“არჩევნებზე მაგათ ხმას არ მივცემ, ციდან რომ ვარსკვლავები ჩამომიტანონ“ – მოქალაქეები პურის გაძვირებაზე

რამდენიმე დღეა ოზურგეთში პური გაძვირდა.   პურის საცალო ღირებულებამ  5 თეთრით მოიმატა, ხოლო ერთი ტომარა ფქვილი საშუალოდ 10 ლარით გაძვირდა.

პურის ფასი უკვე გააძვირეს პურ-პროდუქტების მწარმოებელმა დიდმა კომპანიებმა და მცირე საცხობებმა.

რამდენიმე დღეა,  სუპერმარკეტებში მისულ მომხმარებლებს პური 5 თეთრით გაძვირებული დახვდათ.

   ბევრი მოქალაქე უკვე ღიად აფიქსირებს უკმაყოფილებას, პურისა და სხვადასხვა სამომხმარებლო პროდუქტებზე  ფასების მომატების გამო.

"გურია ნიუსი" ოზურგეთის მაღაზიებსა და პურის საცხობებს ეწვია. შპს "ვასაძის პური" ერთ-ერთი მსხვილი მწარმოებელია. მარკეტ "ნატალიში" სხვადასხვა სახეობის პურის ფასი გადავამოწმეთ.  მოვაჭრეებმა ინფორმაცია,  ყველა სახეობის  პურზე 5 თეთრით გაძვირების  შესახებ,  დაგვიდასტურეს.

"გურია ნიუსი" ოზურგეთის ქუჩებსა და აგრარულ ბაზარში მოქალაქეებს გაესაუბრა პურის გაძვირებასთან დაკავშირებით:

"პური გაძვირდა, პური გვჭირდება ყოველ წუთს, ბავშვები რომ არ მოგვიშივდეს.  პურშია ფული, გინდა თუ არ გინდა, სხვა რამ უნდა დათმო და პური იყიდო. წაგვიჭირეს ახლა ყელში და გვახრჩობენ, პურის ფულის შოვნა უარესად ძნელია,  ადამიანი  უპურობას ვერ მოითმენს" _ ამბობენ მოქალაქეები.

გივი დობორჯგინიძე:  "რა უნდა ვთქვა?  იმის შიში მაქვს, რომ კიდევ არ გაძვირდეს, თან პური პურს არ ჰგავს.  ნუ ფიქრობენ  იმას, რომ ამ საცოდავ ხალხს   ატყუებენ. კიდევ კარგი,   ჟურნალისტები არსებობენ, რომ ხელისუფლების  საქმიანობის შესახებ ინფორმაცია გავიგოთ."

თემურ გორდელაძე: "პური გაძვირდა, ეს რას ნიშნავს? კარგი შეიძლება იფიქროს ადამიანმა? გაგვიძვირეს ყველაფერი,  პურის გაძვირება კარგს არაფერს მოუტანს ამ მთავრობას."

 ჯემალ დოლიძე:  "ამ მთავრობამ კარგი გააკეთა რამე? ამის მიზეზი იცით რა არის? მთავრობის უნიათობა!   არაფრად  მიაჩნიათ ჩვენნაირი გლეხები,  ჩვენ მაგათ საარჩევნოდ ხმა მივეცით,  მოვიყვანეთ და  აი, როგორ  გადაგვიხადეს."

როზა დოლიძე:  "მე ჩემი დედმამიშვილი არ მელაპარაკებოდა  წინასაარჩევნოდ 7 თვე, "ოცნების" მაისური რომ ჩავიცვი, დაინგრა ჩემს ოჯახში ყველაფერი.  მთელი კუთხე დავაყენე ფეხზე, არიქა გვეშველება მეთქი, დედმამიშვილი დავკარგე და დღეს ამ მთავრობამ სამსახურიდან გამომიშვა, ხელფასი მქონდა,  მომიხსენეს. ივანიშვილის მთავრობამ  ჩემი ოჯახი მშიერი დატოვა, კულტურის ცენტრში ვმუშაობდით ერთ-ერთ ანსამბლში.  ვის ჯიბეში მიდის  ჩვენი ფული?"

თალიკო ვახრამოვი:  "რატომ გაძვირდა პური,   ამ ხელისუფლებას მოკითხეთ.  პურთან ერთად ყველაფერი გაძვირდა,  პენსია 10 ლარი მოამატეს, ამ დროს კი ყველაფრის  ფასი მომატებულია.  ხელისუფლებამ  დაპირებების   მესამედი არ შეასრულა, არცერთ არჩევნებში აღარ მივიღებ  მონაწილეობას.  71 წლის ქალი,  რომ აქ დაჯდები.  დღეს მთელ დღეა  5 ლარი  არ მაქვს ნავაჭრი.  5 ლარი  წამალში მჭირდება მარტო."

მაყვალა კეჭაყმაძე:  "ძაან  ცუდად წაგვივიდა ამ სამი წლის მანძილზე ცხოვრება.  გვეგონა რომ ყველაფერი კარგად იქნებოდა, ყველას ჰკითხეთ, აბა თუ მოსწონთ, რომ პური გაძვირდა. ამხნის ქალს  ქუჩაში რა მინდა? სახლში რომ ვიჯდე,  უკეთესი არაა? არანაირი გასაქანი სოფელში არაა.  ზამთრისთვის შეშის  მომარაგება  ხომ გვინდა? ეს პენსია რაში უნდა მეყოს? წამლებში არ მყოფნის."

რეზო ბაღიშვილი:  "არ უნდა  გაძვირებულიყო შვილო,  მთავრობა შესაცვლელია! აი ამ წამლებში 45 ლარი გადავიხადე ჩემი პენსიით, რომელიც მხოლოდ რამდენიმე დღე უნდა მეყოს. აფთიაქში ვერ შეხვალ, მაღაზიაში ვერ შეხვალ, ხალხი მშიერია, ასე როგორ შეიძლება? "

 ციცო დუმბაძე:  "რა შეიცვლება თქვენთან საუბრით? ყველაფერი გაძვირდა, 10 ლარით მოამატეს პენსია და ეს გონიათ საშველი? არჩევნებეზე მე მაგათ ხმას არ მივცემ, სულ რომ  ციდან ვარსკვლავები ჩამომიტანონ."