერიოდში როგორ შეიძლება ეს აგიტაციად ჩაითვალოს?! აგიტაცია არის ის, რომ გამოვდივარ, ვხვდები და ველაპარაკები. რასაც თქვენ ამბობთ, ეს შეიძლება იყოს ადმინისტრაციული რესურსის გამოყენება და მაგაზე იყოს პრობლემა.
_ ეგ მეორე პრობლემაა. მმართველი პარტია ნამდვილად იყენებს ადმინისტრაციულ რესურსს, რადგან ეს ობიექტი ფინანსდება ბიუჯეტიდან.
_ ეგ სხვა საკითხია,-თქო, მაგას გეუბნებით და გაყავით ორად ეს საკითხები.
_ ამ აბრას რომ ჰქონოდა წარწერა _ “ქართული ოცნება” მზრუნველობა მოკლებულთათვის”, ეს იქნებოდა თუ არა დარღვევა?
_ რაზე იქნებოდა დარღვევა? გააჩნია, ვინ გააკეთა და რას აკეთებს.
_ კიდევ ერთხელ შეგახსენებთ, რომ ბიუჯეტი აფინანსებს ამ ობიექტს…
_ გავიგე.
_ “ქართულ ოცნება” ან ნებისმიერ სხვა ოპოზიციურ პარტიას მსგავსი წარწერა, რომ გაეკეთებინა, ვფიქრობ, ამას დარღვევად ჩაუთვლიდით.
_ მაგას გეუბნებით. დავყოთ ეხლა, რა… მარტივად რომ დავყოთ და ვიღაცამ რომ გახსნას და გააკეთოს… თუ ამას არ გულისხმობთ და სხვა არის ოცნება. ოცნების სიტყვა კი არ არის აკრძალული, ან ნაციონალური მოძრაობის…
ამის შემდეგ “გურია ნიუსსა” და ვახტანგ ბალავაძეს შორის სატელეფონო საუბარი შეწყდა. 10 წუთის შემდეგ თავად ვახტანგ ბალავაძე დაგვიკავშირდა.
_ ბატონო ვახტანგ, ანუ თქვენ ამბობთ, რომ ნაციონალური მოძრაობის მხრიდან ამ კონკრეტულ შემთხვევაში არანაირ დარღვევას ადგილი არ ჰქონია?
_ მე, უბრალოდ, კონკრეტული შემთხვევა არ ვიცი და ამიტომაც მიჭირს კონკრეტული პასუხის გაცემა. მუნიციპალური დაფინანსება თუ არის, ერთი ეგ ვიცი ასი პროცენტით, რომ ჩვენ არ გვაქვს მასეთი რაღაც უფასო სასადილოებს ერთიანი ნაციონალური მოძრაობა რომ აფინანსებდეს. შესაბამისად, თუ არის მასეთი აბრა, არ უნდა იყოს ეგ აბრა.
_ თუ ბრძანდებით კომპიუტერთან, შემიძლია მოგაწოდოთ ფოტომასალა, სადაც აღბეჭდილია ეს აბრა და მითითებულია თარიღებიც. მოგეხსენებათ, დღეს ტექნიკა ამის საშუალებას იძლევა.
_ მე მჯერა თქვენი და ნამდვილად არ ვფიქრობთ, რომ არ გინახავთ. უბრალოდ, მე არ ვიცი. ერთი გეუბნებით იმას, რომ ნაციონალურ მოძრაობას ამასთან კავშირი არ აქვს. იმიტომ რომ, თავისთავად მუნიციპალურია. და მეორე, სად იყო ეგ აბრა გამოკრული ან რატომ იყო, მაგი არ ვიცი.
_ მას შემდეგ, რაც ამ აბრას “გურია ნიუსმა” სურათები გადაუღო და ოზურგეთის მუნიციპალიტეტს კომენტარისთვის დაუკავშირდა, აბრა სასწრაფო წესით ჩამოხსნეს…
_ სწორად მოქცეულან, რა გინდათ.
_ სწორად და სამართლიანად მოქცევა იმ შემთხვევაში იქნებოდა, ეს აბრა კანონში ცვლილებების შეტანისთანავე ჩამოეხსნათ და არა ორი თვის შემდეგ, ჟურნალისტების ჩარევის შედეგად. არ მეთანხმებით?
_ სამოქალაქო საზოგადოებისა და ჟურნალისტების მოვალეობას სწორედ ეგ არის. რომ ჩამოხსნეს, შედეგიც ხომ ეგ არის?
_ ვფიქრობ, სხვა, ნებისმიერ პარტიას გაცილებით მძიმე შედეგი დაუდგებოდა მსგავს შემთხვევაში…
_ მაგასთან დაკავშირებით თუ ვინმე თვლის, რომ არის გარკვეული დარღვევა, არსებობს გარკვეული ორგანოები, რომელთაც ზედამხედველობა ევალებათ და რეაგირებისთვის უნდა მიმართონ მას.
