თბილისში, ვაჟა ფშაველას 78ა და 76ბ კორპუსების მობინადრეებმა საპროტესტო აქცია გამართეს, რომელზეც აღნიშნული კორპუსების მიმდებარედ დაწყებული კომერციული ფართის მშენებლობა გააპროტესტეს. ამხანაგობა "იმედი-2012’"-ის თავმჯდომარე ზურაბ ბეიტრიშვილი, "გურია ნიუსთან" საუბრისას ამბობს, რომ აღნიშნული ობიექტების მშენებლობის შემსრულებელმა დავით მახარაშვილმა თბილისის მერიის არქიტექტურის სამსახურს გაყალბებული დოკუმენტები წარუდგინა, რითაც მოიპოვა ზემოთაღნიშნული კომერციული ფართისა და საცხოვრებელი კორპუსის მშენებლობის უფლება.
ამხანაგობის თავჯდომარე ამბობს, რომ " სავარაუდო დანაშაულებრივმა დაჯგუფებამ, რომელშიც შედიოდნენ შ.პ.ს. ,"არმაზის" დირექტორი ანზორ რომელაშვილი, შ.პ.ს. ,"წინანდალის" დირექტორი ზურაბ კალატოზიშვილი, მშენებლობების მწარმოებელი დავით მახარაშვილი, ჩაატარა კრება, რომელზეც მიიღეს ყალბი დოკუმენტი, რის საფუძველზეც ჩვენი კორპუსის ორივე მხარეს, ჩვენი ნების საწინააღმდეგოდ და ინტერესების დარღვევით დაიწყო საცხოვრებელი მაღალსართულიანი კორპუსის და ოფისის მშენებლობა. მშენებლობებმა გამოიწვია საცხოვრებელი კორპუსის საძირკველის დატბორვა-გაუვარგისება (დაზიანებულია საძირკველის ჰიდროიზოლაცია), საკანალიზაციო სისტემის გაუმართაობა, ელექტრო ტრანსფორმატორის ცხაურების დაშლა, ასფალტობეტონის საფარის გაუვარგისება, სარეკრეაციო ზოლისა და მრავალწლიანი წიწვოვანი ნარგავების განადურება, ჩვენი საცხოვრებელ ბინამდე მისასვლელი გზების (საფეხმავლო და საავტომობილო) განადგურება და მოშლა. ასევე დასადგენია მშენებლობის ნებართვების გამცემი ორგანოს გადაწყვეტილებების მართლზომიერება, სამშენებლო კომპანიის მიერ სამშენებლო წესების, ნორმების და შრომის უსაფრთხოების პირობების დაცვის კუთხით, რადგან ორივე კორპუსის დაახლოებით 400 მობინადრეს ნებისმიერ დროს შესაძლებელია თავს დაგვატყდეს უბედური შემთხვევა."
მოსახლეობის ამ მოსაზრებას კატეგორიულად არ ეთანხმება დავით მახარაშვილი, რომელიც ამტკიცებს, რომ მშენებლობაზე ნებართვა თბილისის არქიტექტურის სამსახურმა ჯერ კიდევ 2006 წელს გასცა.
"ეს კორპუსი ( 76გ) ჩვენმა სამშენებლო კომპანიამ ააშენა. გვაქვს ნებართვა ექვსართულიანი კომერციული ფართისა და ე. წ. მოდულის მიმდებარედ მრავალსართულიანი საცხოვრებელი კორპუსის მშენებლობაზე. კორპუსის მშენებლობა უკვე მიმდინარეობს. რაც შეეხება კომერციულ ფართს, ახლახან განვაახლეთ მშენებლობა, ვაპირებთ ექვსართულიანი კორპუსის აშენებას, სადაც იქნება მისასვლელი გზა და პანდუსიც", _ აცხადებს მახარაშვილი.
_ მოსახლეობის ნაწილი და ამხანაგობის თავმჯდომარე ამტკიცებენ, რომ მშენებლობა უკანონოა და თქვენ საბუთების გაყალბებით მიიღეთ ნებართვა მშენებლობაზე.
"არავითარ გაყალბებას არ ქონია ადგილი. გამოცხადდა აუქციონი მიწის ნაკვეთზე, რომელიც შეიძინა ჩვენმა სამშენებლო ფირმამ. ყველაფერი კანონის ფარგლებში მოხდა. ახლა დავიწყეთ მშენებლობა, მაგრამ წავაწყდით მოსახლეობის წინააღმდეგობას. ჩვენ მზად ვართ წავიდეთ მოლაპარაკებაზე და ერთად მივიღოთ ყველასთვის მისაღები გადაწყვეტილება. მოსახლეობის ძირითადი პრეტენზია ეხება იმას, რომ კორპუსთან მისასვლელი გზა ჩაიკეტება. მაგრამ ამ კორპუსის (78ა) მშენებლობისას თავიდანვე არ გაითვალისწინეს გზა. ჩვენ ვაპირებთ მოვაწყოთ სამანქანო გზა და პანდუსი, რომლითაც აღნიშნული კორპუსის მობინადრეებიც ისარგებლებენ", _ ამბობს მახარაშვილი "გურია ნიუსთან" საუბრისას.
აქციის მონაწილეების ძირითადი პრეტენზიები ეხება კორპუსთან მისასვლელი გზის ჩაკეტვას და ფაქტიურად ეზოს გაუქმებას. ისინი ამბობენ, რომ ამ აქციით ხელისუფლების წარმომადგენლების ყურადღების მიქცევას ცდილობენ. იმ შემთხვევაში, თუ ხელისუფლების მხრიდან არ იქნება სათანადო რეაგირება, უფრო რადიკალური ზომების გამოყენებასაც არ მოერიდებიან.
ამხანაგობა "იმედი 2012-ის" თავმჯდომარემ ზურაბ ბეიტრიშვილმა დღეს განაცხადა, რომ აქციიდან ერთი კვირის გასვლის შემდეგაც, მოსახლეობას ქალაქის მთავრობიდან არავინ გამოხმაურებია.
78ა და 76ბ კორპუსების მობინადრეებმა პრემიერ-მინისტრის ირაკლი ღარიბაშვილის სახელზე ერთობლივი საჩივარიც გააგზავნეს, რომელშიც ითხოვენ მკაცრად დაისაჯონ გამყალბებლები, დაყადაღდეს მათი საბანკო ანგარიშები, რათა მათ ვეღარ მოახერხონ მშენებლობის გაგრძელება, ხოლო თბილისის მერიამ საქმეზე ჭეშმარიტების დადგენამდე, შეაჩეროს უკანონო მშენებლობები.
ამხანაგობის თავმჯდომარე ჩვენთან საუბრისას აცხადებს, რომ აღნიშნულ საქმეს პროკურატურა სწავლობს. "გურია ნიუსი" პროკურტურის პოზიციას, მოგვიანებით შემოგთავაზებთ.
