საგარეჯოში "ქართული ოცნების" მაჟორიტარობის კანდიდატის თამარ ხიდაშელის განცხადებით, "პატრიოტთა ალიანსის" მაჟორიტარობის კანდიდატის ირმა ინაშვილის მხარდამჭერები უბნებზე ნასვამ მსგომარეობაში მიდიან.
ხიდაშელმა დღეს გამართულ ბრიფინგზე ინაშვილს მოუწოდა აღკვეთოს "ნასვამი მხარდამჭერების თარეში საარჩევნო უბნებზე".
ხიდაშელმა განაცხადა, ინაშვილის მხარდამჭერები სხვადასხვა უბნებზე პროვოკაციებს აწყობენ. მან აღნიშნა, რომ საგარეჯოს # 9, 20, 39, 42 და მე-3 უბანზე პროვოკაციები დაფიქსირდა.
"ინციდენტებში მთავარი მოქმედი პირი არის ვინმე თორნიკე გასვიანი, რომელიც გადაადგილდება "მერსედესის" ჯიპის ავტომობილით ნომრით ZRZ 225",_ განაცხადა თამარ ხიდაშელმა.
შეგახსენებთ, რომ "პალიტრა ტვ"-მ დღეს საარჩევნო უბანზე პიროვნება დააფიქსირა, რომელიც სწორედ ავტომობილით გადაადგილდება და ხიდაშელის მხარდამჭერების მისამართით იგინება.
თამარ ხიდაშელის ინფორმაციით, საარჩევნო უბნის მიმდებარე ტერიტორიაზე დაფიქსირდა მიხეილ ცილიკაშვილი, რომელიც ინაშვილის შტაბის წარმომადგენელია და იარაღი აქვს.
როგორც დღეს გამართულ ბრიფინგზე ხიდაშელმა აღნიშნა, იარაღით ყოფნა საარჩევნო უბნის ტერიტორიაზე არ უწყობს ხელს არჩევნების ნორმალურ ვითარებაში ჩატარებას.
ჩამოთვლილი უბნების გარდა, ხიდაშელმა აღნიშნა, რომ ხმის მიცემის პროცესი ნორმალურ ვითარებაში მიმდინარეობს. მაჟორიტარობის კანდიდატმა დასძინა, რომ უპირატესობა სწორედ მას აქვს.
რაც შეეხება ირმა ინაშვილის შტაბის მიერ გავრცელებულ ინფორმაციას, რომ გარკვეულ უბნებზე მოსყიდვა მიმდინარეობს, ხიდაშელი განმარტავს, რომ მისი სახელით მოსყიდვის შესახებ გავრცელებული ინფორმაცია ტყუილია, ინაშვილის შტაბს კი, კონკრეტული სახელების და გვარების დასახელებისკენ მოუწოდა.
რაც შეეხება ინაშვილის შტაბის კიდევ ერთ განცხადებას, რომლის მიხედვით საარჩევნო უბნებზე "ქართული ოცნების" კანდიდატის მხარდასაჭერად სოფლების გამგებლები და რწმუნებულები არიან მობილიზებული, თამარ ხიდაშელი აცხადებს, რომ არც აღნიშნულ ინფორმაციას არ ადასტურებს და სამართალდამცველებს მოუწოდებს ბრიფინგზე გამოთქმული ფაქტების შესახებ მოკვლევა დაიწყონ.
