ნორვეგიის მეფე ოლაფ მეხუთე – 1928 წელი
დიდ სპორტულ ღონისძიებებში მონაწილეობის მიღება მეოცე საუკუნეში ნორვეგიელი მონარქების ერთგვარ ტრადიციად იქცა. მეფე ოლაფ მეხუთემ, ჯერ კიდევ კრონ-პრინცობის პერიოდში, მონაწილეობა მიიღო 1928 წლის ზაფხულის ოლიმპიადაში ამსტერდამში. აფროსნობაში მან საკუთარი იახტით ("ნორმა") მიიღო შეჯიბრებაში მონაწილეობა და ყველა კონკურენტს გაუსწრო, რისთვისაც ოქროს მედალი მოიპოვა. სპორტის სიყვარული ოლაფმა თავის შვილს, ნორვეგიის ამჟამინდელ მეფე ჰერალდ მეხუთესაც ჩაუნერგა, რომელიც, მამის მსგავსად, იახტსმენი გახდა და მონაწილეობა სამ ოლიმპიადაში მიიღო. 1964 წელს ის ნორვეგიის მედროშეც კი იყო, თუმცა, მერვე ადგილზე უკეთესი შედეგი არ უჩვენებია.
საბერძნეთის მეფე კონსტანტინე მეორე – 1960 წელი
1960 წლის რომის ოლიმპიურ თამაშებზე საბერძნეთის მომავალმა მეფემ, კრონ-პრინცმა კონსტანტინემ, აფროსნობაში მიიღო მონაწილეობა და "დრაკონის" კლასში ოქროს მედლის მოპოვება მოახერხა. 20 წლის მომავალი მონარქი ოლიმპიადაზე ყველაზე ახალგაზრდა გამარჯვებული გახდა. საინტერესოა, რომ კონსტანტინე მეორის ეკიპაჟის წევრი გახლდათ ესპანეთის ამჟამინდელი დედოფალი სოფია – კონსტანტინეს უმცროსი და. კონსტანტინე საბერძნეთის უკანასკნელი მეფე გახლდათ, რადგან, 1974 წელს ქვეყანაში რესპუბლიკური მმართველობა დამყარდა.
ესპანეთის მეფე ხუან კარლოს პირველი – 1972 წელი
2012 წელს გემთმშენებელმა ვერფმა, "ვარადორ 2000-მა", რესტავრირებული იახტა "ფორტუნა" წარუდგინა მსოფლიო საზოგადოებას. ამ იახტით მიუნჰენის 1972 წლის ოლიმპიურ თამაშებში მონაწილეობას იღებდა ესპანელი მონარქი ხუან კარლოსი. მეფემ მაშინ ვერ აჩვენა კარგი შედეგი და ოლიმპიადიდან უმედლოდ დაბრუნდა. საინტერესოა, რომ ოლიმპიურ თამაშებში ესპანური მონარქიული ოჯახის არაერთმა წარმომადგენელმა მიიღო მონაწილეობა: 1988 წლის სეულის ოლიმპიურ თამაშებში ხუან კარლოსის ქალიშვილი, პრინცესა კრისტინა იღებდა მონაწილეობას და აფროსნობაში გუნდურ ჩათვლაში მე-20 ადგილი დაიკავა. გაცილებით წარმატებული გამოდგა პრინცი ფილიპის გამოსვლა მშობლიურ, 1992 წლის ბარსელონის ოლიმპიადაზე, სადაც მან მე-6 ადგილი დაიკავა.
ინგლისის პრინცესა ანა – 1976 წელი
საბერძნეთიდან დიდ ბრიტანეთში ოლიმპიური ცეცხლის ჩატანის საპატიო მისია დედოფალ ელიზაბეთ მეორის ქალიშვილს, პრინცესა ანას ხვდა წილად, რადგან იგი იმ დროისთვის სამეფო ოჯახის ერთადერთი წარმომადგენელი გამოდგა, რომელსაც მონაწილეობა ჰქონდა მიღებული ოლიმპიურ თამაშებში – მონრეალის 1976 წლის ზაფხულის ოლიმპიურ თამაშებში პრინცესა ანა ცხენოსნობაში მონაწილეობდა, სადაც 24-ე ადგილი დაიკავა. 1994 წლამდე ანა საერთაშორისო ოლიმპიური კომიტეტის წევრი იყო. ოლიმპიური ტრადიცია სამეფო ოჯახში ანას ქალიშვილმა, ზარა ფილიპსმა განაგრძო, რომელმაც დედაზე გაცილებით წარმატებულად იასპარეზა ლონდონის ოლიმპიურ თამაშებში და საცხენოსნო სპორტში ვერცხლის მედალოსანი გახდა.
მონაკოს მთავარი ალბერ მეორე – 1988, 1992, 1994, 1998 და 2002 წლების ოლიმპიური თამაშები
მონაკოს დიდი მთავარი ალბერ მეორე რეკორდსმენია მონარქებს შორის ოლიმპიურ თამაშებში მონაწილეობის თვალსაზრისით. რენიე მესამისა და გრეის კელის ერთადერთი ვაჟი ბავშვობიდან იყო ჩართული სპორტში. შავი ქამარი ძიუდოში, ჩრდილოეთ პოლუსის დაპყრობა და რალი "პარიზი-დაკარში" მონაწილეობის მიღება – ეს მხოლოდ მცირე ჩამონათვალია. ალბერ მეორემ ხუთ ზამთრის ოლიმპიადაში მიიღო მონაწილეობა, კალგარიში, ალბერვილში, ლილეჰამერში, ნაგანოსა და სოლთ-ლეიკ-სიტიში. დიდი მთავარი ბობსლეის შეჯიბრებაში იღებდა მონაწილეობას და მისი უმაღლესი შედეგი 24-ე პოზიციის დაკავება იყო.
