ლანჩხუთის მუნიციპალიტეტის გამგეობის შენობის მესამე სართულზე, ამ წუთებში კონტროლის პალატა ლანჩხუთელების დაკითხვას აწარმოებს. როგორც გვითხრეს, დაკითხვის მიზანი “ქართული ოცნების” მიერ გადარიცხული თანხებია.
შენობის მესამე სართულზე მობილიზებულია პოლიცია და არც რიგით მოქალაქეებს და არც ჟურნალისტებს შენობის მესამე სართულზე არ უშვებენ.
ლანჩხუთის მუნიციპალიტეტის გამგეობის პრესამსახურის ხელმძღვანელის, ეთერ ჭყონიას თქმით, მისთვის უცნობია, რატომ არ უშვებენ ადამიანებს მესამე სართულზე:
_ კონტროლის პალატამ გვთხოვა ორი ოთახის დათმობა და ჩვენ დავუთმეთ. ვიცით, რომ იქ მოქალაქეებს ესაუბრებიან. ამის მეტს ვერაფერს გეტყვით.
_ ქალბატონო ეთერ, ადმინისტრაციის შენობაში, სადაც შესვლის უფლება კანონით ყველა ადამიანს აქვს, არ უშვებენ ჟურნალისტებს……
_ მართლა არ ვიცი რა ხდება. მხოლოდ ვიცი ის, რომ იქ ასულ ადამიანებს ეკითხებიან ვინ არიან. ჩვენ მხოლოდ ოთახები დავუთმეთ, მეტი არაფერი ვიცი, _ გვითხრა ჭყონიამ.
ლანჩხუთის გამგეობის მესამე სართულზე არ შეუშვეს “გურია ნიუსის” ჟურნალისტი ლალი იმედაიშვილი და ოპერატორი. ის რამდენიმე წუთით კანცელარიაში გააჩერეს და შემდეგ შენობა დაატოვებინეს.
დაკითხვიდან გამოსული ადამიანები, პრესასთან კომენტარებს არ აკეთებენ. როგორც გვითხრეს, ამის მითითებას კონტროლის პალატის წარმომადგენლები იძლევიან.
“გურია ნიუსი” ამ წუთებში ცდილობს ინფორმაციის მიღებას. როგორც ჩვენი კორესპონდენტი ადგილიდან იტყობინება, მესამე სართული ჩაკეტილია და იქ ასვლას ვერავინ ახერხებს.
