"გილოცავთ მეგობრებო! საქართველოში ოფიციალურად დამყარდა დიქტატურა. ამ წუთში ცნობილი გახდა, რომ მოსამართლე ურთმელიძემ გამოიტანა სრულიად უკანონო გადაწყვეტილება, რომლითაც რუსთავი 2ის დროებით მმართველად დანიშნა რევაზ საყევარიშვილი (იმედის ყოფილი დირექტორი).
მენეჯმენტის უფლებამოსილება შეჩერებულია. ამიერიდან, ერთის ნაცვლად გეყოლებათ ორი ტვ იმედი. კიდევ ერთხელ გილოცავთ დიქტატურის დამყარებას!" _ ნიკა გვარამიას მიერ სოციალურ ქსელში გამოქვეყნებული ამ სტატუსით გახდა ცნობილი, რომ მოსამართლე ურთმელიძემ ქიბარ ხალვაშს მოთხოვნა დაუკმაყოფილა და რუსთავი 2-ს ახალი დროებითი მენეჯმენტი დაუნიშნა.
განჩინებაში ურთმელიძე მეხუთე მუხლში მიუთითებს, რომ "შპს სამაუწყებლო კომპანია რუსთავი 2-ის დროებით მმართველად დაინიშნოს დავით დვალი და რევაზ საყევარიშვილი".
მეექვსე პუნქტში კი აღნიშნულია, რომ დვალმა და საყევარიშვილმა უფლებამოსილების განხორციელება განჩინების გამოქვეყნების დღესვე, ანუ 5 ნოემბრიდან უნდა დაიწყონ.
მეშვიდე პუნტქტით კი მოსამართლე ურთმელიძემ რუსთავი 2-ის გენერალურ დირექტორს ნიკა გვარამიას და ფინანსურ დირექტორს კახა დამენიას უფლებამოსილება შეუჩერა.
ურთმელიძე განჩინებაში ასევე წერს "დროებით მმართველს განემარტოს, რომ თუ ის (ისინი) არ შეასრულებს საწარმოს კეთილსინდისიერად მართვის მოვალეობას, იგი საზოგადოების წინაშე წარმოშობილი ვალდებულებისათვის პასუხს აგებს მთელი თავისი ქონებით, პირდაპირ და უშუალოდ".
ურთმელიძე აქვე აღნიშნავს, რომ გადაწყვეტილება განჩინების გამოქვეყნებისთანავე უნდა აღსრულდეს, ანუ 5 ნოემბერს.
ამ თემაზე კომენტარი ამ დრომდე არ გაუკეთებიათ ქიბარ ხალვაშს, დავით დვალსა და რევაზ საყევარიშვილს.
აღსანიშნავია, რომ "გურია ნიუსმა" 26 ოქტომბერს გაავრცელა ინფორმაცია, სადაც საუბარი იყო ტელეკომპანია „რუსთავი 2“-ის დამფუძნებლებს დავით დვალს, ჯარჯი აქიმიძესა და ქიბარ ხალვაშს შორის შემდგარ მოლაპარაკებაზე. როგორც მაშინ გვითხრეს, სამეულის შეთანხმების თანახმად, იმ შემთხვევაში, თუკი სასამართლო ხალვაშს ტელეკომპანიას დაუბრუნებს, „რუსთავი 2“ მართვაში დვალს და აქიმიძეს გადაეცემათ.
იხილეთ სტატია: "დამატებითი ხარჯები გავწიე და დრო დავხარჯე“ _ ხალვაში ივანიშვილთან შეხვედრის დეტალებზე ალაპარაკდა
