ჩოხატაურის მუნიციპალიტეტის საჯარო მოხელეთა მუდმივმოქმედმა საატესტაციო კომისიამ სასამართლო პროცესი მოიგო.
კომისიის წინააღმდეგ ოზურგეთის რაიონულ სასამართლოში სარჩელი მოქალაქე ბიძინა გიგოლაშვილმა შეიტანა.
სასარჩელო მოთხოვნის თანახმად, გიგოლაშვილი კომისიის 2015 წლის 4 ივნისის სხდომის #3 ოქმის, ჩოხატაურის მუნიციპალიტეტის საპრეტენზიო კომისიის 2015 წლის 11 ივნისის სხდომის #1 ოქმის და საატესტაციო კომისიის თავმჯდომარის #184 წერილის ბათილად ცნობას ითხოვდა.
აღნიშნული ოქმები ადასტურებდა, რომ გიგოლაშვილი სასურველ თანამდებობაზე არ დაინიშნა. მას ორ ვაკანსიაზე ჰქონდა განაცხადი შევსებული _ სურდა გამხდარიყო საკრებულოს იურიდიული განყოფილების ხელმძღვანელი ან საკრებულოს მთავარი სპეციალისტი გამგეობასთან და გამგებლის წარმომადგენლებთან ურთიერთობის საკითხებში.
„დაევალოს კომისიას ახალი ინდივიდუალური სამართლებრივი აქტის გამოცემა აღნიშნული ვაკანსიებიდან ერთ-ერთ თანამდებობაზე ჩემს შერჩევასთან დაკავშირებით,“ _ აღნიშნული იყო მოსარჩელის მოთხოვნაში.
ოზურგეთის რაიონული სასამართლოს მოსამართლემ ბიძინა სტურუამ გიგოლაშვილის სარჩელი არ დააკმაყოფილა. როგორც პროცესის დასრულების შემდეგ მოსამართლემ განმარტა, კომისიას პროცედურები არ დაურღვევია და ყველა ოქმი კანონის შესაბამისად იყო მიღებული.
მოსამართლის განმარტებით, ასევე ვერ დაკმაყოფილდება მოსარჩელის მოთხოვნა, რომლის თანახმადაც კომისიას უნდა დაესაბუთებინა, თუ რატომ არ დანიშნეს იგი კონკრეტულ თანამდებობაზე, რადგან კომისიის წევრებს კანონი არ ავალდებულებს დაასაბუთონ თუ რატომ არ მისცა კონკრეტულ ადამიანს ხმა.
სასამართლოს გადაწყვეტილება მხარეებს ჯერ არ ჩაბარებიათ, თუმცა, როგორც გიგოლაშვილმა გვითხრა, გადაწყვეტილებას აუცილებლად გაასაჩივრებს.
