გასაიდუმლოებული მანდატურები

“ქალაქ ოზურგეთის საჯარო სკოლებში მანდატურებად ისინი დაინიშნნენ, რომლებმაც კონკურსის პირველი ტურიც კი ვერ გადალახეს”, _ ამის შესახებ “გურია ნიუსთან” მანდატურების კონკურსის ის მონაწილეები საუბრობენ, რომლებმაც პირველ ტურში _ უნარ-ჩვევებში, მაღალი ქულები დააგროვეს და გასაუბრებაც გაიარეს.

_ გვაქვს ინფორმაცია, რომ პირველი ტური ვინც ვერ გადალახა, იმ სიიდან რამდენიმე ადამიანი მაინც ინიშნება მანდატურად. რატომ? ალბათ, გავლენიანი ნაცნობი ან ნათესავი აღმოაჩნდათ, _ გვითხრა სამმა ქალბატონმა, რომლებიც მანდატურების კონკურსში მონაწილეობდნენ და როგორც თავად ამბობენ, ტესტირებაც ჩააბარეს, გასაუბრებაზეც იყვნენ, მაგრამ შემდეგ მათთვის არავის დაურეკავს და არც არავინ შეხმიანებია.

_ ჯერ ტესტირება, შემდეგ _ გასაუბრება. პირველი ეტაპიდან, მეორეში გადავიდა 19 კაცი. მათგან დაურეკეს მხოლოდ 4-ს, სულ კი 13 ადამიანი სჭირდებოდათ. შემდეგ გავიგეთ, რომ დანარჩენი ცხრა ისინი იყვნენ, რომლებმაც პირველ ეტაპზე ბარიერი ვერ გადალახეს. გვინდა, პრეზიდენტის ადმინისტრაციასა და განათლების სამინისტროში გავაგზავნოთ წერილები. იმიტომ, რომ ვფიქრობთ, მათ დანიშვნაში გურიის რეგიონის მაღალჩინოსნების ხელი ურევია. გვითხრეს, გაასაჩივრეთო. პოლიციის აკადემიაში კი გვეუბნებიან, ალბათ, დაბალი ქულები მიიღეთ და ამის გამო დაგიწუნესო. გვაქვს ინფორმაცია, ის ცხრა კაცი, ვინც ბარიერი ვერ გადალახა და მაინც დაინიშნა, პოლიციელების მეუღლეები და ნათესავები არიან. ქულებს საერთოდ აღარ მიაქციეს ყურადღება, თორემ მესამე ადგილზე ვიყავი ქულების მაჩვენებლის მიხედვით. რატომ მიიღეს 26-ქულიანი ადამიანი?

მეტად საინტერესო ფაქტის შესახებ გვიყვება კიდევ ერთი ადამიანი, რომელმაც ყველა ტური წარმატებით გაიარა და ტრენინგზეც მიიწვიეს:

გ. მ.: _ რა მოხდა, ვერ მივხვდი. პოლიციის აკადემიაში რომ მივედი ტრენინგებზე, ასე მითხრეს, შენ ჩანაცვლებული ხარ სხვა ადამიანით. დაელოდე, არ არის გამორიცხული, მეორე ეტაპზე გამოგიძახოთო.

_ კონკრეტულად ვის ესაუბრეთ?

_ პოლიციის აკადემიაში მითხრეს ეს.

_ სახელი და გვარი არ იცით იმ ადამიანის, ვინც ეს გითხრათ?

_ სამწუხაროდ, არა.

_ თქვენ, როგორც გავიგეთ, ტესტირების შემდეგ გასაუბრებაც წარმატებულად გაიარეთ, ანუ ტრენინგებზე გამოგიძახეს.

_ კი, ტრენინგებზე უნდა ვყოფილიყავი, მაგრამ ვინ დაგასწრო? 9 თებერვალს დამიკავშირდნენ აკადემიიდან და 13 თებერვალს უნდა ვყოფილიყავი თბილისში. მიზეზი ვერავინ ამიხსნა. ის კი გავიგე, საბოლოო ჯამში, ისეთები დანიშნეს, პირველ ტურშიც რომ ვერ გავიდნენ. იმის საშუალება ვის აქვს, ყველგან მიხვიდე და გაარკვიო ყველაფერი? თან გავლენიანი ადამიანიც უნდა გყავდეს, _ გვითხრა მან.

საგანმანათლებლო დაწესებულების მანდატურის სამსახურის პრესსამსახურის უფროსმა თეო ლალიაშვილმა ნაცნობ ხერხს მიმართა და გვითხრა, რომ აუცილებლად უპასუხებდა ჩვენს კითხვებს, თუმცა, დაპირება მხოლოდ დაპირებად დარჩა _ ლალიაშვილმა სატელეფონო საუბრის დროს თქვა, რომ ის ვერანაირად მოგვაწვდიდა ინფორმაციას, თუ ვინ დაინიშნნენ მანდატურებად გურიის რეგიონის სამივე მუნიციპალიტეტში. თუმცა, ბარიერგადალახული ადამიანების სახელობითი სია პოლიციის აკადემიის ოფიციალურ ვებგვერდზეა განთავსებული.

საქართველოს შინაგან საქმეთა სამინისტროს აკადემიის ვებ-გვერდის მონაცემებით, საგანმანათლებლო დაწესებულება მანდატურის სამსახურის შესარჩევი კონკურსის გამსვლელ ქულად განისაზღვრა 50 ქულა. კონკურსი წარმატებით გაიარეს შემდეგმა მონაწილეებმა”, _ წერია ვებ-გვერდზე და იმ ათი კონკურსანტის სახელი და გვარია მითითებული, რომლებიც “გურია ნიუსის” ოზურგეთის განყოფილებაში გასულ კვირას მოვიდნენ. ისინი მიიჩნევენ, რომ ის, რაც მოხდა, კორუფციის ნიშნებს შეიცავს: _ ისე გამოვიდა, რომ ყველაფერი უსამართლოდ ჩატარდა. ირღვევა ჩვენი უფლებები, ყველას გავაგებინებთ რაც მოხდა. თუ კონკურსს ატარებენ, იყოს კონკურსი და არა მაიმუნობა. რაღას გავყავდით უნარჩვევევების ჩასაბარებლად, თუ ჩაჭრილების დანიშვნას აპირებდნენ?! _ გვითხრეს მანდატურის კონკურსის ყოფილმა მონაწილეებმა.

მეტად საინტერესო ფაქტის შესახებ გვიყვება კიდევ ერთი ადამიანი, რომელმაც ყველა ტური წარმატებით გაირა და ტრენინგზეც დაუძახეს.

ექსპერტი განათლების საკითხებში, თამარ მოსიაშვილი ჩვენთან საუბრისას ამბობს, რომ თუ ეს ასე მოხდა, როგორც კონკურსის მონაწილეები ამბობენ, მაშინ საქმე გვაქვს პროცედურების დარღვევასთან.

ვინ დაინიშნებიან მანდატურებად გურიის საჯარო სკოლებში, მას შემდეგ გახდება ცნობილი, როდესაც განათლებისა და მეცნიერების სამინისტრო ნაციონალური არხებს მოუხმობს და საზოგადოებას ამცნობს, რომ კიდევ ერთი “სამართლიანი” კონკურსის შემდეგ, გურიაში მანდატურები თავიანთ საქმეს შეასრულებენ.

წერილი პრეზიდენტს

მანდატურობის მაძიებელმა ოზურგეთელებმა (წერილს ათი ადამიანი აწერს ხელს) სახელით, საქართველოს პრეზიდენტს მიხეილ სააკაშვილს ასეთი სახის წერილი გაუგზავნეს: “სახელმწიფო საქმეებით დატვირთულს, წვრილმანი პრობლემებით არ უნდა გაწუხებდეთ, მაგრამ გვესმის რა თქვენი უშუალო და გულწრფელი დამოკიდებულების შესახებ ნებისმიერი ადამიანის პრობლემის მიმართ, ვთამამდებით და მოგმართავთ თხოვნით: იქნებ, როგორმე ნათელი მოჰფინოთ საკითხს ოზურგეთის სკოლებისთვის მანდატურების შესარჩევ კონკურსში არსებულ გაუგებრობასთან დაკავშირებით.

ფაქტის შესახებ გაცნობებთ შემდეგს: კონკურსის პირველი ეტაპი _ ტესტირება წარმატებით გაიარა 19 ადამიანმა, რომლებიც დაშვებულ იქნენ მეორე ეტაპზე (გასაუბრებაზე). მესამე ეტაპზე უნდა გადასულიყვნენ ფსიქოლოგების მიერ მოწონებული კანდიდატები. 19-დან გამოიძახეს მხოლოდ ოთხი (არ ვსაუბრობთ იმაზე, თუ ეს ოთხი კანდიდატიც როგორ გამოიძახეს). დანარჩენებს, რომლებიც სამკვირიან გადამზადებას გადიან, არ გადაულახავთ კონკურსის პირველი ეტაპი (სულ გამოძახებულია 13 პიროვნება). გამოდის, რომ ტესტირება საჭირო სულაც არ ყოფილა, თუ დასკვნით ნაწილში მხოლოდ წინასწარ გათვალისწინებული კანდიდატები იქნებოდა გამოძახებული.

ტესტირება გავლილი 14 კონკურსანტი, რომლებიც გამოძახებულთა სიაში არ აღმოვჩნდით, თავს შეურაცხყოფილად და მოტყუებულად ვგრძნობთ, რადგან, სამწუხაროდ, წინასწარ დადგმული სპექტაკლის მონაწილეები აღმოვჩნდით.

გვაინტერესებს, როგორ მოხვდნენ სამკვირიან ტრენინგზე პირები, რომლებმაც პირველი ეტაპის ბარიერიც კი ვერ გადალახეს?! პასუხი ვერ მივიღეთ ვერც ერთი ინსტანციიდან, რომელსაც კი მივმართეთ. სამართლიანობის აღდგენის ერთადერთ იმედად გვრჩებით თქვენ, ბატონო პრეზიდენტო!

კიდევ ერთხელ გულწრფელად გიხდით მადლობას ყურადღებისა და გულისხმიერბისთვის!”

ჩანტლაძე ჭორს უწოდებს

“გურია ნიუსისთვის” ცნობილი გახდა, რომ მანდატურის კონკურსის ყოფილი მონაწილეები შინაგან საქმეთა სამინისტროს გურიის სამხარეო მთავარ სამმართველოში მივიდნენ, ამ უწყებაში დასაქმებულებმა კი ისინი კონსტიტუციური უსაფრთხოების დეპარტამენტის აჭარა-გურიის სამხარეო სამმართველოში გადაამისამართეს.

“რადგან ტესტირება პოლიციის აკადემიაში შედგა, გვაინტერესებდა ვინ დაინიშნა მანდატურებად. როგორც კუდ-ის ოფისში გვითხრეს, თქვენი არ ვიცი, მაგრამ ერთი ადამიანი იმის გამო არ დაინიშნა, რომ ოპოზიციონერიაო, _ გვითხრეს კონკურსის მონაწილეებმა.

“გურია ნიუსი” კონსტიტუციური უსაფრთხოების დეპარტამენტის აჭარა-გურიის სამხარეო სამმართველოს უფროსს გურამ ჩანტლაძეს ტელეფონით დაუკავშირდა: _ ეს არის ჭორი. ოპოზიციონერის და პოზიციონერის ვინაობას ჩვენ არ ვწყვეტთ, ჩვენ მხოლოდ კრიმინალებთან გვაქვს საქმე. მანდატურის სამსახური ჩემთან რა კავშირშია, ეს ვერ მივხვდი.

_ ბატონო გურამ, თქვენთან ხომ იყვნენ მანდატურის კონკურსის მონაწილეები?

_ მათ ვუთხარი, რომ უნდა მისულიყვნენ განათლების და მეცნიერების სამინისტროს გენერალურ ინსპექციაში და ავუხსენი, რომ მე ვერ დავეხმარებოდი”, _ გვითხრა გურამ ჩანტლაძემ.

და ბოლოს, ჩვენი წყაროს ინფორმაციით, შერჩეული მანდატურები ოზურგეთში უკვე ჩამოვიდნენ და ამ დღეებში ხუთ საჯარო სკოლაში შევლენ.