ქუთაისის სააპელაციო სასამართლოში, პოლიციელების ცემაში მსჯავრდებული პირების სასამართლო პროცესი 4 ნოემბრისთვის გადაიდო.
საქმე ეხება 2014 წლის 16 ოქტომბერს, მარტვილის რაიონის სოფელ ბანძაში მომხდარ შემთხვევას, რა დროსაც, პოლიციის შენობიდან ხელბორკილებდადებული ბრალდებული თემურ გაბუნია გაიქცა. გამოძიების მტკიცებით, დაკავებულმა გაქცევა ნათესავების დახმარებით მოახერხა, რომლებიც განყოფილებაში მივიდნენ, პოლიციის თანამშრომლებს თავს დაესხნენ და მათ როგორც სიტყვიერი, ასევე ფიზიკური შეურაცხყოფა მიაყენეს. თუმცა, განსხვავებულ ვერსიაზე საუბრობენ თავად მსჯავრდებული პირები. მათი თქმით, პოლიციელები ალკოჰოლური ზემოქმედების ქვეშ იმყოფებოდნენ და შეურაცხყოფა იქეთ მიაყენეს.
საქმეზე ბრალი 7 პირის წაუყენეს, აქედან ორი ქალია. პირველი ინსტაციის სასამართლომ, ზუგდიდში, 5 პირს (ბოჩია ასაბაშვილს, ვაგნერ წულაიას, შალვა პატარაიას, გოგიტა კეკელიას და ცოტნე გაბუნიას) პატიმრობა, ბრალდებულ ქალბატონებს – მაია და ინეზა კეკელიებს კი, 3-3 ათას ლარიანი გირაო შეუფარდა.
თუმცა, მსჯავრდებულმა პირებმა და მათმა ადვოკატებმა ზუგდიდის რაიონული სასამართლოს მოსამართლის, ნატრული აკობიას მიერ, 2015 წლის 9 ივნისს გამოტანილი განაჩენი ქუათაისის სააპელაციო სასამართლოში გაასაჩივრეს.
დღეს, სასამართლო პროცესზე მსჯავრდებული პირების ნაწილმა და მათმა ადვოკატმა ტარიელ კაკაბაძემ საბოლოო სიტყვები თქვეს. რეპლიკის უფლებით ისარგებლა პროკურორმა ბორის კვარაცხელიამაც. რომელსაც ყურადღება არ გაუმახვილებია დაცვის მხარის მიერ გაცხადებულ, საქმეში არსებულ დარღვევებთან დაკავშირებით და მოსამართლეთა კოლეგიას მხოლოდ ის მოახსენა, რომ ადვოკატები სასამართლო პროცესზე მეგრულად საუბრობდნენ და ბრალდებული პირების – მაია და იამზე კეკელიების დაწყნარება უჭირდათო.
ამასთანავე, კვარაცხელიამ აღნიშნა, რომ გამოძიება კანონდარღვევით არ ჩატარებულა. როგორც კვარაცხელიამ აღნიშნა, ბანძაში მომხდარი დანაშაულის გამოძიება შეეძლო სამეგრელო–ზემო სვანეთის სამხარეო სამმართველოს ეწარმოებინა.
სხვა დამატებითი განმარტებებისგან პროკურორმა თავი შეიკავა.
საქმეში მსჯავრდებული პირების ადვოკატები გამოძიების არასწორად წარმართვაზე და პირველი ინსტანციის სასამართლოს მიერ გამოტანილ გადაწყვეტილების დაუსაბუთებლობაზე საუბრობენ.
როგორც "გურია ნიუსს" ადვოკატმა ბაჩუკი ყურაშვილმა უთხრა, ნამდვილად არ არსებობდა ფაქტობრივი საფუძვლები იმისთვის, რომ გამამტყუნებელი განაჩენი დამდგარიყო.
"ზუგდიდის რაიონული სასამართლოს მოსამართლის, ნატრული აკობიას მიერ, საქმეზე გამოტანილი განაჩენი გავასაჩივრეთ იმიტომ, რომ უკანონო და დაუსაბუთებელი იყო. ფაქტობრივი საფუძვლები ნამდვილად არ არსებობდა იმისთვის, რომ გამამტყუნებელი განაჩენი დამდგარიყო. განაჩენი არის აბსოლუტურად დაუსაბუთებელი, თუმცა, მოსამართლეს აქვს კანონით ვალდებულება, რომ ახსნას, რატომ არ გაიზიარა დაცვის ესა თუ ის მტკიცებულება და რატომ დაეყრდრნო ბრალდების მხარის მტკიცებულებებს, ამგვარ ახსნას კი,ნატრული აკობიას მიერ გამოტანილი განაჩენი არ შეიცავს. საერთოდ არ არის ამაზე ნამსჯელი განაჩენში. ის წერს, რომ ამ მონაცემებიდან გამომდინარე, ბრალდების მტკიცებულებებზე მინიშნებით, სცნო დამნაშავედ 7 პირი. მაგრამ რატომ არ გაიზიარა დაცვის მხარის მტკიცებულებები, განაჩენში არც ამაზეა რამე ნათქვამი",_ აღნიშნავს ყურაშვილი და დასძენს, რომ " სამართლიანი, კანონიერი და ობიექტური იქნება ამ საქმესთან დაკავშირებით, გამამართლებელი განაჩენი დადგეს".
ადვოკატი ტარიელ კაკაბაძე, რომელიც საქმეში ახლახანს ჩაერთო აღნიშნავს, რომ პირველი ინსტანციის სასამართლოში საქმე მოსამართლემ კანონდარღვევით განიხილა, რამაც მისი პასუხისმგებლობის საკითხი შეიძლება დააყენოს.
"ვინაიდან პროცესში ახლახანას ჩავერთე, თავიდან მომიწია სხდომის ოქმების მოსმენა და მტკიცებულებების შესწავლა. არანაირ კრიტერიუმს არ აკმაყოფილებს არათუ განაჩენი, არამედ ის, თუ როგორ უძღვება საქმეს მოსამართლე ნატრული აკობია. სასამართლო პროცესებზე იყო ძალიან ბევრი შემთხვევა, როდესაც მოსამართლე თავისი ინტერპრეტაციით ახდენს დაცვის მხარის კითხვების განრიდებას. ის არ ასმევინებდა დაცვის მხარეს კითხვებს პროცესზე და მაქსიმალურად ცდილობდა ბრალდების მხარეს ესაუბრა ის, რაც სურდა. რეალურად, კრიტიკული დაკითხვის საშუალება დაცვის მხარეს აღარ მიეცა.
მოსამართლე აშკარად ვერ მალავდა მიკერძოებას და ეს სასამართლო სხდომის ჩანაწერებიდანაც ჩანს. ამასთანავე, მოსამართლე თავისი ინიციატივებითაც სვამს კითხვებს, რისი უფლებაც არა აქვს. სისხლის სამართლაში შეჯიბრებითობის პრინციპი მოქმედებს, სადაც მხარეები თავად სვამენ კითხვებს, ხოლო თუ ერთ მხარეს მეორის მიერ დასმული შეკითხვა არ მოეწონება, შუამდგომლობით შედის სასამართლოში კითხვის განრიდებასთან დაკავშირებით. ამ შემთხვევაში კი, მოსამართლე საერთოდ არ უსმენდა ამ შუამდგომლობებს და პირდაპირ, თავისი ინიციატივით ახდენდა კითხვათა განრიდებას. მოსამართლის მიდგომა რომ არაკვალიფიციურია, ეს განაჩენიდანაც ჩანს, რადგან მას მოწმეთა ჩვენებები cope-paste-ით აქვს გადმოტანილი. ამის შემდეგ კი, პირდაპირ დასკვნაზეა გადასული. განაჩენში არ არის არანაირი კრიტიკული მსჯელობა, არანაირი დასაბუთება, ჩაძიება და ა.შ. მოსამართლემ პირდაპირ დადო დასკვნა, რომ აღნიშნული პირები დამნაშავეები არიან", _ ამბობს კაკაბაძე არ გამორიცხავს, რომ მოსამართლის პასუხისმგებლობის საკითხი იუსტიციის უმაღლეს საბჭოში დააყენოს.
ადვოკატი ასევე აღნიშნავს, რომ თუ სასამართლო ობიექტურად, ყოველმხრივ და ევროპული სტანდარტების შესაბამისად განიხილავს საქმეს, აუცილებლად გამამართლებელი განაჩენი უნდა დადგეს.
ცნობისთვის, ადვოკატები აპირებენ საქმის მიმდინარეობის შესახებ საერთაშორისო ორგანიზაციებსაც აცნობონ.
"მოლაპარაკებები გვაქვს დაწყებული საერთაშორისო ორგანიზაციებთან. მათ რომ გავაცნობ ამ მტკიცებულებებს, რომელიც საქმეში არსებობს; ასევე, გამომძიებლების ნამუშევარს, მე როგორც ქართველს, ძალიან შემრცხვება და ეს ქვეყნის იმიჯისთვისაც ძალიან დიდი სირცხვილი იქნება",_ ამბობს კაკაბაძე.
დღევანდელი სასამართლო პროცესი ორსაათნახევრის დაგვიანებით დაიწყო, რის გამოც, მოსამართლემ მიიღო გადაწყვეტილება, მსჯავრებულების ნაწილისთვის სასამართლოს შემდეგ სხდომაზე მოესმინა.
შემდეგი სასამართლო სხდომა 4 ნოემბერს გაიმართება.
ამავე თემაზე:
როგორ გაიქცა დაკავებული – ნასვამი პოლიციელების წინდაუხედაობით თუ ნათესავების "ამბოხით"
პატრულის ცემისთვის ქალბატონებს მოსამართლემ განაჩენი გამოუტანა (ვიდეო)
"ადამიანის უფლებათა ცენტრი" სამართალდამცველთა მიერ ჩადენილი დანაშაულების დროულ გამოძიებას ითხოვს
პოლიციელების ცემაში ბრალდებული ქალის ღია წერილი
"შვიდ ადამიანს შვიდი წლით თავისუფლების აღკვეთისთვის გვწირავენ"
